Wakolinto15
1Mbwiga zangu nolonda sekemuisemwe usenga uja niwaligulile, muubokela usenga uwo na gendeleleni kuuwinza.2Usenga Unogile uwo ni usenga muuhulike kulawa kumwangu, ni nzila ya Mulungu ya kuwalohola. Molondeka mgendelele kutogola, yahawa muuleka baho kutogola kwenu si chinhu.3Niye niweng'heni mweye mbuli zinogile ng'hani zija zinibokele, kua Kilisito kadanganika kwa malozo getu kuilinga na Mayandiko ga Mulungu,4kua kawandigwa na kazilibuligwa mdizua da kadatu kama Mayandiko vigandikigwe,5kua kamlawila Kefa na hamwande kawalawila waja kumi na waidi.6Amala kawalawila mbwiga wobita mia tano kwa mala lumwe, wengi wao wang'hali na ugima, mbali wamwenga wao wamala kudanganika.7Hamwande kamlawila Yakobo amala kawalawila wasenga wose.8Viyakomeleze kuwalawila wose kanilawila na niye, niye nikala kama munhu nileligwe mchipindi si changu.9Niye na mdodo kabisa mwa wao wasenga, na ivija silondeka kukemigwa msenga, kwa vija niwadununza bumbila da wamtogole Kilisito.10Mbali kwa unovu wa Mulungu, nikala kama vinili, kwa unovu wake kumwangu haubitile bule. Niye nisang'hana sang'hano kubita wose, si niye mbe mbali uja unovu wa Mulungu usang'hane mgati yangu.11Mbali hata ivo, yahawa wao iyo woligula hebu niye iyo niligula, chose chiligula usenga uwo unogile, na uwo uwo usenga muutogole.12Cholongiligwa kua Kilisito kazilibuligwa. Ivo habali wamwenga wenu molonga wanhu wafile hawazilibuligwa?13Mbali kama yahawa habule uzilibuko, baho hata Kilisito hazilibuke,14kaidi kama Kilisito hazilibuke, baho kuligula kwetu si chinhu na kutogola kwetu kwabule chinhu.15Ivo kwa gago gose, baho chooneka kua chovwiza vichilonga mbuli ya Mulungu, kwavija chiligula kua Mulungu kamzilibula Kilisito kumbe hamzilibule, mbali ijo hadidahika kua kweli kama wafile hawazilibuligwa.16Kwaivo yahawa wafile hawazilibuligwa, baho hata Kilisito nayo hazilibuke.17Kaidi yahawa Kilisito hanazilibuligwa, kutogola kwenu kwabule chinhu, na mweye mng'hali mokala mgamalozo genu.18Kubita gago gose na waja wose wadanganike wahawa wailumba na Kilisito waga tu.19Yahawa tumanilo jetu mgati mwa Kilisito ni kwa mbuli ya ugima uno tu muuisi, cheye cholondeka kuoneligwa bazi kubita wanhu wamwenga wose muiisi.20Mbali kweli Kilisito kazilibuligwa, iyo wa mosi mwa waja wose wonda kuzilibuligwa.21Kwavija ifa igaligwa muiisi kwa nzila ya munhu imwe iyo Adamu, ivija kuzilibuka kwa wanhu kugaligwa kwa nzila ya munhu imwenga iyo Kilisito.22Baho kuilumba na Adamu wanhu wose wodanganika, ivija kuilumba na Kilisito wanhu wose wokwing'higwa ugima.23Mbali chila munhu kozilibuligwa kwa chipindi chake, Kilisito wa mosi, amala waja weli wake Kilisito wokwiza kuzilibuligwa na Kilisito vonda yeze.24Gahamala gago chikomelezo chovika, Kilisito vonda yawabanange walongozi wa isi na wakulu wa isi na weli na ludabwa, amala komwing'ha Mulungu Tata ufaume.25Kilisito kolondeka yalongoze mbaka Kilisito vonda yawahume wahasanyi wake wose na kuwalongoza.26Muhasanyi wa chikomelezo yondayabanangigwe ni ifa.27Kama Mayandiko vigandikigwe, “Mulungu keka vinhu vose muulongozi wake.” Ni kweli kua chihalonga vinhu vose sio va Mulungu mwenyego, ija yavikile vinhu vose muulongozi wa Kilisito.28Mbali vinhu vose vonda vikigwe muulongozi wa Kilisito, ivo nayo Mwana vonda yavike muulongozi wa Mulungu, yekile vose haulongozi wake ili Mulungu yalongoze vose.29Kama habule uzilibuko, ivo waja wanhu wobatizigwa kwa mbuli ya wafile wotumanila kupata choni? Kama wafile hawazilibuligwa, habali wobatizigwa kwa mbuli yao?30Na cheye habali chonda chingile muibung'hukila chila saa?31Mbwiga zangu, niye nokimbilila ifa chila zua! Chiniigodela ng'hani kumwenu ni kuilumba na Kilisito Yesu Mndewa wetu yonitenda niilonge mbuli ino.32Kama tamanilo jangu dahawile da kimunhu munhu tu, viniitoile na wanhu kuja Efeso, kama kuwakoma “Wanyama wakali“ hano Efeso nahapatile chinhu gani kwa mbuli iyo? Kama wafile hawazilibuligwa, baho, “Chije na kung'wa, kwavija igolo chodanganika.”33Sekemuivwizile! “Wahailumba na mbwinga wehile wobananga nhogolwa yako.”34Lamkeni! songeni kukala vinogile, na lekeni kutenda malozo. Wamwenga wenu hamummanya kabisa Mulungu. Nowalongeleni kweli chino chinyala chikulu kumwenu.35Mbali munhu kodaha kuuza, “Wafile wozilibuligwa vilihi? Wokua na lukuli lwavilihi?”36Mweye motonga ubozi! Wahahanda mbeyu, kama haifile haidaha kota.37Na chuuhanda ni mbeyu iiyeka, iwe ya ngano hebu mbeyu imwenga, na sio mbiki uja wolawila hamwande.38Mulungu koing'ha iyo mbeyu lumbo diyolonda mwenyego, chila mbeyu yopata lumbo jake diiyeka.39Kwavija ng'huli za vilumbe vose haziilinga. Ng'uli za wanhu zoilinga, na wanyama woilinga vimwenga, ya ndege woilinga vimwenga, na somba ivija woilinga vimwenga.40Ivo hana ng'huli za kuulanga kwa Mulungu na ng'huli za muuisi, unovu wa ng'huli za kuulanga kwa Mulungu una vija vuuli na unovu wa ng'huli za muuisi una vija vuuli.41Zua dina unovu wake, na mwezi una vija vuuli, na nhondo zina unovu umwenga. Kwaivo nhondo haziilinga kwa unovu wake.42Ivo ili kwa mbuli ya uzilibuko. Kama vija mbeyu, lukuli wohandigwa muulongo kuno ubanangika, mbali wozilibuligwa uli na ugima uja haubanangika.43Lukuli wozeleuligwa uhawandigwa, mbali uhazilibuligwa wokua na ukulu. Lukuli wokuwa wabule ludabwa na haunogile uhawandigwa, mbali wahazilibuligwa wokua na ludabwa mkulu.44Uhawawandigwa ni lukuli yeka, uhazilibuligwa ni lukuli lwa muhe. Hana lukuli yeka na hokua na lukuli lwa muhe.45Kwaivo Mayandiko gandikigwa, “Munhu wa mosi, Adamu kakala chilumbe yeli na ugima,” mbali Adamu wachikomelezo ni Muhe wa Mulungu yoweng'ha wanhu ugima.46Mbali uja ulongole kulawila sio uja lukuli lwa muhe, mbali uja lukuli yeka, amala uja lukuli lwa muhe vondawize.47Munhu wa mosi Adamu kalumbigwa kwa ulongo, kalawa muiisi, na Munhu wa kaidi kalawa kuulanga kwa Mulungu.48Wose weli muiisi wako kama iyo munhu yalumbigwe kwa ulongo, waja weli kuulanga kwa Mulungu wako kama ija Munhu yaliawile kuulanga kwa Mulungu.49Kama vija vichiigalile na iyo munhu yalumbigwe kwa ulongo, ivija choigala na iyo yalawie Kuulanga kwa Mulungu.50Baho mbwiga zangu niye nolonga vino, chija chisang'hanigwe kwa lukuli na damu hachidahika kupata nyafasi muufaume wa Mulungu, na chija hachibanangika hachidaha kua kama chija chibanangika.51Mweye tegelezeni niwalongele mbuli ija Mulungu hanawalongela wanhu. Cheye hachidanganika chose, mbali chose chohinduligwa,52mchipindi cha mhalati ya chikomelezo ihalila, bahaja uhafing'iliza na kulola. Kwavija mhalati ya chikomelezo yahalila, wafile wozilibuligwa mzing'huli zija hazidaha kudanganika kaidi, na cheye chohinduligwa na chogeluka kua na ng'huli uja haufa.53Kwavija yolondeka chila chija chibanangika cholondeka chivale lukuli uja haubanangika, na lukuli udaha kudanganika uvalile lukuli uja haudanganika.54Baho lukuli uno wakubanangika vonda uvale lukuli uja haubanangika, na chija chidanganika chihava lukuli uja haudanganika baho hondadivikile dija yandiko jandikigwe, “Ifa ibanangigwa na uhumi upatika!”55“Ifa, wakulihi uhumi wako? na udaho wako wa kulumiza wakulihi?”56Ifa yopata udaho wa kuchilumiza kulawa mmalozo, na malozo gopata udaho wa kulumiza kulawa mzindazi.57Mbali chomwing'ha hewela Mulungu kwa kuching'ha uhumi kubitila nzila ya Mndewa wetu Yesu Kilisito!58Baho mbwiga zangu wa wende, kaleni kwa kugangamala kumtogola Kilisito, sekemhinduke. Gendeleleni kugangamala mazua gose kuiyoha muisang'hano ya Mndewa, kuno movimanya kua sang'hano muisang'hana muisang'hano ya Mndewa hayaga bule.
The Word for the World International