1 तिमोथी5
1आप्पू का बडी अमरे मणछा निं बेइज़ती करी नैरी, तेऊए करै इज़त संघा करै एऊ साबै अरज़ ज़िहअ कि सह आसा तेरअ आपणअ बाब। ज़ुआन मणछा संघै करनअ आपणैं भाई समझ़ी बभार।2बेटल़ी ज़ुंण ताखा बडी अमरे आसा, तिन्नां संघै करै इहअ बभार कि तिंयां आसा तेरी बैहणी ज़ेही। ज़ुआन बेटल़ी समझ़ाऊ आपणअ मन्न शुचअ डाही आपणीं दाई-च़ेई समझ़ी।3तिन्नां बिधबा बेटल़ीओ करै अदर ज़सरी मज़त करनै आल़अ कोहै निं आथी अर तिन्नें कर हेर-सभाल़।4ज़ै कहा बिधबा बेटल़ीए शोहरू-माठै या पोचै आसा होए, तिंयां करे पैहलै आपणैं ई टबरा संघै तिहअ बर्ताअ ज़िहअ मसीहे विश्वासी करनअ लागा। तिन्नां लागा आपणैं ईज-बाब अर दादू-दादीए हेर-सभाल़ करी तिन्नों हक पूरअ करनअ किल्हैकि तिन्नैं आसा तिंयां धाची-पाल़ी बडै किऐ दै। परमेशर बी हआ एता लै खुश।5ज़हा बिधबा बेटल़ीओ मज़त करनै आल़अ कोहै निं आथी, सह डाहा परमेशरा ई दी आशा अर सह रहा कबल्ली आपणीं मज़त करना लै परमेशरा का प्राथणां करदी लागी।6पर ज़ुंण बिधबा बेटल़ी आपणअ बगत आल-मस्ती दी काटा सह आसा आपणीं ज़िऊंदी ज़िता मूंऐं दै ज़ेही।7इना गल्ला कर सोभी विश्वासी का खोज़ी ताकि कोहै तिन्नां लै दोश नां लाए।8पर ज़ै कोई आपणैं अर खासकर आपणैं टबरे हेर-सभाल़ नां करे, तै गअ सह विश्वासा का हुधूई, अर तिन्नां का बी बूरअ बणी ज़ुंण विश्वास निं करदै।9ज़हा बिधबा बेटल़ीए मज़त सदा विश्वासी करा तेथ लिखै एही बिधबा बेटल़ीओ नाअं ज़ुंण शाठी साला का होछ़ी नां होए अर सारी अमरा आपणैं लाल़ै छ़ाडी होरी संघै नां रही-बस्सी होए10अर होरी मणछा लाणअ ऐहा गल्लो पाक्कअ थोघ कि तैहा आसा हर बगत भलै काम किऐ दै, ज़िहै, तैहा धाचै-पाल़ै आपणैं लान्हैं बधिया, तैहा हांढदै-फिरदै विश्वासी भाईओ आपणैं घअरै अदर किअ होए, होरी विश्वासीए दास ज़ेही च़ाकरी होए किई दी, खरी दी पल़ै दै लोगे तैहा मज़त होए किई दी अर सोभी रंगे भलै कामां लै तैहा आपणीं ज़िन्दगी होए दैनी दी।11ज़हा बिधबा बेटल़ीए मज़त सदा विश्वासी करा तेथ निं ज़ुआन बिधबा बेटल़ीए नाअं लिखी आथी, किल्हैकि ज़ांऊं तिन्नें देहीए भुख खास्सी लागा, तेखअ निं तिंयां बिधबा बेटल़ी रहंदी मसीहे च़ाकरी करदी अर तिंयां च़ाहा भिई बैह करनअ।12तिन्नें भिई बैह करनै करै हआ तिंयां आप्पू दोशी किल्हैकि तिन्नैं पैहलै ज़ुंण भिई बैह नांईं करने सोह खाऐ तै तिंयां निं तैहा गल्ला दी टेक्की रही।13अर एता ई संघै शिखल़ा तिंयां घअरै-घअरै रिंगी करै नज़ाहणै हणअ, सिधी नज़ाहणै ई निं तिंयां हआ होरीए बारै झ़ुठी गल्ला सारै दी पजैल़ी लागी दी। तिंयां पाआ होरीए कामां दी बी खरोल़ अर ज़ुंण गल्ला ठीक निं हंदी तिन्नां गल्ला करना लै डेओआ तिंयां आजू।14तैही च़ाहा हुंह इहअ कि ज़ुआन बिधबा बेटल़ीओ आसा बैह करनअ ठीक अर तिंयां शोहरू पैईदा करे अर आपणअ घअर सभाल़े, ताकि कहा दुशमणा ताह बदनाम करनैओ मोक्कअ नां भेटे।15हुंह बोला इहअ एते तैणीं किल्हैकि कई आसा पैहलै ई परमेशरा दी विश्वास करनअ छ़ाडी हेरअ द अर तिंयां करा तिहअ ज़ेथ बाखा तिन्नां राख्स निंयां।16ज़ै कहा विश्वासी बेटल़ीए टबरा दी बिधबा होए, सह करै आप्पै तिन्नें हेर-सभाल़, ताकि विश्वासी टोली लै बी बोझ़ नां होए, ताकि तिंयां तिन्नां बिधबा बेटल़ीए मज़त करी सके ज़सरअ मज़त करनै आल़अ कोहै निं होए।17ज़ुंण विश्वासी टोलीए सैणैं ठीक इंतज़ाम करा तिंयां आसा दुगणीं इज़त अर ढब्बै-धेल्ले मज़ते हकदार। खासकर तिंयां ज़ुंण परमेशरे बैण खोज़ा अर शिक्षा दैआ।18पबित्र शास्त्र बोला इहअ, “खहल़ा काढणैं आल़ै बल्दा लै दैणअ खाणां लै बी तेता ई मांझ़ै खहल़ा का,” एकी होरी ज़ैगा बोला पबित्र शास्त्र इहअ, “मज़दूर आसा मज़दूरी लणेंओ हकदार।”5:18 लेब. 19:13; बधा. 25:419ज़ै कुंण टोलीए सैणैं लै दोश लाए, ज़ेभै तैणीं दूई या चअन मणछ ताह सेटा एछी निं खोज़े कि तिन्नैं भाल़अ सह आपणीं आछी किज़ै गलत करदअ तेभै तैणीं निं तूह कोहिए मनी।20ज़ुंणी मणछ पाप करदै रहा तिन्नां नैरा सोभी विश्वासी सम्हनै ताकि होरी विश्वासी बी डअर रहे।21हुंह दैआ तम्हां लै ऐहा गल्ला बोली चतैनगी, ज़िहअ हुंह तम्हां लै बोला, तम्हैं करै तिहअ ई। ऐहा गल्ला डाहै आद कि परमेशर हआ आप्पै मसीहा ईशू अर आपणैं स्वर्ग दूता संघै भाल़अ लागअ द कि तम्हैं किज़ै करा। झ़ट च़ारै निं कसरअ सही अर गलत हणैंओ फैंसलअ करनअ। नसाफ करना लै लोल़ी तम्हैं शुचै अर धर्मीं रहै।22तेभै तैणीं निं कोही तिन्नां प्रैंदै हाथ डाही टोली सैणैं बणाईं ज़ेभै तैणीं तिंयां मसीहा संघै विश्वासा दी शुचै-पाक्कै नां निखल़े। नांईं ता इहअ करै हणैं तम्हैं बी तिन्नें पापा दी साझ़ू। आपणअ डाहै धैन कि तम्हैं पबित्र रहे।23आजू पोर्ही निं सिधअ पाणीं झुटदअ ई रही लागी, ताह लागा कबल्ली पेटै दाह, तेता लै कर धख-धख दाखो रस बी झुटी।24मंऐं बोलअ ताल्है कि छ़ेक्कै निं कुंण सैणअ बणाईं ज़ेभै तैणीं तम्हैं तिन्नें ज़िन्दगी ज़ाच़ी भाल़ी नां लए, किल्हैकि कई मणछ करा च़ोरी-छ़ुपै पाप इहअ करै ज़ुंण तिन्नैं किअ तेतो निं तेभै तैणीं थोघ लागदअ ज़ेभै तैणीं तिंयां कुंणी भाल़ै निं। पर कई लोग करा खुल्है आम पाप अर लोगा का हआ तिन्नां परखणैं का पैहलै ई थोघ।25ठीक इहअ ई करा कई लोग भलै काम खुल्है आम अर तेतो लागा सोभी लोगा का थोघ। कई लोग करा च़ोरी-छ़ुपै भलै काम, पर तज़ी बी ज़ुंण भलै काम तिन्नैं किऐ तिंयां बी जाणैं शुझुई।
Beyond Translation