Zabuli34kdc_pbt
ZABULI YA 34
(Zabuli ya Daudi mbuli ya kipindi viyaitendile kana lukwale kuulongozi wa Abimeleki, abaho kawingigwa.)
1Go Mndewa Imulungu, nokutogola siku zose,nhogolwa zako zokala mmulomo wangu siku zose.2Niye nodeng'helela mbuli ya Mndewa Imulungu,wakiwa wahulike na kudeng'helela.3Mtogoleni Mndewa Imulungu hamoja na niye,wose hamoja tuditogole twaga jake.4Nimpula Mndewa Imulungu na heyo kanidika,na kanisegesela kudumba kwangu.5Wanhu omuhindukila Imulungu odeng'helela,na vihanga vao vabule kinyala.6Mkiwa kamulilila Mndewa Imulungu na heyo kamuhulika,na kamkombola na magazo gake gose.7Msenga wa Mndewa Imulungu kowakaliza iwanhu wose omdumba Imulungu,na kowakombola mmagazo.8Gezeni mulole Mndewa Imulungu viyanogile.Kamweda imunhu yomkimbilila heyo ili yakale goya.9Mdumbeni Mndewa Imulungu mweye iwanhu zake wang'alile,kwavija iwanhu omdumba heyo hawaswela kinhu.10Wana simba oswela kinhu na okona nzala,lakini iwanhu omkweleleza Mndewa Imulungu hawaswela kinhu chochose kinogile.11Izoni mweye iwana munitegeleze,na niye nowafunza kumdumba Mndewa Imulungu.12Vino kolonda kudeng'helela ugima,na kukala miyaka mingi na kudeng'helela ganogile?13Avo, leka kulonga gehile,na leka kulonga uvizi.14Leka gehile, utende ganogile,uzahile tindiwalo na udigoge.15Mndewa Imulungu kowalola iwanhu wanogile,na kotegeleza kililo chao,16lakini kowalema iwanhu otenda gehile,kofuta matwaga gao mwiisi.17Iwanhu wanogile wahamulilila Mndewa Imulungu, heyo kowategeleza,na kowakombola kulawa mmagazo gao gose.18Mndewa Imulungu kabehi na iwanhu wali na lusikisiki,kowakombola wose wahondigwe mmizoyo.19Magazo ga imunhu yanogile mengi,lakini Mndewa Imulungu komsegesela gose.20Kolukaliza lukuli lwake lose,haduhu hata zege jake donda dibenigwe.21Gehile gomkoma imunhu yotenda gehile,iwanhu omwihila mwene haki otagusigwa.22Mndewa Imulungu kouhonya ugima wa wasang'hanaji wake,wose omkimbilila hawatagusigwa.