2 इतिहास19
1यहूदा मुल्खो राज़अ जहोशापात पुजअ राज़धानी एरुशलेम राज्ज़ी-राम्बल़अ फिरी।2तिधी आअ राज़ै जहोशापाता सेटा बिधातो एक गूर हनानो शोहरू जेहू संघा बोलअ इहअ, “तूह किल्है डेऊअ कदुष्टे मज़ती करदअ? तूह किल्है झ़ूरअ तिन्नें साथा लै ज़ुंण बिधाता का नफरत करा? ज़ुंण तंऐं इहअ किअ, एता लै आसा बिधाता ताल्है खास्सी रोश्शै आई दी!”3तज़ी बी निं तूह पठी बूरअ आथी। तंऐं किऐ अशेरा देबीए सोभै मुहुर्ती पूज़ा करने गान-स्तान दूर ज़िधी लोग माथै टेक्कदै डेओआ तै, तंऐं च़ाहअ तत्त-दिला का तिहअ करनअ ज़िहअ बिधाता च़ाहा।4जहोशापात रहा त राज़धानी एरुशलेम, पर सह रहा त कबल्लअ दखण बेर्शेबा उझै उतर धारा बाखे मुल्खै एप्रैम तैणीं हर ज़ैगा डेऊंदअ लागी। इहअ करै समझ़ाऊई तेऊ सारी परज़ा कि तिंयां बिधाता बाखा फिरे अर तिंयां बिधाता तिहै ई मने ज़िहै तिन्नें दाद-बाब मना तै।5तेऊ डाहै यहूदा मुल्खै सोभी गहल़ा आल़ी नगरी दी लोगा लै पांज़ पांच़ अर6तिन्नां लै डाहअ इहअ बोली, “तम्हैं करै सोठी-समझ़ी फैंसलअ करी। तम्हैं निं मणछा खुश करना लै फैंसलै करी, थारै नसाफ करनै करै लोल़ी बिधाता खुश हुअ। ज़ै तम्हैं बिधाते परज़ा लै शुचअ नसाफ करे तै रहणअ तम्हां संघै बिधाता आप्पै।7थारै कामां करै लोल़ी बिधातो अदर हुअ, किल्हैकि म्हारअ परमेशर बिधाता निं खोट, पक्षपात अर रेशपत मंदअ आथी।”8राज़धानी एरुशलेम बी डाहै राज़ै जहोशापातै लेबी, प्रोहत अर इज़राईले होरी सैणैं मांझ़ै पांच़ ताकि तिंयां बिधाते बधाने भूल-च़ूक अर परज़ा मांझ़ै आम झ़गल़े नसाफ करे।9जहोशापातै डाही तिन्नां लै एही चतैनगी दैई, “तम्हैं करै बिधाते डरा हेठै शुचै-पाक्कै रही परज़ो नसाफ।”10होरी नगरी का बी सका तम्हां सेटा मकदमैं एछी। तिंयां मकदमैं च़ाऐ हत्या करने होए, बिधाते बधान, हुकम, बिधी या होरी काईदे बारै होए, तम्हैं करै तिन्नां लै चतैनगी दैई कि बिधाता लै पाप निं करी ताकि थारै भाई-बंधा लै बिधातो कोप नां पल़े। ज़ै तम्हैं आपणअ काम शुचै-पाक्कै रही करे तै निं तम्हैं किछ़ू गल्ला लै कशूरबार हणैं।11ज़ुंण बी बिधाते बधाने बारै मकदमैं एछे, तेतो पांच़ हणअ अमर्या प्रोहत। यहूदा गोत्रो सैणअ इशमाईलो शोहरू जबदीया आसा राज़पाल, राज़ दरबारे मकदमें फैंसलै करनै तेऊ। होरी लेबी करनी तम्हां संघै इना कामां लै थारी मज़त। तम्हैं करै हिम्मत अर बिधाता सेटा एही अरज़ कि सह नसाफ करना लै थारी मज़त करे।
Beyond Translation