1 PHETHIRO3
1Sayikoku, imwi bo bafumakadzi, muzwitebamise kubalume benyu, kudze kuti, hapa kuna bamwe basingagalemoyo dama, bangahandugwa ngentha yemazwibhato ebafumakadzi babo kusina matama alebgwa kubali,2hapa bebona hla kwenyu Ndzimu nebubuya gwekuzwibhata kwenyu.3Kuzwinakisa kwenyu kusibe kwakuhhe seluka mavudzi, kene mbala ndalama dzezeezi, nembala zwiyambalo zwakanaka,4koga ngakube kunobva mumoyo, naka kusingahakale kwemeya yakatebama kakale yakadzikama, ndiko kunatjilemela tjikulu mbeli kweNdzimu.5Ngobe iyeyi ndiyo zila bafumakadzi bantolo bakayengemala bakabegalamoyo kuNdzimu, yabakabe bezwinakisa nayo. Bakabezwitebamisa kubalume babo,6sa Sara waka ewhilila Abhurahhamu, ewundhana eti he. Matjibe bana babe hapa muthama tjakalulama kusina tjimwe tjinomuhlisa.7Sayikoku bo imwi balume, galani zwibuyanana nebafumakadzi benyu, mubalemekedze mubawhisisa kuti abana masimba samwi, saku mose muli bagalinhaka bengoni dzebutjilo, kuyetila kuti mitembezelo yenyu isibe netjinoyidzibila.8Tjebupelo, imwi mose, ibani ban'ompela mumeya, muwhilane ngoni, mudane semakamu, mube nemoyo wakanaka nemikumbulo yakatebama.9Musibgwilizile tjibi netjibi, koga kombolelani, ngobe nditjo tjamakadanigwa kuti muwane makombolelo.10Ngobe,“Iwhoyo unoda butjilokakale ehaka bona mahhuba akanaka,ngaaletje leba zwibi ngelulimi gugwealetje neleba manyepwa nenlomo uwe;11ngaaletje thama tjibi athame kwakalulama,ngaahake kunyalala akutobelele.12Ngobe meho aHe akalinga bakalulama,nezebe dzidze dzowha mitembezelo yabo.Koga He unoleyana nebanothama tjakayipa.”13Ndiyani unowhomuwhisa zogwadza hapa muzwipila thama tjakalulama?14Nekene mudziyila nentha yethama tjakalulama, mowhokombolegwa. Musibahle, kene dziyidzika,15koga mumimoyo yenyu lemekedzani Khirisitu saHe. Mugale makazwibaakanyila handula kene yani unomubhuzwa nekwekugalabgwe kumumuli, koga mukuthame nekutebama nangemazwibhato,16mutjengete hana dzenyu dzili mbuyanana, kudze kuti, hapa mutukwa, ibabo banomutuka ngemazwibhato enyu akanaka muna Khirisitu babhakhwe nehoni.17Ngobe kuhine dziyilila thama tjakalulama, hapa kuli kuti kuda kweNdzimu, pana dziyilila thama tjakayipa.18Ngobe Khirisitu bo wakafila matjinyo kan'ompela tjatjose, iye wakalulama ekuyetila basakalulama, kuti atihhise kuNdzimu, wakabulawa mumbili koga akamusigwa kubutjilo mumeya,19ngobe wakayenda akanosumikila kumeya dzimubusungwa,20meya dzebasakawhilila mulubaka gwakapinda, Ndzimu paakaba nemoyonlefu mumahhuba aNowa, mulubaka kubakiwa kepe. Mutjili kwakatjidziwa banhu bahomanana, balihhanakadzi koga, bakatjidziwa ngevula.21Umfananidzo webvubikiwa, unomutjidza ngwenu bo, bvubikiwa kusikwedusa hambgwa imumbili koga kuli kumbila hana mbuyanana kuNdzimu, ngekumuka kubafi kwaYesu Khirisitu,22wakatjiyenda kudzimu kakale watjibe kuluboko gweludli gweNdzimu, nebatumwa bekudzimu banowuwhilila, nebutungamili gunowuwhilila nemasimba anowuwhilila.
The Word for the World International