युहन्ना14
1“जे जियुङ हरेस टासटेच्यो। जे परमेस्वरलाई बिस्वास जेडाये, ङालाई पनि बिस्वास डाङच्यो।2ङाबाबुलो उज़ीःमङ मी लेने पो बनै भ्या ले। हैटाव भ्या पो ओम्लेखिन, ङा जेलाई हैङामडाच्यो हो, ङा जेलागिटं पो तयार झैने ङानारिज़्या।3होकाम नाडे ङा जेलागिटं पो तयार ङाजोयोपाना ङा फरि रानेङाले, होकाम जेलाई ङासं लाङनेङाले, होसोनो ङा जोङ ङाले, जे पनि होङ लेनेजेले।4जोङ ङा ङानारिज़्या, जे होङ नाने येम जेसनये।”5ठोमाये येसुलाई हैओडोव, “ए प्रभु, नङ कान्डे ननारिज़्याव, गे गेम्सन, होकाम गे कैजैडे येम गेटंकं?”6येसुये नोलाई हैओडोव, “सत्य, येम सोनो जीबन ङाज़ ची। काङ्का पनि उरु काङाम बाबु लेवकं माराडु।7जे ङालाई जेसरेसङखिन्के, ङाबाबुलाई पनि सरेने जेलेव। आबोकाम के ङाबाबुलाई पनि जेसरे, होसोनो होलाई पनि रःङडेजेनै।”8फिलिपये येसुलाई हैओडोव, “ए प्रभु, गेलाई बाबु सटन्ड्यासि। आडङ ओटाखिन्के गेलाई टा।”9येसुये नोलाई हैओडोव, “फिलिप, भ्या डिन समं ङा जेसं ङालिज़्या, होटानि पनि नङ ङालाई नमसरेसङये? जोये ङालाई रःङडेनैसोङो, होये बाबुलाई पनि रःङडे नोयो। नङ कैजैडे हैनवार्ज़्याव, ‘गेलाई बाबु सटन्ड्यासि वार्डे?’10ङा बाबुसं ङाले होसोनो बाबु ङासं ले बाबु सोनो ङा टोबोज़ वार्डे नङ कडा बिस्वास नम्डो? जो रोः ङा जेलाई हैङाडाच्यो, नो ङाअडिकारये ङापाङज़्याव माङ्क बुरु ङासं बास डोज़्याव बाबुये ओयेःन डोवये।11ङा बाबुसं ङाले, होसोनो बाबु ङासं ले वार्डे ङापाङो रोःटं बिस्वास डाङच्यो। है ओमटानि पनि आव ङा ङाडोव येःनरं रःङडे बिस्वास डाच्यो।”12“डस्साज़, ङा जेलाई हैङाडाच्यो, जोये ङालाई बिस्वास डाङो, होये ङाडोव येःन पनि डानेले, होसोनो नो भन्डा घ्योव येःन पनि डानेले, कडालेकं ङा बाबु लेवडे ङानारिज़्या।13जे ङामिनङाम जोज़ जिनिःनि पनि ङा ङाडोव येःनटाम बाबुलो ओमहिमा गटाकं वार्डे ङा ओज़ाये नो डानेङाले।14जे ङामिनङाम जो बस्त जिनिःनि पनि ङा नो डाड्यानेङाले।”15जे ङालाई मया जेडाङखे भने ङाआग्यारं मानिनेजेले।16होकाम ङा बाबुसं बिन्ती डानेङाले, होकाम बाबुये जेलाई गैने टोबो छुटंलाई परिःङनेले, होसोनो नो जेसं एकसप्ड्याज़ लेने ले।17आव सत्यला आत्मा ची, जोलाई प्रिठीबीये ग्रहन माडोडुव, कडालेकं प्रिठीबीये नोलाई न रोःङो न सरेवये। जे नोलाई जेसरेये, कडालेकं नो जेसं बास डोवये, होसोनो नो जियुङलं बास डानेले।18“ङा जेलाई टुहुरा राःने ङाम्ले। ङा जे लेवकं रानेङाले।19आबो जामाका प्रिठीबीये ङालाई रःङने माले, हैटानि पनि जे ङालाई रःङनेजेले। ङा ज्युङडा ङालेवये, जे पनि ज्युङडा लेनेजेले।20नो छ्याम जे सन्नेजेले, ङा ङाबाबुसं, जे ङासं, होसोनो ङा जेसं ङालिज़्या गे टोबोरंज़।21ङालाई मया डाने नोज़ जोसं ङाआग्या लिज़्या होकाम नोये नो मानिवये। होसोनो ङालाई मया डानेलाई ङाबाबुये मया डोवये। ङा नोलाई मया डानेङाले, होसोनो ङा ङालाईज़ नो लेवकं सतन्नेङाले।”22यहुडा इस्करियोत के माङ्क छुटं यहुडाये येसुलाई हैओडोव, “प्रभु, नङ कैनवार्ज़्याव, नङ नङलाईज़ गेलेवटं नसंटन, होसोनो प्रिठीबीलाई के माङ्क?”23येसुये नोलाई जबाफ याडे हैओडोव, “जोये ङालाई मया डाङो, नोये ङाबचन पनि मानिनेले, होसोनो ङाबाबुये नोलाई मया डानेले, होकाम गे नो लेवकं राने गेले, होसोनो नोसं बासिनेगेले।24ङालाई मया माडानेये ङाबचन पनि मामानिवये। जो बचन जे जेठैज़्या, नो ङाबचन माङ्क, नो ङालाई परिःङने ङाबाबुलो ची।”25“आव रोः ङा जेसं ङालिज़्याकंज़ ङा जेलाई हैङाडाच्यो।26गैने चोखो आत्मा, जोलाई बाबुये ङामिनङाम परिःङनेले, नोये जेलाई स्यान्टै रोः पैनेले, होसोनो ङा जेलाई हैङाडाच्योव स्यान्टै रोः जेलाई सम्झैनेले।27सान्ति ङा जेसं ङाख्यानै। ङा ङासान्ति जेलाई ङायाच्यो। प्रिठीबीये ओयाच्योव स्याव ङा जेलाई ङामयाच्योव। जियुङ डुखि टाटाकं होसोनो टाछेच्यो।”28“ङा आलाम ‘ङानारिज़्या, होकाम फरि जेलेवकं वोल्डे जेलेवकं रानेङाले’ वार्डे हैङावारो रोः के जे ठैडेज़ जेनै। जे ङालाई मया जेडाङो टावसं ङाबाबु लेवकं ङानारिज़्या ङावार्ज़्याव ठैडे जे जेरेङखे हो, कडालेकं बाबु ङा भन्डा घ्योव ले।29आबो आव टाने भन्डा ङाडेज़ ङा जेलाई हैडाडे ङानैच्योव, जोकं आव टा जे बिस्वास डाच्यो।30आबो ङा जेसं भ्या पाङने ङाम्ले, कडालेकं आव प्रिठीबीला सासंक रारिज़्या। ङालाई नोलो ओसक्तिये कैज़ माजैसङढुव।31हैटानि पनि ङा बाबुलाई मया ङाडोये, बाबुये ङालाई जोस्याव अरैडे नैसोङो होस्याव ङाडो वार्डे प्रिठीबीये ओसोनोकं।
गच्याङसिच्योके गे आलाम गेनाके।”
गच्याङसिच्योके गे आलाम गेनाके।”
The Word for the World International