ज़ैहसू16
1कनान देशे दखणा बाखे सिऊंआं दी दैनी परच़ी पाई युसुफे खिंबा लै जरदण नदी जेरिहो नगरी नेल़ पुर्बा बाखे छ़ोआ पोर्ही दखण रेगीस्ताना तैणीं। जेरिहो नगरी का धारा बाखे मुल्खा बाती बेतेल तैणीं।2बेतेल ज़ुंण लूज नगरी आसा, तिधा का डेऊई तिन्नें सिअं अतारोत नगरी तैणीं तेऊ मुल्खा बाती ज़िधी अरेकी लोग तै बस्सै दै।3पछ़मा बाखा होथी तिन्नें सिअं तेऊ मुल्खा बाती ज़ेथ जपलेती लोग तै बस्सै दै, निऊल़ै बेथ-हारोन सिऊंआं बाती गज़ेर नगरी तैणीं मांझ़ समुंदरे बाढै हुई खतम।4जरदण पछ़मा बाखा कनान देशे एतरी ज़ैगे मालक हुऐ युसुफे खिंबा का एप्रैम अर मनिश्शे गोत्रा मांझ़ै आधै लोग।5ज़ुंण ज़ैगा एप्रैम गोत्रे बांडै आई, तेते सिअं हुई पुर्बा बाखा का शुरू करी अत्रोदार नगरी बाती उझलै बेथ-हारोन तैणीं6अर पछ़मा बाखा मांझ़ समुंदरा तैणीं। उतरा बाखा रही तिन्नें सिअं मिकमतात नगरी अर तिधा का फिरी पुर्बा बाखा तानतशीला नगरी तैणीं अर तेस्सी बाती पुजी आनोह तैणीं।7आनोहा का डेऊई तिन्नें सिअं अतारोत संघा होथी उंधै नारा जेरिहो नगरी नेल़ा बाती हुई जरदण नदीए बाढै खतम।8तेखअ फिरी सह ई सिअं तपूहा नगरी का पछ़मा बाखा कानाह गाडा बाखा अर मांझ़ समुंदरा तैणीं। अह एतरी ज़ैगा दैनी एप्रैम गोत्रे बांडै कि तिंयां ऐहा सिऊंआं भितरी बस्से।9एता संघै दैनी धख नगरी अर गराअं एप्रैम गोत्रे लोगा तेऊ मुल्खा का ज़ुंण मनिश्शे गोत्रे बांडै त आअ द।10पर तिन्नैं निं गज़ेर नगरी बस्सै दै कनानी तेता पोर्ही काढै अर तिंयां आसा आझ़ तैणीं बी एप्रैमी मांझ़ै बस्सै दै। पर तिंयां कनानी बणाऐं तिन्नैं आपणैं गलाम।
Beyond Translation