युहन्ना6
1येसुये आवरोः ओपाङो झिन्डे गालील, याडोज़्याव तिबेरियास समन्डर होपंटं ओनाव।2होकाम बनै भ्या मीराई टोबो यासमुह येसुलो उझिन्ट ओनाव, कडालेकं येसुये रोगीरंलाई ओससोमो चिन्नरं नोराई रःङडे यानैज़्याव।3येसु डान्डाटं ओनाव, होकाम उसिसरासं हो डान्डाटंज़ ओलेव।4यहुडीराई यापर्ब, निस्तार पर्ब नजिककंज़ राडे उलिज़्याव।5होकाम येसुये आडेहोडे ओरःङकं टोबो बनै घ्योव मीराई यासमुह ओल्लेवडे ओराज़्याव रःङडे फिलिपलाई हैओडोव, “आवरंलाई ज़्याव यानेरं लागिटं गे काङाम बरे लःङने?”6येसुये फिलिपलाई जान्चीनेलो लागिटं आव रोः हैओडोव, कडालेकं येसुये जो येःन ओडोरिज़्याव, हो येसुलाई ठा लेव।7फिलिपये येसुलाई जबाफ ओयोव, “स्यान्टैरंलाई टिगिडा-टिगिडा याडैनि पनि नेसै चान्डीलो पैसालो बरेये पनि नोरंलाई डुम्ने माले।”8येसुलो उसिसरं मड्यलाम टोबो, सिमोन पत्रुसलो ओभाइ अन्ड्रियासये हैओवारो,9“आकं टोबो छोऱ्या लिज़्या, नोसं चिकालो पाँस गोटा बरे सोनो नेबऱ्याङ ङाः लिज़्या। होकाम आढङ भ्याराई यालागिटं आडियाँ याज़ कडि डुमकेड?”10येसुये हैओवारो, “मीरंलाई चुङो गपंरिःङच्योरं के।” नो बाङलं बनै भ्या छि लेव। होकाम ठोकै पाँस हजारया खेपारं नलं याचुङो।11होकाम येसुये बरे रैडे, परमेस्वरलाई ढन्याबाड ओयोव झिन्डे चुङोरंलाई भाडे ओयोवरं, होकाम हैजैडेज़ ङाः पनि भाडे ओयोवरं। नोराई याज़्योडुने भरिज़ याज़्योव।12होकाम नोरं ज़्याडे यावाःङो, येसुये उसिसरंलाई हैओडोवरं, “येःलो कुत्रारं गुडुपच्योके, नो खेर टानाकं।”13ज़्यानेराई यासयःलो चिकालो नो पाँस गोटा बरेलो उकुत्रा नोराई याडुपो होकाम बारं फुङ्गा ओब्यालो।14आव कारनये येसुये ओडोव आव चिन्न रःङडे नो मीराई हैयावारो, “प्रिठीबीलं राने अगमबक्ता डस्साज़ येसुज़ ओलेव लेव।”15नोराई राडे येसुलाई जबरजस्ति लाङडे राजा झैने पान्ज़्यार वार्ने रोः ठा सन्डे येसु फरि ओबाठङ डान्डाटं ओनाव।16रिःम्डे ओटाव पाना येसुलो उसिसरं डहडे यानाव।17होकाम डोङ्गाटं पुलुडे नोरं समन्डर होपंटं कफर्नहुमडे यानाव। नो बेलाकं अन्ड्यारो टाडे उलिज़्याव, नो बेला समं येसु नोराई लेवकं ओमकेरिटाव।18होकाम घ्योव बतास उचलिवये, डहला रीःलो ओछल्का छल्किने ओपान्ज़्याव।19पाँस छ किलो मिटर डोङ्गा चलैडे यानाव झिन्डे नोराई येसुलाई डहला रीःतर्ट बाडे डोङ्गालो ओछ्योकं ओकेरिव यारोःङो, होकाम नोरं याछेव।20होकाम येसुये नोरंलाई हैओडोवरं, “ङा ची, टाछेच्यो।”21नोरं खुसि टाडे येसुलाई डोङ्गाटं यासुचुनो, होकाम नोरं यानाज़्याव पोडे डोङ्गा होपान्त्राज़ ओकेरिव।22समन्डर होपटा रहिव बनै भ्या मीराई ओपराटि नकं टोबोज़ाज़ डोङ्गा यारोःङो। नोरंलाई ठा लेव, येसु उसिसरासं डोङ्गाटं ओमनाव, बुरु येसुलो उसिसरंमान्त्रायाज़ यानाव।23होकाम प्रभुये ढन्याबाड याडे बरे ज़्योव ओयोवरं पोकं तिबेरियास ङाम उरु डोङ्गारं याकेराव।24येसु सोनो उसिसरं नलं यामलेव ठा सन्डे नो मीराई येसुलाई खिम्ने डोङ्गाटं पुलुडे कफर्नहुमडे यानाव।25नोराई येसुलाई डह होपंटं डैडे नोलाई यापजोयो, “रब्बी, नङ आकं खर्क नराव?”26येसुये नोरंलाई जबाफ याडे हैओडोवरं, “सत्य रोः ङा, जेलाई हैङाडाच्यो, जे चिन्नरं रःङडे, माङ्क बुरु जिफु टस्सि बरे जेज़्यावये ङालाई जिखिमसङज़्याव ची।27नास टाने ज़्यावलो लागिटं डुखं टाडाच्यो, बुरु खर्कज़ मासिने जीबन समं रहिने ज़्यावलो लागिटं डुखं डाच्यो, नो ज़्याव मानवालो ओज़ाये जेलाई याने ले। कडालेकं परमेस्वर बाबुये नोलो ओक्याङटं ओछाप लैडेनैड्योव।”28नोराई येसुलाई हैयाडोव, “परमेस्वरलो उयुङ्का येःन डानेलो लागिटं गे कडि डाव परिये?”29येसुये नोरंलाई हैओडोवरं, “परमेस्वरलो ओयेःन आवज़ जोलाई होये उपरिःङो होलाई बिस्वास डाच्यो।”30आव कारनये नोराई येसुलाई हैयाडोव, “नङ कडि चिन्न नसंटन, हो गेरःङ, होकाम नङलाई बिस्वास गेडान? खै नङ कडि येःन नोडो?31गे गिज्यु-ज्यु बाज्युराई मरुभुमिलं मन्न याज़्योव, एटाव सर्सिवले, ‘परमेस्वरये नोरंलाई ज़्यानेलो लागिटं स्वर्गटाम बरे ओयोवरं।’”32येसुये नोरंलाई हैओडोवरं, “सत्य रोः, ङा जेलाई हैङाडाच्यो, जेलाई स्वर्गटाम बरे याने मोसा माङ्क, बुरु स्वर्गटाम जेलाई सड्डेका बरे याने ङाबाबु ची।33कडालेकं परमेस्वरलो ओबरे नोज़, जो स्वर्गटाम झरिडे राये, होकाम प्रिठीबीलाई जीबन योवये।”34नोराई येसुलाई हैयाडोव, “प्रभु, आव बरे गेलाई एकसप्ड्याज़ यासि।”35येसुये नोरंलाई हैओडोवरं, “जीबन याने बरे ङाज़। ङा लेवकं राने करेने माले, होसोनो ङालाई बिस्वास डाने खर्कज़ रीः छोने माले।36बुरु ङा जेलाई हैडाडेङानैच्यो, जे ङालाई रःङडे पनि बिस्वास जेमडाङये।37बाबुये ङालाई ओयाङोरं भरि स्यान्टै ङा लेवकं रानेलेरं, होकाम ङा लेवकं रानेरंलाई ङा ओजमाज़ राःने ङामलेरं।38ङा स्वर्गटाम झरिडे ङाइछ्या पुरा झैने ङाराव माङ्क, बुरु ङालाई परिःङनेलो उइछ्या पुरा झैने ङाराव ची।39होसोनो ङालाई परिःङनेलो उइछ्या आवज़, नोये ङालाई ओयाङो भरिरंलाई काङ्कालाई पनि ङा गोमैने टाटाकं, बुरु नोरंलाई आखिरला डिनलं ज्युङडा झोयो ङाढुकं।40कडालेकं ङाबाबुलो उइछ्या आवज़, ओज़ालाई रःङने सोनो नोलाई बिस्वास डाने स्यान्टैये खर्कज़ मासिने जीबन ओडैरंकं, होकाम ङा नोलाई आखिरला डिनलं ज्युङडा झैनेङाले।”41यहुडीरं येसुलो उबिरोडलं गनगन यालेव, कडालेकं येसुये हैओवारो, “स्वर्गटाम झरिडे राव बरे ङाज़।”42नोराई हैयावारो, “आव योसेफलो ओज़ा येसु माङ्क? आवलो ओबाबु सोनो वामालाई गे गेमसरेये डोरो? आर्क आवये कैजैडे ‘स्वर्गटाम झरिडे ङाराव ची वार्डे हैओवार्ज़्याव?’”43येसुये नोरंलाई हैओडोवरं, “जे-जेज़ गनगन टालेच्यो।44ङालाई परिःङने बाबुये ङालेवङं राने युङ मायोवरंखे भने काङ्का पनि ङा लेवकं माराडु, होकाम ङा लेवङ रानेरंलाई आखिरला डिनलं ज्युङडा झैनेरं ङाले।45‘होकाम नो स्यान्टैरं परमेस्वरसं पैसिने लेरं वार्डे अगमबक्ताराई यापोस्टोकोटं सर्सिवले।’ जो बाबुलो उसिछ्या ठैडे पैसिये नो ङा लेवकं राःये।46बाबुलाई काङ्काये पनि ओरोःङो माले, जो परमेस्वरङाम रावले, होये मान्त्रा बाबुलाई ओरोःङोले।47जेलाई ङा सत्य रोः हैङाडाच्यो, जोये बिस्वास डोवये नोसं खर्कज़ मासिने जीबन ले।48जीबन याने बरे ङाज़।49जेसाखा पुर्खाराई मरुभुमिलं मन्न याज़्योरं, होटानि पनि नोरं सिडे यानारं।50स्वर्गटाम झरिडे राने बरे आवज़, जोये आव ज़्योव हो सिने माले।51स्वर्गटाम झरिडे राःव ज्युङडा बरे ङाज़। कोइये आव बरे याज़्योव भने नो खर्कज़ सिने माले। होकाम ङा प्रिठीबीलाई याने ङावार्ज़्याव बरे, ङाक्याङज़, ऐझैडे प्रिठीबीये जीबन गोडोयोकं वार्डे ङा ङाक्याङ यानेङाले।”52होकाम यहुडीरं या-याज़ छलफल याडोव, “आव मीये कैजैडे ओक्याङ गेलाई ज़्याव यासिढुव?”53येसुये नोरंलाई हैओडोवरं, “डस्साज़ ङा जेलाई हैङाडाच्यो, जे मानवालो ओज़ालो ओक्याङ जेमज़्याखे भने होसोनो नोलो ओक्याङटा झी जेमओँखे भने, जे खर्कज़ मासिने जीबन डैने जेमले।54ङाक्याङ ज़्योने सोनो ङाक्याङटा झी ओँनेसं खर्कज़ मासिने जीबन ले, होकाम ङा नोलाई आखिरला डिनलं ज्युङडा झैनेङाले।55कडालेकं ङाक्याङ डस्साज़ ज़्याने ज़्याव ज़, होसोनो ङाक्याङटा झी डस्साज़ ओँने बस्तज़।56ङाक्याङ ज़्याने, सोनो ङाक्याङटा झी ओँने ङासं टानेले, होकाम ङा नोसं टानेङाले।57जोझैडे बाबुये ङालाई उपरिःङसोङो, होकाम ङाबाबुये ओडोव कारनये ङा ङाबान्चि, हैजैडेज़ ङालाई ज़्याने पनि ङा ङाकारनये बान्चिनेले।58स्वर्गटाम राव बरे नेटाव माङ्कची, नो गेसाखा पुर्खाराई याज़्योनि पनि सिडे यानारं। आव बरे ज़्याने मी एकसप्ड्या बान्चिनेले।”59येसुये आव रोः कफर्नहुमला यहुडीरं डुप्सिने ज़ीःमलं सिछ्या ओयोरंकं हैओडोवरं ची।60आव रोः ठैडे येसुलो उसिसरंकाम भ्याये हैयावारो, “आव बचनके बनै कर्रा ची लिज़्या, काङ्काये आव बचन ठैडुव ड?”61होकाम येसुलो उसिसरं आव बारेलं गन-गन वार्ज़्यारं वार्ने सन्डे येसुये नोरंलाई हैओडोवरं, “होकाम आवरोः जेलागिटं बनै कर्रा ओटाज़्याव रो?62जे मानवालो ओज़ालाई ङाःडे जोङ लेव होङ उपुलुज़्याव जेरःङखे भने कै नि?63जीबन यानेके आत्मा ची, क्याङलो सक्तिके कडिज़ माङ्कची। जो बचन ङा जेसं ङापाङो, नो जीबन सोनो आत्मा ज़।64बुरु जेमड्यलाम कोइ-कोइरं लिज़्यारं, जोराई ङालाई बिस्वास माडाङरंये।” कडालेकं बिस्वास माडोनेरं काङ्का-काङ्कारं, होसोनो येसुलाई ढोका याने काङ्का टानेले वार्ने येसुलाई ङाडेङामज़ ठा लेव।65होकाम येसुये हैओडोवरं, “ऐझैडेज़ ङा जेलाई हैङाडाच्योव ची, ‘होकाम बाबु लेवङाम मायासिव यालेखे भने काङ्का मी पनि ङा लेवकं माराडु।’”66आव रोः याठोयो झिन्डे येसुलो उसिसरंकाम भ्यारं यावोलो, होकाम येसुसं बोलोङ बाने याराःव।67येसुये बारं जनारंलाई हैओडोवरं, “कडा जे पनि ङालाई राःडे जेना रो?”68सिमोन पत्रुसये जबाफ ओयोव, “ए प्रभु गे काङ्का लेवकं नाने? नङसंके खर्कज़ मासिने जीबनलो बचन लिज़्या69नो गे बिस्वास डाडेगेनै, होसोनो सन्डेगेनै, नङ परमेस्वरलो चोखो मीज़।”70येसुये नोरंलाई जबाफ ओयोवरं, “कडा ङाज़ जे बारं जनारंलाई ङारुजिच्योव माङ्क डोरो? होसोनो जे काम टोबोके सैतान ची।”71आव रोः येसुये सिमोन इस्करियोतलो ओज़ा यहुडालो ओबारेलं हैओवारो, कडालेकं बारं जनारंलाम टोबो टाडे पनि नोये येसुलाई ढोका याने ओपान्ज़्याव।
The Word for the World International