भौंरु8
1हुंह सोठा इहअ, ज़ै तूह मेरअ दुधभाई हंदअ, तै सका ती हुंह सोभी नदरी ताल्है माख्खू दैई, तै निं कोही हाम्हां लै किछ़ै लाअ त बोली।2तै सका ती हुंह ताह आपणैं घअरा लै शादी, तिधी सका त तूह मुखा शखैल़ी, मुंह दैणअ त तिधी ताल्है मसालै राल़अ द दाखो रस अर आपणैं नारदाणैंओ रस झुटणा लै।3तेरी खिंज़ी बाह लोल़ी ती मेरै शरैहणैं हुई अर खाणैं हाथै लोल़ी तंऐं मुल्है मल़्हैची दैनी।4एरुशलेम नगरीए बेटल़ीओ, मेरी आसा तम्हां का अरज़, ज़ेभै तैणीं हाम्हैं झ़ूरी करी पठी निं रज्ज़े तेभै तैणीं निं हाम्हां झ़ैऊई, नां छ़ेल़ी।5अह खारकी बेटल़ी कुंण आसा ज़ुंण आपणैं लोभिए कान्हा नील़ लाई रेगीस्ताना बाखा आसा एछदी लागी दी। नार मंऐं झ़ैऊअ तूह सेओए बूटा हेठै सुत्तअ द, ज़िधी तेरी ईज सुंदी हुई अर ज़िधी तूह हुअ ज़ल्मअ।6तूह निं आपणैं दिलै मुंह सुआई होर कोही डाही अर नां आपणीं बाह दी मुंह छ़ाडी होरी कोही ढाकी, किल्हैकि झ़ूरी हआ मौता ज़िहअ ज़ोर! एते ज़ल़ण निं खल़ै ज़िऊंणै दैंदी, एते आग रहा एही ज़ल़दी लागी, ज़ेही कि बिधाते आग।7एता निं पाणींओ दरैअ बहाऊई सकदअ अर नां खार समुंदर डबेऊई सकदअ, एता निं कुंण सेठ मणछ आपणीं सारी ज़ैदात दैई बी मोलै लई सकदअ।8म्हारी आसा एक च़ेई, सह निं अज़ी ज़ुआन हुई आथी, ज़ेभै तैहा लै गल्ली एछे, तेभै हाम्हां किज़ै लागणअ करनअ?9ज़ै सह च़ेई नगरीए उछ़टी दुआली ज़ेही ज़ुआन हंदी, तै बणाणैं तै हाम्हां तेसे हिक्का लाणा लै च़ंदीए छ़तरू, ज़ै सह घअरे दुआरा ज़ेही हंदी, तै बणाणैं तै हाम्हां केल़ुईए काठे पाल्लै।10हुंह थिई नगरीए दुआली ज़ेही खारकी, ऐबै आसा मेरी हिक्का उछ़टै कोटा प्रैंदे पुंडरी दी छ़तरू ज़ेही। ज़ांऊं मेरै लोभी हुंह भाल़ी, सह हुअ खास्सअ खुश।11बाल्हमोन नाओंए ज़ैगा थिअ राज़ै सुलैमानो एक दाखो बाग, तेऊ डाहै हाल़्है-पहरै लै होर लाई, ज़ुंण-ज़ुंण तेते हाल़्है-पहरै लै थिऐ, तिन्नैं सोभी दैनअ तेते फल़ो हज़ार-हज़ार च़ंदीए सिक्कै पुआज़अ।12पर मेरअ दाखो बाग आसा मेरअ आपणअ, सुलैमाना निं हज़ार च़ंदीए सिक्कै दैणें ज़रुरत आथी, पर तेऊ दैणैं दूई-दूई शौ च़ंदीए सिक्कै तिन्नां लै ज़ुंणी तेऊए दाखे बागो हाल़्हअ-पहरअ किअ।13मेरी झ़ूरीऐ, तूह कर मुंह संघै गल्ला, मेरै साथी-संघी बी च़ाहा तेरअ बोल शुणनअ।14ए मेरै लोभिआ, छ़ेक्कअ कर, खुशबूदार मासले आल़ी धारा बण तूह घोर्हल़ अर हरनीए बच़ै ज़िहअ।
Beyond Translation