लुका3

1कैसर तिबेरियसये राज्य ओडोव पन्ड्र बर्स टाडे उलिज़्याव, नो बेलाकं पन्तियस पिलातस यहुडियाला हाकिम लेव। होबेलाकं हेरोड गालीलला सासंक लेव, होकाम होलो ओभाइ फिलिप इतुरिया सोनो त्राखोनितिसला सासंक लेव, होकाम लुसानियास अबिलेनेला सासंक लेव।2हन्नास सोनो कैयाफानि मुख्या सेवा डोने निलिज़्याव बेलाकं परमेस्वरलो ओपाङ कडिज़ मालेव बनलं जकरियालो ओज़ा युहन्ना लेवकं ओराव।3होये पाप छेमालो ओलागिटं पापलाम युङ सवोल्ने बप्तिस्मालो ओलागिटं यर्डन भै आसै होसैयालं स्यान्टैडे ऐ वार्डे प्रचार डाये-डाये ओराव, “जेपापलाम वोल्च्यो होसोनो बप्तिस्मा टाच्यो होकाम परमेस्वरये जेपाप छेमा डाड्यानेले।”4यसैया अगमबक्तालो ओपोस्टोकोटं एटाव बचन सर्सिवले,“कडिज़ मालेव बनलं टोबो किःनेलो ओगा,स्यान्टैराई भन्डा घ्योव प्रभुलो ओडोहा तयार झैडे नैच्यो,प्रभुलो ओयेम सिडा झैच्यो।5गैरारं स्यान्टै राल्सिनेले,होकाम स्यान्टै ढुरिरं सोनो डान्डारं बाङ टानेले,होकाम बाङग्याव टिङग्यावरं येमरं सिडा टानेलेरं,होसोनो अप्ठारो येमरं बाङ टानेलेरं,6होकाम स्यान्टै मीराई परमेस्वरये ओडोव छुट्कारा रःङनेलेरं।”
7हैजैडे बप्तिस्मा टाने वार्डे ओल लेवकं राव बनै भ्या मीरंलाई युहन्नाये हैओडोवरं, “ए गुललो ओज़ारं, डन्ड रारिज़्या वार्डे जेलाई ढोङने चेतावनी काङ्काये ओयाच्योव?8ऐटाव येःन डोच्यो जोटाम ठा ओटाकं जे जेपापलाम वोल्डेजेले वार्डे, होकाम जेज़ ‘अब्राहाम गेबाबु ची’ वार्डे हैटालेच्यो, कडालेकं ङा जेलाई हैङाडाच्योज़्या, परमेस्वरये आव लुङयालाम अब्राहामलो ओलागिटं सन्तान झैडुव।9आर्क सिङराई याजराटं रवाये पल्ने तयार टाडेले, हैजैडे चावसं मासैने स्यान्टै सिङरं पल्डे, मेःल ख्यासिनेले।”
10मीराई युहन्नालाई यापजोयो, “है टावसं आबो गे कैलेने?”
11नोये होरंलाई जबाफ ओयोवरं, “जोसं नेबऱ्याङ डौरा लिज़्या, होये मालेवलाई टोबो ओयोवकं, होकाम जोसं ज़्याने ज़्याव ले, होये पनि हैटावज़ ओडोवकं।”
12सिरमा डुप्नेरं पनि बप्तिस्मा टाने याराव, होकाम युहन्नालाई यापजोयो, “गुरबा, गे कै लेने?”
13नोये होरंलाई हैओडोवरं, “जे सिरमा खाडंङ टुकिसिव लिज़्या हाडङयाज़ डुप्च्यो होकाम भ्या टारैच्यो।”
14सिफाइँराई पनि यापजोयो, “गे कै लेने खेने?”
नोये होरंलाई हैओडोवरं, “काङ्कालाई पनि सोजोज़ आरोप लैडे असंतं अलाग्ड डाडे होसोनो मालेव डोस लैडे टालुटिच्यो। जे जेतनकाटं सोन्टोको टाच्यो।”
15होकाम मीराई ख्रीस्टलाई याकेनज़्याव बेलाकं स्यान्टैराई यायुङलं युहन्नालाई आवज़ मसिह टाके वार्डे बिचार याडोज़्याव,16होकाम युहन्नाये हो स्यान्टैरंलाई जबाफ ओयोवरं, “ङा जेलाई रीःये बप्तिस्मा ङायाच्यो, हैनि पनि ङा भन्डा बनै ओसक्ति लेव टोबो राज़्या, ङा होलो ओपनैलो ओटस्मा पलाने हाडङका पनि ङाम्ले। होये जेलाई चोखो आत्मा सोनो मेःये बप्तिस्मा यानेले।17च्याप्ने नाङ्गली होलो उकुइटंज़ले, हो नाङगलियेज़ ओल ओठाराला अन्न सफा झैनेले, होकाम पिमा ओढनसारलं डुप्नेले, हैनि पनि होये उपुललाई मासिने मेःलं ज़ाङनेले।”
18हैजैडे युहन्नाये उरु भ्या ग्यानला रोःरं सल्ला याडे मीरंलाई चाव सोर ओसोठोयोरं।19हैनि पनि हेरोड राजाये। ओभाइलो ओज्या हेरोडियासलाई रैडे माचाव येःन ओडोव कारनये युहन्नाये होलाई हक्लैडे ओनैज़्याव।20होकाम युहन्नालाई झ्यालखानालं ठुनिडे नोये माचाव येःन तर्ट झनज़ टोबो माचाव येःन ओठंपो।
21स्यान्टै मीरं बप्तिस्मा याटाव, होकाम येसुये पनि बप्तिस्मा टाडे प्रार्ठना ओडोज़्याव, होकाम नम ओफैसिव,22होकाम चोखो आत्मा परिवालो उरुपलं येसुलो ओक्याङटं ओराव। होकाम स्वर्गटाम टोबो ऐटाव गा ओठोयो, “नङ ङायुङ्का ङाज़ा ची, ङा नङसं बनै सोन्टोको ङाले।”
23येसु तीस बर्सका ओटावकाम सेवा डोने सुरु ओडोव। मीराई येसु के योसेफलो ओज़ा ची वार्डे हैडोरंये। योसेफ एलिलो ओज़ालेव,24एलि मत्तातलो ओज़ा, मत्तात लेबीलो, लेबी मल्कीलो ओज़ा, मल्की यान्नालो ओज़ा, यान्ना योसेफलो ओज़ा,25योसेफ मत्ताठियासलो ओज़ा, मत्ताठियास आमोसलो ओज़ा, आमोस नहुमलो ओज़ा, नहुम इसलीलो ओज़ा, इसली नग्गैलो ओज़ा,26नग्गै माठलो ओज़ा, माठ मत्ताठियासलो ओज़ा, मत्ताठियास सेमैनलो ओज़ा, सेमैन योसेखलो ओज़ा, योसेख योडालो ओज़ा,27योडा योआनंनलो ओज़ा, योआनंन रेसालो ओज़ा, रेसा यरुबाबेललो ओज़ा, यरुबाबेल सालतिएललो ओज़ा, सालतिएल नेरीलो ओज़ा,28नेरी मल्कीलो ओज़ा, मल्की अड्डीलो ओज़ा, अड्डी कोसामलो ओज़ा, कोसाम एलमाडमलो ओज़ा, एलमाडम एर्‌लो ओज़ा,29एर्‌ यहोसुलो ओज़ा, यहोसु एलिएजरलो ओज़ा, एलिएजर योरीमलो ओज़ा, योरीम मत्तातलो ओज़ा, मत्तात लेबीलो ओज़ा,30लेबी सिमियोनलो ओज़ा, सिमियोन यहुडालो ओज़ा, यहुडा योसेफलो ओज़ा, योसेफ योनानलो ओज़ा, योनान एल्याकीमलो ओज़ा,31एल्याकीम मलेआलो ओज़ा, मलेआ मिन्नालो ओज़ा, मिन्ना मत्ताठालो ओज़ा, मत्ताठा नातानलो ओज़ा, नातान डाउडलो ओज़ा,32डाउड यिसैलो ओज़ा, यिसै ओबेडलो ओज़ा, ओबेड बोअजलो ओज़ा, बोअज सल्मोनलो ओज़ा, सल्मोन नहसोनलो ओज़ा,33नहसोन अम्मीनाडाबलो ओज़ा, अम्मीनाडाब आरामलो ओज़ा, आराम हेस्रोनलो ओज़ा, हेस्रोन फारेसलो ओज़ा, फारेस यहुडालो ओज़ा,34यहुडा याकुबलो ओज़ा, याकुब इसहाकलो ओज़ा, इसहाक अब्राहामलो ओज़ा, अब्राहाम तेरहलो ओज़ा, तेरह नाहोरलो ओज़ा,35नाहोर सरुगलो ओज़ा, सरुग रउलो ओज़ा, रउ पेलेगलो ओज़ा, पेलेग एबेरलो ओज़ा, एबेर सेलहलो ओज़ा,36सेलह केनानलो ओज़ा, केनान अर्पछडलो ओज़ा अर्पछड सेमलो ओज़ा, सेम नोआलो ओज़ा, नोआ लेमेखलो ओज़ा,37लेमेख मतुसेलहलो ओज़ा, मतुसेलह हनोकलो ओज़ा, हनोक येरेडलो ओज़ा, येरेड महलालेललो ओज़ा, महलालेल केनानलो ओज़ा,38केनान एनोसलो ओज़ा, एनोस सेतलो ओज़ा, सेत आडमलो ओज़ा, आडम परमेस्वरलो ओज़ालेव।

The Word for the World International

https://app.library.bible/content/07333533b2c19da9