SUNAPULA15kij_png

Mosese kala wosi

1Tuta baisa Mosese deli mina Isireli iwosisi mapilana wosi baisa Guyau, kawasi.
“Bawosi baisa Guyau, paila matauna la tomgwaga saina kabokatubau.Paila bogwa ikatudoum tomota deli si wosa olumoulela bolita.2Guyau matauna agu tokwala topeula wala.Matauwena wala eikatumovaigu.Matauna goli ulo Yaubada, e bayakawoli matauna.E matauna tamagu la Yaubada, e bawosi paila matauna Tovakaigaga.3Guyau matauna kumatoula.Matauna goli yagala Guyau.
4“E mina Itipita si tokwabilia deli si waga kaibibiu eilavi ilosi olumoulela bolita.Dabala si wota eidoumsi oBolita Pilabweyani.5Tulubwabwau ikuboli matausina,e isabwabulasi isalilisi watanawa makawala dakuna.
6“E Guyau, yamam kweyakakata saina kweyapapeula, e itutuvakau nanogu.Lokukwatudoum matausina tilaula.7Kutomgwaga odubasi kam tilaula, e yoku goli giyouveka.Kam leiya ilululu saina nanakwa igibumkulovi matausina,makawala kovasupa nanakwa bigabu susupa.8Kuyuvisau bolita e sopi ila walakaiwa.Sopi ivigaki papala makawala kali,e sopi olopola bolita imili dakuna.9Tilaula matausina ikaibigasi kawasi, ‘Babokavili ayosi matausina.Bogwa bavili si veiguwa e bakau komwaidona avaka magigu.Babiigili ulo puluta e bakau komwaidona avaka avaka iyosisi.’10Mitaga ka, Guyau - sivatala wala kuyagisa, e mina Itipita ikanopulasi.Isalilisi makawala tanumnumta ilosi olopola bolita katuposilagi.
11“Mwa, Guyau! Avai yaubada isisu makawala yoku?Availa goli makawala yoku Tobumaboma deli Towalakaiwa?Availaga gagabila bivagi kabutuvatusi deli kaboyowalula,makawala yoku m vavagi?12Lokuyosali yamam kweyakakatae valu watanawa ilupoli kama tilaulasi.13Lokukugwai matausina availa availa lokukoli,paila lokukwatotila makawala, e tokimadagi yoku!E metoya om peula lokuvakadi matausina eimaisi baisa om valu viloubumaboma.14Boda ituwoli ituwoli ilagaisi e itatatuvasi deli kasi kokola.Mina Pilisitia ibulukukoli sainela.15Tokugwala Edom tuvaila kasi kokola sainela.Mina Mowabi si topapeula bogwa itatatuvasi wala,e mina Kenani ikitumouwaisi si tuvaluwa.16Saina kasi kokola eimitaki uwosi,paila bogwa eigisaisi yoku Guyau m peula,e imitaki uwosi gala gagabila bivagaisi avaka,igau tutala m tomota eidadelisi eilosi.Tomota matausina goli lokutaneku metoya okasi katupipi.17E lokumai matausina e lokubudi si valu om koya.Paila yoku Guyau lokunigibogwi makwaina paila m valu,baisa goli Bwala Kwebumaboma yoku titoulem lokukwaliai.18Mwa, Guyau! Yoku m guyau gala kala vigimkovila, bikanuvagasi wala.”

Miriam kala wosi

19E mina Isireli ililoulasi olumoulela bolita baisa oyabala. Mitaga tutala mina Itipita si waga kaibibiu deli si wosa deli tokwabikuliga bogwa leimaisi obolita, e Guyau ikaimilivau sopi ikuboli matausina.20E minana navitoubobuta, minawena Eroni luleta yagala Miriam, ikau la sasani, deli komwaidosi vivila ibokulaisi minana, ikatugoregorasi si sasani, deli kaiwosisi.21E minawena Miriam iusiwosi paila minasina, kawala.
“Kuwosisi baisa Guyau, paila matauna la tomgwaga saina kabokatubau.Paila matauna bogwa ilavi minasina wosa deli kala tosisila ilosi obolita.”

Sopi yayana

22E Mosese ikugwai mina Isireli bisilavaisi Bolita Pilabweyani e bilosiga oviloupakala Sura. Kwaitolu yam ililoulasi oviloupakala, mitaga gala sitana sopi ibanaisi.23Oluvi iviloubusisi kwaitala valu yagala Mara, mitaga sopi saina yayana gala gagabila bimomsi. Baisa uula idokaisi Mara.24E tomota ikavilavilasi ikatupoiyaisi Mosese, kawasi, “Avaka sitana bakamomsi?”25Mosese inigada peula baisa Guyau, e Guyau ivituloki matauna bubotala kai. E imai mabubona ilavi wa sopi, e sopi ikivili isumokainia. Mapilana valu Guyau isaiki mimilisi karaiwaga baisa matausina kidamwa bipilasi si sisu. E baisa tuvaila iwakoli matausina.26Yaubada ikaibiga kawala, “Kidamwa bukukwabikuwolaigusi mokwita, e bukuvagaisi avaka duwosisia, deli bukukwabikaulasi ulo karaiwaga, e gala bamipukwaimi metoya wa lelia makwaisina avaka lamai baisa mina Itipita. Yeigu goli Guyau, kami tokatumova yeigu.”27Oluvi imaisi Elim, e baisa isisuaisi kweluwotala kwaiyu utuwotu deli kailuwolima kailuwoyu pulopola. E baisa ibudaisi si kabosikaiwa opapala sopi.
expand_more
Search