Matewu7
1“Musitonge, kuyetila kuti musitongewe bo.2Zila yamunotonga bamwe, ndiyo yamunowhotongewa nayo bo, tjilizanyo tjamunopa, nditjo tjamunowhowana bo.3Ngentha yeni ubona lubaza ngumuhhiho legamu lilo, koga iwe usingabone danda limuhhiho lilo?4Kene ungati kugamu lilo, ‘Letja ndikuduse lubaza gumuhhiho lilo,’ tjini, iwe unadanda muhhiho lilo?5Iwe ntjengeli, tanga wadusa danda limuhhiho lilo, ukotjibona zwakanaka kuti uduse lubaza gumuhhiho legamu lilo.”6“Musipe mbgwa tjakayengemala dzingabva dzimuhandukila dzimupalulanya; musiposele ndalama dzenyu dzakanaka mbeli kwewhotji, ngobe dzingadzikanyanga ngemakumbo adzo.”7“Kumbilani, mowhopiwa; hakani, mowhowana; kokodzani, mowhohhuligwa.8Ngobe wose nhu unokumbila unowamutjila, unohaka unowana, newunokokodza unowhohhuligwa.9Ndiwupi nlumetate, pakati kwenyu, angati nkololo uwe ewunkumbila tjinkwa, iye akawumpa bgwe?10Kene hapa ekumbila whobe, akawumpa nyoka?11Hapa imwi ke, babi, muziba pa bana benyu zwipo zwibuya, ngono Tate benyu bakudzimu banowhopa kunjinji kungapani ibabo banobakumbila zwipo zwibuya!”12“Ndizo kose kwamunoyemula kuti banhu bakuthame kumuli, mukuthame bo kubali; ngobe ikoku ndiko kunobviwa nenlayo nebalebesambeli.”13“Mungine nenkoba ntukununu; ngobe wakahama nkoba nezila imhabi, inoyenda kulufu, banjinji banotobela iyo.14Koga untukununu nkoba nezila inhehlanana, inoyenda kubutjilo, bahomanana banoyiwana.”15“Mutjenjele kuna balebesambeli bemanyepwa, banohha kumuli belingika semhwizi, koga mukati beli mhele dzina buhongola.16Mowhobaziba nemihingo yabo. Mahhambi anotjegwa pamatenje emimhiwa, kene mhaya pazwihoho?17Ndizo ke, nti mbuya unamitjelo mibuya, koga nti mbi unamitjelo mibi.18Nti mbuya awungatongoba nemitjelo mibi, nenti mbi awungatongoba nemitjelo mibuya.19Wose nti usingazwale mitjelo mibuya unothubugwa, uposegwa mumoto.20Ndizo ke, mowhobaziba ngezwiyeto zwabo.”21“Akuta wose nhu unoti kundili, ‘He, He,’ unowhongina mubumambo gwekudzimu, koga iye unoyeta kuda kwaTate bangu bakudzimu.22Muhhuba ilelo banjinji banowhoti kundili, ‘He, He, atizolebesambeli muzina lenyu, muzina lenyu tikadusa meyambi kakale tikathama mihingo mikulu muzina lenyu?’23Ndokotjibabhudila patjena nditi, ‘Andizotongogala ndamuziba. Yendani kutjena nami, bayeti bezwibi!’ ”24“Ndizo ke, wose nhu unowha matama angu iyawa, akawatobela, unowhofanana nentjenjebvu wakabaka n'umba iye pahongwe;25kukana vula, kukahha nkubila, mhepo ikahhuhhudza ikaloba n'umba iyeyo, koga ayizokolomoka, ngobe yaka yakabambiwa pahongwe.”26“Wose nhu unowha matama angu iyawa, akasawatobela, unowhofanana netjilengwe tjakabaka n'umba yatjo pavunje,27kukana vula, kukahha nkubila, mhepo ikahhuhhudza ikaloba n'umba iyeyo ikakolomoka, yakakolomoka zwakagwadza.”28Yesu atjipedza zwilebo izwezwi, mabunga ebanhu akatjenamisiwa nediya kukwe,29ngobe ediya senhu unamasimba, kusi sebakwali babo.
The Word for the World International