John2
1Mơ̆t nge dơ̆ păy, du jơno tơmhòp bo tom nơ̆m Kana lơgơ Galile, mơi Yang Jesu dê ăm anẵu gư̆n.2Yang Jesu gư̆m lơ̆gay cro bơtê Kơnràñ kŭng dî jà swà sa tơmhòp.3Tơm tô̆ alăk lơ̆, mơi Yang Jesu dê tơs î Kơnràñ lah: “Ƀòn gô ơ̆ hôm alăk.”4Gừn Yang Jesu tơs î mò lah: “Ơ mò, bră dô tom jơno găy trôh kon î mơi? Jơ kon dê hôm dahrăư trôh.”5Mơi Kơnràñ dê tơs î lơ̆gay cro dŏng bră: “Lơh-jăt cĕ lơ̆gay bulah jơno găy mà gô gư̆n pơđơ ƀòn amî.”6Anẵu gư̆n tom pro-lăm yăng mon î lô̆ dî ăn dêh ma bră lơh lơhiê cro Juđa dê, kơp du-lăm ăn dî pơngăp bea trôh păy thô̆ng dà.7Yang Jesu pơđơ ƀòn gô lah: “Tôh cĕ bîng dà nơ̆m lơ̆gay yăng rơ̆.” Sŏng gư̆n ƀòn gô tôh bîng gô trôh tî bơ yăng.8Kơnràñ tơs î ƀòn gô: “Jơ dô bơ̆ cĕ makin gư̆m iyà trôh ma cro tơm lăng năc.” Gư̆n la, ƀòn gô iyà swà.9Mơya tơm tô̆ cro tơm lăng năc lièp dà sŏng dî jîng alăk (mà cro ơ̆ gư̆t gô tom bơh sigăy, hôm lơ̆gay cro dŏng bră — la lơ̆gay cro sŏng bơ̆ dà gư̆n — gừn gư̆t), cro tơm lăng năc hôi bơtô klo10gư̆m tơs î amî: “Tăl hê cro ờs e alăk bơkah lai, gư̆m tơm tô̆ cro năc ñô mañơ̆l, gừn e alăk re priè rlo. Hôm amî gừn lơi alăk bơkah trôh dî jơ dô.”11Dô la jơno têl phadêh dơ̆ sơm Yang Jesu sŏng lơh nơ̆m anẵu Kana, lơgơ Galile, Kơnràñ sơđah jơno gơklŏ mơ̆n dê, gư̆m lơ̆gay cro bơtê Kơnràñ sŏng don nơ̆m anẵu Kơnràñ.12Ma-ngkơi bră gư̆n, Yang Jesu, mơi Kơnràñ gư̆m oh klo, băl î lơ̆gay cro bơtê Kơnràñ swà jư trôh nơ̆m ƀòn Kapenaum, mơya ƀòn gô ăm nơ̆m anẵu gư̆n ơ̆ khăi nge.13Nge Bơjư̆m-Sa Swà-Găn cro Juđa sŏng mơñ trôh, gừn Yang Jesu swà lêh trôh nơ̆m Jerusalem.14Kơnràñ tơmpơl nơ̆m hîh duh-khoai lơ̆gay cro brău lamău, belàt î sêm kơ̆ntơp, băl î mpôl tơmbơgăl priè ndăng nggui sơgư̆n.15Ma-ngkơi jơ kơtăñ du-lăm mư̆ng lơh î săy, Kơnràñ tơmprơh lơ̆gay ƀòn gô tơlôh bơh hîh duh-khoai, băl î belàt gư̆m lamău, Kơnràñ kŭng sơmprah prài jên tơmpôl tơmbơgăl priè dê î tơlơ̆ kaƀang ƀòn gô.16Kơnràñ tơs î lơ̆gay cro brău sêm kơ̆ntơp: “Iyà cĕ lơ̆gay jơno gư̆n tơlôh bơh sî dô. Bư̆ng lơh hîh Bàp Ăñ jê jîng anẵu kă-brău.”17Lơ̆gay cro bơtê Kơnràñ sơdơ wăl jơno sŏng cêh, lah: “Nùs ngăc-ngăr bơh hîh Yang rơp sa roh kon.”18Bơh jơno gư̆n, cro Juđa kla dẵư gừn tơs î Kơnràñ: “Ông sơđah ma ƀòn hî tơmpơl têl phadêh găy tơm tô̆ ông lơh lơ̆gay bră dô?”19Yang Jesu kla dẵư, Kơnràñ tơs î ƀòn gô: “Phà rlăm cĕ hîh duh-khoai dô, sŏng gư̆n nơ̆m păy nge ăñ rơp tơngñă gô wăl.”20Tîgư̆n la, cro Juđa tơs: “Hîh duh-khoai dô dî mon nơ̆m puôn-jư̆t pro năm, mà ông rơp tơngñă wăl gô nơ̆m păy nge?”21Mơya, hîh duh-khoai mà Kơnràñ ờs tơs trôh sơđah bơh hîh duh-khoai să-jăn Kơnràñ dê.22Bơh gư̆n, tơm tô̆ Kơnràñ sŏng bơh anẵu sơ̆t jîng wăl, lơ̆gay cro bơtê Kơnràñ dê sơdơ wăl lah Kơnràñ tơs sŏng gư̆p tîgư̆n, gừn ƀòn gô don Sră-Goh gư̆m jơno mà Yang Jesu sŏng tơs.23Pơnah nde, nơ̆m dơ̆ Kơnràñ ăm nơ̆m anẵu jerusalem nhòng nge Bơjư̆m-Sa Swà-Găn, nơ̆m anẵu mpôl jơnư̆m, khăi cro don dî sơnăn Kơnràñ tơm tô̆ tơmpơl lơ̆gay têl phadêh mà Kơnràñ sŏng lơh.24Mơya, să tơm Yang Jesu ơ̆ lơi nùs don mơ̆n ma ƀòn gô, bơh Kơnràñ gư̆t lơ̆gay tăl hê cro,25gư̆n la Kơnràñ ơ̆ tom bră găy trôh dî cro găy gư̆n păl lơh cư̆ng bơh cro nde, bơh Kơnràñ gư̆t dêh jơno găy ăm nơ̆m nùs kơp hê cro.
FAR EAST BROADCASTING COMPANY