भज़न138
राज़ै दाबेदो भज़न
1हे बिधाता, मुंह करनअ दिला का तेरअ शूकर, मुंह बोल़णीं होरी देअआ नदरी बी तेरी ज़ै-ज़ैकार करना लै गिहा।2मुंह फिरनअ तेरै पबित्र भबना बाखा, संघा करनी मुंह धरनीं माथअ टेक्की तेरी ज़ै-ज़ैकार, किल्हैकि तेरअ सत्त अर झ़ूरी रहा हाम्हां लै सदा, अर तंऐं रहैऊअ सोभी का इहअ कि तेरअ नाअं अर तेरै बैण आसा सोभी का महान।3तंऐं शूणीं मेरी पकार ज़ेभै मंऐं ताखा अरज़ किई, तंऐं पाऐ हैअ दैई मुंह दी तराण।4पृथूईए सोभी राज़ै करनअ तेरअ शूकर करी ज़ै-ज़ैकार, किल्हैकि तिन्नैं हेरअ तेरै बैण शूणीं।5तिन्नां बोल़णीं तेरै महान प्रतप्प अर ज़ुंण तंऐं किअ तेता लै गिहा बोली ज़ै-ज़ैकार।6एही ताह आसा तूह बिधाता बडअ महान सोभी का उझै, तज़ी बी डाहा तूह भोल़ै मणछो खैल, पर घमंडी मणछा हेरा तूह दूरा का बछ़ैणीं।7ज़ेभै मुंह फेरा-फेर आफ़त पल़ी, तेभै डाहअ तंऐं हुंह मेरै दुशमणा का बच़ाऊई, ज़ुंण मुल्है रोश्शै लाल-पिंऊंल़ै तै हुऐ दै। तंऐं डाहअ आपणीं महान बाहे बला करै हुंह बच़ाऊई।8हे बिधाता, ज़ुंण तंऐं ज़बान दैनी, सह करनी ताह पूरी, तेरी झ़ूरी आसा अटल़। ज़ुंण काम तंऐं शुरू किअ, तेऊ लअ तूह ऐबै छ़ेक्की।Beyond Translation