फिलेमोन1

1येशु ख्रीस्टल कैदी पावल सनर गे भाई तिमोथीङन, सनर गेसकाए काम ढान्यावाला न्हाए फिलेमोन।2गे बैना अप्फिया सनर गे न्हाए सिपाइ अर्खिप्पस, ओटन नझिमला मन्डलीयाङजन3गे बौ परमेस्वर सनर प्रभु येशु ख्रीस्टङन जेजन अनुग्रह ओटन शान्ति!
4ङा भाई फिलेमोन जब ङा प्रार्थनात नङजन यिङन तब ङा ङामि परमेस्वरजन सदाई धन्याबाद योंङा,5दानाङभन्या प्रभु येशुता न बिस्वासलं बारेल सनर बिस्वासीयाङत नढान्या प्रेमल बारेङन जब ङा थटङ,6तब ङा प्रार्थना ढोङा कि न बिस्वासलं सहभागिताले ख्रीस्टतं लेन्या गेमि सोगलै चान्या छेनल ग्यानत बदिऊ ग्याढुदुनत्या।7ऐ ङा भाई, न प्रेमङन ङा तबर खुशी सनर उत्साह डोएस्यु लेङा, दानाङभन्या नङ्ङन परमेस्वरलं रुयाङल यिङ फरि आनन्दले भरिसिस्यु ताजा ताइस्यु लेया।
8नङ नै ढाऔपरिन्या हो, नका आग्या ख्रीस्टङन यांन्या ङामि हिकमत लेकन बै,9ङा छोपा पावल येशु ख्रीस्टल तोलोअ कैदी, आकअ बरु प्रेमल नाल्ट ङा नङजन बिन्ति ढाऔ ङारोअङु,10ङा ङाज़ा ओनेसिमसलं नाल्ट बिन्ति ढाना, जोल नाल्ट ङा कैदल ङालज्याऔक आत्मिक बौ ताइस्यु ङाल्ङु।11नका पैला न नाल्ट बिकामला लेऊ, तर आकअ न नाल्ट सनर ङा नाल्ट काम लागिन्या ताइस्यु लेया।12जो ङा यिङलाई टुक्रा हो, ङा नाजन नल्योङ होलस्यु ङापरिङज्याङु।13नाजन ङासैज नाएन्या खुशी ङाल्ङु, दानाङभन्या चान्याथाईल नाल्ट बन्दी ङाताइज्याऊ बेलाक न पालोल नकाले ङा सेवा ढाऔ आढुदुऊ,14तर न अनुमति बिना ङा नैज माढोङदी, ताकि न भलाईल नाल्ट करले ढासिन्या ताटाइत्या, तर नङ नइच्छ्याले नढान्या ग्याताइत्या।15सक्या नङतन ओनेसिमस थोरै समायल नाल्ट अलक ताइस्यु लेऊ, कि नका सदाईल नाल्ट नङसं चुङौ ग्याडोटौत्या।16आबकन नोक्करमन माङडी, तर नोक्करतन भ्या, न्हाए भाईमन्जै, खासगरि ङा नाल्ट, तर झन भ्याई बुलत सनर प्रभुत समेत, न नाल्ट बै।
17नैताइस्यु यदि नङ नङ मन्जै ङाजन यिङ्ङकन नकाजन ङामन्जै सुइकार ढोते।18यदि नकाले नङजन कोबाअ माचान्या ढास्युलेकन बै, अथाबा कोबाअ छेनत नका रिनी लेकन, ना ङा हिसापत नाएस्याङते।19ङा पावल, ङा कुईलेई ईका सरज्याङा। ना रिंन ङाईज फोअङा। नङजन पानस्याज्यान्या माताइदी होला, कि ङा नाल्ट बै नङ ङामि रिनी लेना।20ऐ भाई, नल्योङन प्रभुत कोबाअ फाइदा ग्याडोटङत्या ऐलेऊ ङारोअङु। ख्रीस्टतं ङायिङजन फरि खुशी जाएस्याङते।21न आग्या पालनत भरोसा नाएस्यु ङा ङानीन्यातन झन भ्याई ढान्यालेना ऐलेन्या यिङस्यु ङा नङजन ईका ङासरस्याज्यानु।22ओटन ङा नाल्ट तोलोअ चुङन्या पाहुना-कोठा तयार जाएस्यु नाएस्याङ, दानाङभन्या न प्रार्थनाले ङा बै नल्योङ रांऔ ङाडोएङुसन ऐलेन्या परमेस्वरतं आस ढोङा।
23येशु ख्रीस्टतं ङा न्हाए कैदी इपाफ्रासले नङजन अभिबादन परिङस्यु लेया।24नामन्जै ङाजन व्एन्या मर्कुसं, अरिस्तार्खस, डेमास सनर लूकाले बै।25प्रभु येशु ख्रीस्टल अनुग्रह जेमि आत्मात ग्यालिज्यात्या।

The Word for the World International

https://app.library.bible/content/7419936309e4d0c7