BaHhebheru12
1Ngono sayikoku takakombeledzewa nebasupi banjinji zwingapa, ayilaheni mitolo yose, nejinyo lakatikwakwatila, tilabuke tjintangentange tjatili mutjili nekuzwipila,2takalinga kuna Yesu, ntangisi nenlulamisi webugalimoyo gwedu, iye ngentha yehanha kwaka kuli mbeli kukwe wakadzikitidzila tjileyanyo, esina hanya nelengudziwa, ugele kuluboko gweludli gwetjigalo tjebumambo tjeNdzimu.3Kumbulani iye wakasimidzilila dziyidziwa nebatjinyi kungapa, kuyetila kuti imwi musinyale kene pela simba.4Mukugwisana kwenyu nejinyo, amanhu mukagwa kuswikila patebugwa kwemalopa enyu.5Kene matjikangan'wa kuludzigwa kwamunoyetiwa neNdzimu elebeleka nemwi sebakololo? Eti,“Nkololo wangu usikutole setjinhu tjisina n'hingo hapa utjemegwa naHe,kakale usinyale moyo hapa ekulanga.6Ngobe He unotambunudza waanoda,kakale unolanga zwakasima wose nkololo waanowamutjila.”7Dzikitidzilani tambunudziwa, Ndzimu unomubhata sebakololo babe; ndiwupi nkololo usingatjemegwe natate babe?8Hapa musiyiwa musatambunudziwa, ibo bamwe bose batambunudziwa, kobva kuti amuta bana bamunlayo, amuta bakololo.9Pehhugwi kwayikoku, tinabotate bedu bemuhango ino ibo banotitambunudza tibawhilila. Ngono atingazwitebamise kuna Tate bemeya tikatjila?10Ngobe ibo baka betitambunudza kwelubakanyana, sebona kwabo, koga iye Ndzimu unotitambunudza kuyetila kuti kutilulamile, kudze tihanganyile nebuyengemali gugwe.11Mulubaka utjatambunudziwa koba kugwadza kusingahanhise, koga hule kwayikoko kozwala mitjelo yekunyalala yendulamo kuna bose bakadiyiwa ngetambunudziwa.12Ndizo ke simisani maboko enyu akalembeleka nezwibvi zwenyu zwinabukuwa.13Mubaakanyile makumbo enyu zila dzakatambunuka, kuyetila kuti tjinohudza tjisinyele koga tjipole.14Gwisani kuti mugale nekunyalala nebanhu bose, mutjile butjilo gwakayengemala, ngobe kuhhe kwayikoku akuna nhu unowhobona He.15Mubone kuti pakati kwenyu akuna unokon'wa wana ngoni dzeNdzimu; kuyetila kuti kusibe nendzi unobaba unomela ukosilinga nebhoma hambgwa banjinji.16Ngakusibe nenhu unothama bupombgwe pakati kwenyu, kene usingahle Ndzimu saEsawu, iye wakatengesa fanilo iye, fanilo yebambano yegala nhaka, ngendilo yezodliwa.17Ngobe moziba kuti hule kwayikoko, ohaka kuti atole makombolelo wakalambiwa, ngobe nenguba waka ohaka makombolelo iyawo nemihodzi kwaka kusitjina zila yekuti iye angahanduka tjini.18Imwi amuzohha kutjinhu tjingabhakhwa nemaboko, kumoto unopfuta, nehhalima, nebhulubusi, nedutu,19nenlilo welunyanga newhi lakaleba matama akata kuti bakaliwha bakumbilisise kuti kusitjabe nelimwe dama linolebgwa kubali.20Ngobe bakalemegwa nenlayo waka uti, “Kene iyo mhuka ikakunha dombo yakafanila khikitidziwa nemabgwe.”21Tjakabon'wa ipapo tjakatjihlisa kwazo, Mozisi akadza akati, “Ndotetema ngentha yehla.”22Koga mahha kudombo leZiyoni nekunzi-nkulu weNdzimu unotjila, Jerusalema lekudzimu lina zwiwulu zwinjinji zwebatumwa bekudzimu bakakubungana bakahanha,23nekugubungano lembano, dzina mazina akakwagwa kudzimu, nekuntongi, iye Ndzimu wayibo bose, nekumeya dzebanhu bakalulama bakayetiwa bakaba bakapelela,24nekuna Yesu, nyayi wetjibvumilano tjitshwa, nekulopa lakanyasiwa, linolebeleka zwinhu zwihine kupinda lopa laAbheli.25Ibani nelebeswa kuti amutolamba whilila iye unolebeleka. Ngobe hapa basakasubvunuka pabakawunlamba iye wakabatjemela ipapa muhango, ngono iswi tinga subvunuka kene, hapa tiwunlamba iye unotitjemela alikudzimu?26Lubaka igogo whi lile lakalizunguza hango; koga ngwenu wakatigadzabgwe eti, “Ndowhopamha kakale, ndisingazunguze hango yoga, koga nekudzimu bo.”27Dama linoti, “Ndowhopamha kakale,” lobva dusiwa kwezwinhu zwinozunguziwa, zwinhu zwakabumbiwa, kuyetila kuti zwisingazunguzike zwisale.28Ndizo ke ngatibokeni kuti takawamutjila bumambo gusingake gukazunguzika, tinamate Ndzimu nezila inowamutjilika nekuzwitebamisa nehla.29Ngobe Ndzimu wedu umoto unopaladza.
The Word for the World International