प्रेरित2

1जब पेन्तिकोसलं दिन रांऔ, तब नका सोगल बिस्वासीयाङ तपोईल दुउसिस्यु लेवाङ।2ओटन स्वर्गङन झुकाउन्या घिन्या आन्ढील मुल्का मनताइन्या तोलोअ ग़ा रांऔ, ओटन नकाङ राचुङज्यान्या सोगलै झिमभरि थहौ।3मील ल्हे मनताइन्या नकाङल्योङ रंनौ, ओटन भाअ भाअ ताइस्यु नकाङ सोगलैलयर्त चुङवाङ।4ओटन नकाङ सोगलै पबित्र आत्माले भरिसिवाङ, ओटन पबित्र आत्माले नकाङजन आयांन्या अनुसार नकाङ अपुर छिन्ङन छ्योङौ तअसिवाङ।5स्वर्गल बाङल लेन्या सोगल देसलन ईस्वरभक्त यहूदीयाङ नका बेला यरुशलेमल लेवाङ।6तब ईका ग़ा थएस्यु तबर रुयाङ दुउसिवाङ। ओटन नकाङ छक्कै ताइवाङ, दानाङभन्या सोगलैले रारां छेनत रांछ्योङज्यान्या राथटौ।7नकाङ सोगलै हलाअ ताइवाङ, ओटन अचम्म मानिस्यु ऐलेऊ तअसिवाङ “नैति आका छ्योङन्याङ सोगलै गालीललाङ माङडीका?8तब नकाङै ऐलेवाङ, कढाई सोगलैले गे छिन्ङन रांछ्योङन्या गेथएयिउ?9गे इल पार्थियाङ, मादीयाङ सनर एलामीयाङ ओटन मेसोपोटामियालाङ, यहूदियालाङ, कापाडोकियालाङ, पोन्टस सनर एशियाला बासिन्दाङ लिज्याया।10ओटन फ्रिगिया, पामफिलिया, मिस्र सनर कुरेनील परिन्या लिबियाला ख्वाएयाए पो ज्युउल सनर रोमङन रांन्या यहूदी सनर यहूदीमत मानिन्याङ नेंलोअ गेलेयिउ,11क्रेटला बासिन्दाङ सनर अरबीयाङ बै गेलेयिउ, ओटन गे गेछेनङन परमेस्वरलं महान कामयाङल चर्चा नकाङ राढाज्यान्या गेथएज्यायिउ।”12नकाङ सोगलै अचम्मै ताइवाङ ओटन अक्कमक्क परीस्यु तोलोअले तोलोअजन ऐढाऔ तअसिवाङ “ईकालं अर्थ नैति?”
13तर अपुऱ्याङै ऐलेस्यु रा:साई जाएस्यु ऐलेवाङ, “नका बिस्वासीयाङ छार रक्सिले मंङस्यु लेरा।”
14तर पत्रुसले एघार सिइयाङस च्याङस्यु घिन्या ग़ाले हुलयाङजन ऐआढोवाङ, ऐ यहूदियाला रुयाङ, सनर यरुशलेमला सोगलै चुङन्याङ जेजन ईका छेन थाह ग्याताइत्या, नैताइस्यु ङा छेन थएचिते।15दानाङभन्या जे जेलेऊकामन आकाङ मामङज्यारदी, दानाङभन्या आकअ छकाल्याका नौ याएज बजिस्यु लेया।16तर योएल अगमबक्ताङन पान्सिन्या छेन आकाई ज्या,17आसापटा दिनयाङल ऐटाइन्या लेया ओमनलेस्यु परमेस्वरले ऐलेऊ,ङा सोगल रुयाङत ङाआत्मा नाएङा,ओटन जेमि ल्हेपाज़ायाङ, सनर जे मेएमा ज़ायाङै भबिस्यबानी छ्योङन्या लेरा,ओटन जे जवानयाङै दर्शन रङन्या लेरा,ओटन जे सेरयाङ मङ दर्शन रङन्या लेरा।18औ, ङा ङानोक्कर नोक्करनियाङ यर्त ना दिनल ङाआत्मा झोअस्योङरा,ओटन नकाङ भबिस्यबानी छ्योङरा।19ङा हर्त नमत अचम्मला कामसनर वान्ल पिरथ्बील अचम्मला कामयाङ ठनन्या लेङा,अथाबा जी, मी सनर मीकुईल मुल्का।20परमप्रभुल महानतासनर गौरबला दिन आरांऔ हादेए नम्युउ चिऊन्यालसनर ह्यावए जीत फिरिसिन्या लेया।21ओटन जोले प्रभुल मिन पुकारिऊ,नकाले उद्दार डोएवा।
22“ऐ, इस्राएलला रुयाङ आका छेन थएचिते, नासरतला येशु तोलोअ ऐटाइन्या रु हो, जोले जे खार्ल सक्तिशाली कामयाङ सनर अचम्मला काम ढास्यु जे सामन्दी प्रमानित आजाटौ। जेजन थाहै लेया कि आका कामयाङ परमेस्वरले येशुङन आढोव।23आमिई योजना अनुसार परमेस्वरले पैलाई पक्का आठहराइन्या नकाई येशुजन पापी रुयाङ कुईत आसुम्पिऊ, जोजन जे क्रूसतं केप्स्यु जेसएचिऊ।24दानाङभन्या परमेस्वरले सिइकालला हूरतन छुटकारा यांस्यु जिङदा आजाटौ। दानाङभन्या ओलं सिइकालल न्युउल लिज्यान्या असम्भब लेऊ।25दानाङभन्या दाऊदले येशुल बारेल ऐलेया, ‘ङा प्रभुजन सदाई ङासामन्डी ङारङ्ङु, दानाङभन्या अलमल ताटाहङत्या लेस्यु ओ ङा दाइन्याङन लिज्याया।’”26नैताइस्यु ङामि यिङ हेसाङाओटन ङामि याह् आनन्दस छ्योङा।नैताइस्यु ङा बुल बैआसतं बान्चिन्या लेया।27दानाङभन्या नङ ङा परानजन पतालल राइन्यामालेन्दी,न त नङ नमी पबित्रजनल बुल चिऊयोन।28नङ ङाजन ङाजिबनला यमयाङ नपानस्याङनु,नङ ङाजन नल्योङन शान्ति सनर आनन्दले परिपुर्न जातङना।
29ऐ इस्राएली भाईबैनाङ, गेमि पुर्खा रय दाऊदल बारेल ङा जेजन प्रस्टै पानौ ढुदुङा, कि ओ सिऊ ओटन री:नसिऊ, ओटन आछिमका दिन समन ओलं ऊई ऐलिजिया।30नैताइस्यु दाऊद तोलोअ अगमबक्ता आताहौकाले, नाले सनस्युआनाटौ कि परमेस्वरले बाचा ढास्यु लेऊ, कि आमिई सन्तानङन परमेस्वरले दाऊदजन आसिहासनतं आसुचुनौ।31आका रांन्या छेन रङस्युओले ख्रीस्टल पुनरुत्थानल बारेल आपानौ,कि ओजन सिन्याङल राज्यल माबनाएसिदा न ओलं बुल अलक रङस्यु।
32परमेस्वरले आकाई येशुजन जिङदा आजाटौ, ओटन ईका छेनल गे सोगलै साची लेया।33नका परमेस्वरलं दाइन्या कुईत महिमित ताइस्यु ओले बौङन बाचा ढासिन्या पबित्र आत्मा आडोटौ, ओटन आकअ जे जेरङज्यान्या सनर जेथएज्यान्या छेन बाहेरत आथनौ।34दानाङभन्या दाऊद ता स्वर्गत मावूम्दा, तर ओले ओलजै ऐलेऊ,परमप्रभुले ङामि प्रभुजन ऐआढोव,नङ ङामि दाइन्या कुईङन चुङनते,
35जब समन ङा जे शत्तुरयाङजन जे खङ न्युउ माजातङर।
36“नैताइस्यु इस्राएललं सोगलै जाहानले ईका पक्का सकाए ग्यासनरत्या, कि जो येशुजन जे क्रूसतं जेकेपचिऊ, परमेस्वरले ओजन प्रभु सनर ख्रीस्ट आजाटौ।”
37आका छेन थएस्यु नकाङल यिङ चहचह ताहौ, ओटन पत्रुस सनर अपुर प्रेरितयाङजन नकाङै ऐराढोव, “ऐ भाईबैनाङ, गे कैलेन्या ताहौ?”
38पत्रुसले नकाङजन आढोवाङ, “पस्चाताप ढोचिते, ओटन जे पाप छेमाल नाल्ट येशु ख्रीस्टल मिनङन जे सोगलैले बप्तिस्मा होन्चिते, ओटन जे पबित्र आत्माल बरदान डोएच्या।39दानाङभन्या ईका बाचा जे नाल्ट, जे सन्तानल नाल्ट, सनर लोए-लोएङा लिज्यान्याङ सोगलै नाल्ट हो, सोगलै जोजन प्रभु गेमि परमेस्वरले खुलौरा।”
40पत्रुसले नकाङजन अर्थ आयोवाङ, ओटन अपुर तबर छेनयाङ्ङन चेताउनी आयोवाङ, “ईका पापी रुयाङत रांन्या सजायतन जे जोगाइसिच्यो ऐआढोवाङ।”41तब जोजोले पत्रुसलं छेन ग्रहन ढास्यु नकाङै बप्तिस्मा राहोनौ, ओटन नकाई दिनछिम छ्योअ तिन हजार रुयाङ बगालल चैइसिवाङ।
42ओटन नकाङ प्रेरितयाङल सिक्छ्या डोटौ नाल्ट सङ्गति ढान्या सनर भरेई कलाएन्या ओटन प्रार्थनाल भक्तिसकाए लागिज्यावाङ।
43ओटन सोगलैल यिङल छ्याइ पसिऊ, ओटन प्रेरितयाङ्ङन भ्याई घिन्या अचम्मला कामयाङ सनर भ्या अचम्मला कामयाङ ताइवाङ।44ओटन सोगलै बिस्वासीयाङ बोलोङ चुङस्यु, नकाङ सोगलै जन्तु सअतन लेऊ।45नकाङै रांमि येङखेए सनर धनसम्पत यएस्यु जोजन जो जन्तुल अभाब परिऊ, नका ओयाङ सोगलैजन भाअस्यान्या रांढोव।46ओटन नकाङ तोलोअ यिङला ताइस्यु यरुशलेम मन्दिरलं तचोएकै दुउसिरा ओटन झिम-झिमल भरेई कलाएरा, ओटन नकाङ खुशी सकाए चोखा यिङले मिलिस्यु ज्योरा,47ओटन परमेस्वरलं प्रसम्सा ढाऔयन, सनर सोगलै बिस्वासीयाङ चान्या मौका डोएस्यु चुङरा। उद्दार डोएन्याङजन प्रभुले दिनकाई नकाङल बगालत आचैस्योवाङ।

The Word for the World International

https://app.library.bible/content/7419936309e4d0c7