मर्कुस14
1होकाम नेलाका निस्तार सोनो खमिर माबराईसिव बरे ज़्याने पर्ब लेव। मुख्या सेवा डोने मीरं सोनो सास्त्रटा न्याम पैने मीराई येसुलाई कैजैडे छल डाडे क्योःडे सैःने वार्डे डाउँ यारःङज़्याव।2कडालेकं नोराई याबिचार पर्ब बेलाकं यासैसिखे भने मीरं भ्या हुलडङ्गा डोरं वार्ने लेव।3बेठानियालं सिमोन याडोज़्याव टोबो कुःरिलो उज़ीःमलं ज़्याव ओज़्योनाकं टोबो मेमा जटामसीलो चोखो, मोङ्गोः अत्तर सिङ्गमरमरलो सिसालं झाडे ओरोयो। होकाम हो सिसा पाडे होला मङमङबासिव अत्तर येसुलो ओङैःटं ठरडे ओयोव।4होकाम कोइ-कोइ मीरं यारिसैये या-याज़ यापाङसिरं, “एटाव चाव मङमङबासिव अत्तर कडाने खेर ओख्याज़्याव?5आव अत्तर के सोङसय पैसालो भन्डा भ्यालं येडे, नो पैसा गरिबरंलाई यावढुसि।” होकाम नोराई हो मेमालाई बिरोड याडोव। चाव बसैने ठी झाने जारं6होकाम येसुये हैओडोवरं, “आवलाई टाचंलैच्यो, कडाने जेसहटैज़्याव? आवये ङालाई चाव झैडे नैसोङो।7कडालेकं गरिबरं के एकसप्ड्या जेसंज़ टारंये, होकाम जेलाई जो बेलाकं जेमन लागि हो बेलाकंज़ जेगैडुरं। होकाम ङा के एकसप्ड्या जेसं ङाम्टा।8आव मेमाये जो डोडुज़्याव हो डाडेनोयो। आवये ङाक्याङ गाडिनेलो लागिटं ङाःडेज़ चाव बसैने अत्तर ठिडे तयार झैडे नैसोङो।9जेलाई ङा डस्साज़ हैङाडाच्योज़्या, सङसारलं जोङ-जोङ चाव सोर सठैनासी होङ-होङ आव मेमाये ओडोव येःनलो ओबात्रा आवलो ओसम्झनालो लागिटं टानेले।”10होकाम येसुलो बारंजना उसिसरंलाम टोबो यहुडा इस्करियोत वार्नेये येसुलाई याकुइटं ढोका याडे सोक्योःने वार्डे मुख्या सेवा डोने मीरं लेवङ ओनाव।11आव ठैडे नोरं बनै यारेङो, होकाम नोलाई पैसा याने कबंल पनि यानोयो। होकाम येसुलाई कैजैडे ढोका याडे क्योःने वार्डे चाव मौका खिम्डे याबारिव।12खमिर माबराईसिव बरे ज़्याने पर्बलो पैला डिन छ्याम, नोराई निस्तार पर्बटा भेडा पाठालो मार यापलो पान्त्रा उसिसराई यापजोयो, “नइछ्या कडि लिज़्या? नलागिटं निस्तार पर्बटा भोज काङं झैने?”13होकाम उसिसरंलाम नेबऱ्याङनिलाई ऐ डाडे उपरिःङोनि, “सहरलं नाचिन, होकाम रीःलो घारी घुरो टोबो मी जिनसं डैसिने ले, होकाम होलो उझिन-उझिन नाचिन।14हो मी जो ज़ीःमलं पसिना, हो ज़ीःमला मीलाई हैडाचिन, ‘गुरबाये हैवार्ज़्या’ ङासिसरासं निस्तार पर्बटा भोज ज़्योने ङापाहुना कोठा काङ उलिज़्याव?15होकाम होये जिनलाई सजैडे नैसिव ओतर्टा तालटा टोबो घ्योव कोठा सतन्ड्याने ले, हो कोठालंज़ जिन गेलागिटं भोज ज़्याने पो तयार झैचिन।”16होकाम उसिसनि सहरलं नेनाव, होल येसुये हैओवारो स्यानाव नेडोयो, होकाम उसिसनि निस्तार पर्बटा भोज तयार नेझोयो।17रिःम्डे बारंजना उसिसरासं ज़ीःमलं ओराव।18स्यान्टै चुसिडे भोज याज़्योज़्याकं येसुये हैओडोवरं, “ङा जेलाई डस्साज़ हैङाडाच्योज़्या, जे आकं ङासं ज़्योज़्याव बरिलाम टोबोये ङालाई ढोका याडे सोक्योःने ले।”19उसिसरं स्यान्टै डुखि याटाव, होकाम टोबोनि टोबोये है यावारो, “हो मी ङा रो?”20येसुये नोरंलाई हैओडोवरं, “बारंजनालाम टोबो, जोये ङासं टाठीलं बरे छोइज़्याव।21कडालेकं मानवालो ओज़ालाई ओबारेलं सास्त्रटं सर्सिव मान्टिवज़ टानेले। होकाम बनै माचाव टानेले नो मीलाई जोये मानवालो ओज़ालाई ढोका योवये, नो मी के ओम्जर्मीखिन् पनि याटाहो।”22होकं ज़्यावग्यान याडोज़्याकं येसुये उकुइटं बरे रैडे आसिक निःडे, बरे केःडे नोरंलाई यावग्यान डाडे हैओडोवरं, “हाँ आव ङाक्याङ ची।”23होकाम कचौरा रैडे परमेस्वरलाई ढन्याबाड ओयोवपाना नोरंलाई ओयोवरं, होकाम नोरं स्यान्टैराई होलाम याओँव।24होकाम येसुये नोरंलाई हैओडोवरं, “आव साःरौ न्यामटा ङा ङाझी, जो भ्या मीराई यालागिटं बगैसिये।25ङा जेलाई डस्साज़ हैङाडाच्यो, परमेस्वरलो ओराज्यला नो साःरौ अङ्गुरलो उरीः ङामओँया समं ङा फरि अङ्गुरलो उरीः ओँने ङाम्ले।”26होकाम टोबो ढन्यबाडलो भजन गीतं गैडे होलाम पुलुडे जैतुन डान्डाडे यानाव।27येसुये उसिसरंलाई हैओडोवरं, “जे स्यान्टैये ङालाई राःडे ढोङने जेले, कडालेकं ऐटाव सर्सिव ले, ‘ङा ग्वालालाई पोःने ङाले, होकाम भेडारं चित्राङ पुत्राङ टानेलेरं।’28होकाम ङा सिवलाम ज्युङडा ङाटावमान्त्रा जे भन्डा ङाःडे ङा गालीललं नानेङाले।”29पत्रुसये हैओडोव, “स्यान्टैराई याराःसन्नि पनि ङा के नङलाई राःने ङाम्ले।”30होकाम येसुये हैओडोव, “ङा डस्साज़ हैङाडानज़्या आछिम रिलं भाले नेखेप ओम्कोडे नङ ङालाई सोङखेप इन्कार डोने नले।”31होकाम पत्रुसये झन कस्सिडे हैओवारो, “नङसं बोलोङ सिने टानि पनि ङा नङलाई ईन्कार डोने ङाम्ले।” होकाम फरि स्यान्टै उसिसराईज़ नो रोः है यावारो।32होकाम गेतसमनी उमिन लेव पोलं येसुरं यानाव, होलं नाडे उसिसरंलाई हैओडोवरं, “ङा प्रार्ठना ङाडोव समं जे आकंज़ लेच्यो।”33होकाम येसुये पत्रुस, याकुब, सोनो युहन्नालाई ओल्सज़ ओलाङोरं, होकाम येसुये चब्बनै उयुङ माचाव ओझोयो।34येसुये नोरंलाई हैओडोवरं, “ङायुङ माचाव टाज़्या होसोनो ङा सिया-सियाज़ ङाटाज़्या। जे आकंज़ लेडे जागा लेच्यो।”35होकाम जामा होसै नाडे नामलं उफुलुप्सिव। ओटाखिन आव बेला ङालेवङं टाराकं वार्डे प्रार्ठना ओडोव।36होकाम येसुये हैओवारो, “अब्बा, बाबु नलागिटंके स्यान्टै रोः टानेज़ले। आव कचौरा ङालेवङं टाराकं। हैनि पनि ङावारो मान्टिव माङ्क नवारो स्यानाव ओटाकं।”37येसु फरि वोल्डे ओराकं उसिसरंलाई ङःल्डे यालिज़्याव ओडैरिवरं। होकाम पत्रुसलाई हैओडोव, “सिमोन, नङ ङःल्डे नलिज़्यावरो? टघन्टा पनि माङःल्डे नम्लेडु?38माङःल्डे लेच्यो, प्रार्ठना डोच्यो, जे परिछ्यालं टापरिच्यो। आत्माके डस्साज़ तयार लिज़्या, बुरु क्याङ कम्जोर लिज़्या।”39फरि टखेप हो प्रार्ठनाज़ ओडोनाव।40फरि ओराव होकाम नोरंलाई ङःल्डे यालिज़्याव ओडैरिवरं, कडालेकं नोराई यामिलङ यामिरंये चब्बनै लठ्ठ टाडे यालिज़्याव, होकं ओललाई कडि जबाफ याने वार्ने पनि मासुन्चिडुरंये।41येसु सोङ्खेपका फरि ओराव, होकाम नोरंलाई हैओडोवरं, “जे अजं पनि ङःल्डेज़ जिलिज़्याव? जेनासिज़्याव? आबो याटा, बेला याटाडु, आबो रःङच्यो मानवालो ओज़ा पापीराई याकुइटं क्योःसिरिज़्या।42गोसोच्योके बा। ङालाई ढोका याने मी आकंज़ लिज़्या।”43येसु ओपाङज़्याकं बारं जना उसिसरंलाम टोबो यहुडा इस्करियोत याडोज़्याव उसिस होकं ओराव। मुख्या सेवा डोने मीरं, यहुडी नेतारं सोनो सास्त्रटा न्याम पैने मीराई यापरिःङो टच्छर मीरं याकुइटं तरवाल, सोनो डेङ्ना डाडे होकं याराव।44येसुलाई ढोका यानेये हो मीरंलाई टोबो एटानाव साहान डाडे ओनैज़्यावरं, “जो मीलाई ङा म्वाइ ङाडो हो मीज़, होलाईज़ क्योःडे लाङच्यो।”45होकाम यहुडा इस्करियोत येसु लेवकं नाडे “ए रब्बी” वार्डे म्वाइ ओडोव।46होकाम होराई येसुलाई याकुइ झाडेज़ याक्योःव।47होला लेव मीरंलाम टोबोये तरवाल हाइडे, मुख्या सेवा डोने मीलो ओनौकरलाई ओना च्वाट्ट पल्डेओयोव।48येसुये नोरंलाई हैओडोवरं, “होकाम जे ङालाई डाङ्कुरंलाई मान्टि तरवालरं, डेङ्नारं रैडे जेक्योःरिसङ्ज़्याव?49डिनकापटि प्रार्ठना डोने ज़ीःमजिलं ङापैरिकंके जेसंज़ ङालेव, होकं के जेमक्योसङ्ये, बुरु सास्त्र पुरा ओटाकं।”50होकाम स्यान्टै उसिसरं ओल्लाई राःडे याढोङो।51ओक्याङटं टोबो सुतिलो क्वाये याज़ मन्ठैसिव टोबो ढापा मी येसुलो उझिन्ट ओराव। नोराई हो ढापा मीलाई क्योःने यापानो।52हो मी ओक्वा होकंज़ राःडे नाङ्ग्याज़ ओढोङो।53होकाम नोराई येसुलाई मुख्या सेवा डोने मीरं लेवङ यालाङो, होल मुख्या सेवा डोने मीरं, यहुडीराई यानेतारं, सोनो सास्त्रटा न्याम पैने मीरं डुप्सिव लेवरं।54पत्रुस मुख्या सेवा डोने मीलो ओठारालं टाडाङामज़ येसुलो उझिन-उझिन ओराव, होकाम होलं सिफाइँरासं चुसिडे मेः उमुन्सिव।55आबो मुख्या सेवा डोने मी सोनो स्यान्टै यहुडीरं याडुप्सिने घ्योव ज़ीःमला मीराई येसुलाई सैःने वार्डे, उबिरोडलं गोहाइ याखिमो, हैनि पनि कडिज़ माडैरंये।56भ्या मीरं येसुलो उबिरोडलं झुठा गोहाइ यायोरं हैनि पनि नोराई यागोहाइज़ मामिलिये।57कोइ-कोइरं उबिरोडलं च्याङडे ऐ वार्डे झुठा गोहाइ पनि यायोव।58“आवये ऐ ओवारो पनि गेठोयो, ‘मीराई याकुइये याझोयो आव प्रार्ठना डोने ज़ीःम ङा टैःनेङाले, होकाम नो प्रार्ठना डोने ज़ीःम सोङलाका तयार झैने ङाले।’ जो प्रार्ठना डोने ज़ीःम मीराई याझोयो माङ्क।”59होकाम आवटं पनि स्यान्टैराई यागोहाइ टोबो नास्याव माटाये।60होकाम मुख्या सेवा डोने मीये याखार्ल च्याङसिडे येसुलाई ओपजोयो, “होकाम आवराई याडोसैसन्ज़्याव डोसलो ओजवाफ नङसं कडिज़ माले? आव मीराई नबिरोडलं यायोव जबाफ कडि?”61येसु गाइगुइ मालेडे कडि जबाफ पनि मायोवये। मुख्या सेवा डोने मीये फरि ओपजोयो, “होकाम नङ चोखो परमेस्वरलो ओज़ा ख्रीस्ट रो?”62येसुये हैओवारो, “अँ ङाज़, होकाम जे मानवालो ओज़ालाई स्यान्टैराई भन्डा चोखो परमेस्वरलो ओसक्तिसं वोःरडेङा उकुइ लेवडे चुङडे नम्टा बाडलटं ओराज़्याव रःङने जेले।”63होकाम मुख्या सेवा डोने मीये ओक्वा चिडे हैओवारो, “गेलाई उरु साचीरं कडाने ओचाहिवडं?”64परमेस्वरलाई बिरोड ओडोज़्यावके जेठैखेसानि ड। जे जिबिचार कडि लिज़्या?
होकाम नो स्यान्टैराई येसुलाई अपराडी ठहरैडे सैःने समंका सजै याने याठहरोयो।65कोइ कोइराई येसुलाई यात्युलो, होकाम कोइराई येसुलाई ओङा लुःमडे ऐ वार्डे यागिल्लैयो, “अगमबानी गपाङ्ङनके नङलाई काङ्काये ओपोःसोनो।” होकाम सिफाइँराई येसुलाई याजिम्मालं रैडे घुस्सा घुस्साये याढिङ्गोयो।66पत्रुस मेलं ठारालं चुङडे उलिज़्याकं मुख्या सेवा डोने मीलो टोबो ओनौकर्नी होकं ओराव,67होकाम पत्रुसये मेः उमुन्सिज़्याकं होकं उलिज़्याव रःङडे हो मेमाये हैओडोव, “नङ पनि नासरतला येसुसं नलेवसानी।”68होकाम पत्रुसये ऐ लेडे ईन्कार ओडोव, “आव कै नवार्ज़्याव, न ङासंन न ङाबुझि।” होकाम नो पाखाडे पुलुने मुल झलालेवडे ओनाव। होकाम भाले ओकोव।69नौकर्नीये फरि पत्रुसलाई रःङडे होला च्याङसिव मीरंलाई हैओडोवरं, “नोरंलाम टोबो आव पनि होज़।”70पत्रुसये फरि ईन्कार ओडोव।
होकाम टढेसका आसै-होसै च्याङसिव मीराई पत्रुसलाई फरि यापजैरं, “डस्साज़ नङ पनि नोराईङाम टोबोज़ कडालेकं नङ पनि गालीलीज़।”71होकाम पत्रुसये ओललाई सरापिडे किऱ्या ज़्योडे हैओवारो, “जे काङ्कालो ओरोः जेडोज़्याव हो मीलाई ङा ङाम्सरे।”72होकाम होमान्त्राज़ नेकराङ भाले ओकोव, पत्रुसलाई येसुये हैओडोव रोः ओचेटोयो, “भाले नेकराङ कोँने भन्डा ङाःडे नङ ङालाई सोङखेप ईन्कार डोने नले।” होकाम नो रोःलाई चेटैडे पत्रुस ढर-ढर ओघोरो।
होकाम नो स्यान्टैराई येसुलाई अपराडी ठहरैडे सैःने समंका सजै याने याठहरोयो।65कोइ कोइराई येसुलाई यात्युलो, होकाम कोइराई येसुलाई ओङा लुःमडे ऐ वार्डे यागिल्लैयो, “अगमबानी गपाङ्ङनके नङलाई काङ्काये ओपोःसोनो।” होकाम सिफाइँराई येसुलाई याजिम्मालं रैडे घुस्सा घुस्साये याढिङ्गोयो।66पत्रुस मेलं ठारालं चुङडे उलिज़्याकं मुख्या सेवा डोने मीलो टोबो ओनौकर्नी होकं ओराव,67होकाम पत्रुसये मेः उमुन्सिज़्याकं होकं उलिज़्याव रःङडे हो मेमाये हैओडोव, “नङ पनि नासरतला येसुसं नलेवसानी।”68होकाम पत्रुसये ऐ लेडे ईन्कार ओडोव, “आव कै नवार्ज़्याव, न ङासंन न ङाबुझि।” होकाम नो पाखाडे पुलुने मुल झलालेवडे ओनाव। होकाम भाले ओकोव।69नौकर्नीये फरि पत्रुसलाई रःङडे होला च्याङसिव मीरंलाई हैओडोवरं, “नोरंलाम टोबो आव पनि होज़।”70पत्रुसये फरि ईन्कार ओडोव।
होकाम टढेसका आसै-होसै च्याङसिव मीराई पत्रुसलाई फरि यापजैरं, “डस्साज़ नङ पनि नोराईङाम टोबोज़ कडालेकं नङ पनि गालीलीज़।”71होकाम पत्रुसये ओललाई सरापिडे किऱ्या ज़्योडे हैओवारो, “जे काङ्कालो ओरोः जेडोज़्याव हो मीलाई ङा ङाम्सरे।”72होकाम होमान्त्राज़ नेकराङ भाले ओकोव, पत्रुसलाई येसुये हैओडोव रोः ओचेटोयो, “भाले नेकराङ कोँने भन्डा ङाःडे नङ ङालाई सोङखेप ईन्कार डोने नले।” होकाम नो रोःलाई चेटैडे पत्रुस ढर-ढर ओघोरो।
The Word for the World International