भौंरु6
1ओ सोभी का सुंदर नार, तेरअ लोभी किधा लै डेऊअ? तूह खोज़ हाम्हां का कि सह कैहा बाता डेऊअ, तै सका हाम्हैं तेऊ लोल़णा लै तेरी मज़त करी।2मेरअ लोभी डेऊअ आपणैं बागा बाखा लै ज़ेथ खुशबूदार मसाले बूट आसा लागै दै, सह हणअ बागा दी आपणीं भेडा बाकरी च़राऊंदअ अर सुरघे फूला कठा करदअ लागअ द।3मेरअ लोभी आसा मेरअ अर हुंह आसा तेऊए, सह च़राऊआ आपणीं भेडा-बाकरी सुरघे फूला जैंदरी।4ए मेरी झ़ूरीऐ, तूह लोभा मुंह तिर्सा नगरी ज़ेही, हेरनी शुणनी आसा तूह एरुशलेम नगरी ज़ेही बित्ती, तूह आसा सैने फ्रहरै ज़ेही शानदार।5तूह निं मुंह एही भाल़ी लागै, एता करै एछा मेरै दिलै बुआल़, तेरअ मूंड दैआ बाकरीए हेल़्ही ज़िहै झ़लारै ज़ुंण गलाद धारे रेल़ी घैहणीं बाती आसा होथदी लागी दी।6तेरै दांद आसा शेती भेडे हेल़्ही ज़िहै शेतै ज़ुंण ज़ात एभै पै पाणीं जैंदरा का न्हैऊई उझै निखल़ी तिंयां आसा सोभै एकी रंगे अर तिन्नां मांझ़ै निं एक बी भेड़ शोठुई आथी।7घुंढू बाती शुझिआ तेरै दोहरै गलेटै नारदाणैं ज़िहै।8राज़ै का च़ाऐ शाठ राणीं या अश्शी होर बेटल़ी होए डाही दी अर हज़ारो कुंआरी शोहरी बी होए,9पर हुंह झ़ूरा सिधअ ताह एकी लै, ज़ुंण कबूतरी ज़ेही लोभणैं आल़ी अर आपणीं ईजे कल्ही शोहरी अर खास्सी पैरी आसा, सोभै खारकी शोहरी करा ताह भाल़ी तेरी सर्राफी, होर ता होर राज़े राणीं अर होर डाही दी बेटल़ी बी करा ताह भाल़ी तेरी एही तरीफ:10“अह सुंदर नार कुंण आसा ज़ुंण भैणीं दोत्ती ज़ेही प्रैश्शी शुझिआ, हेरनी आसा अह ज़ोथा ज़ेही बित्ती अर एसो मुंह आसा सुरज़ा ज़िहअ प्रैश्शअ अर अह आसा सैने फ्रहरै ज़ेही शानदार?”11हुंह डेऊअ उंधै खोल़े बूटा जैंदरी होछ़ी-होछ़ी बुटी भाल़अ कि दाखे बेला दी डोडी-पाची लागी बी होए अर नारदाणें बुटी दी फूल खिल्लै कि नांईं।12ज़ेतरी मुखा थोघ लागअ, तंऐं ज़गाऊई मेरै दिलै एही खास्सी च़ाह ज़िहअ टिक्कैओ रथ जुधा लै ठुर्हा।13ओ सोभी का सुंदर नार, पिछ़ू फिर, पिछ़ू फिर, मुंह दै ताह भाल़णैं। नार दूई नाटी मांझ़ै ताह हुंह किल्है शाची नाच़दी भाल़णीं?
Beyond Translation