قٲضؠ9
1جدعونؔ سُنٛد نیٚچو ابی ملکؔ گوو پننِس مٲلِس نِش سِکم مشورٕ کرنہِ۔ تٔمؠ ووٚن تِمن تہٕ ماجہِ طرفہٕ سارنےٕ ٲشناون، 2"سکِم کٮ۪ن سارنےٕ سردارن پرٕژھ ز: کیا یہِ روزیا رُت زِ توٚہہِ پٮ۪ٹھ روزن اکے وقتہٕ جدعونؔ سٕنٛدؠ سٲری ستَتھ شُرؠ حکمران۔ کیٚنہٕ جان روزٕ یہِ زِ اکُے نفر ابی ملکؔ بنہِ توٚہہِ حکمران تہٕ یہِ تہِ مہٕ مشرٲیو زِ بہٕ تہِ چُھس تہنٛدِ خاندانُک اکھ حصہٕ۔3اوے کٔر ابی ملکؔ سنٛدیو مامو سکِم کٮ۪ن سارنےٕ سردارن سٟتؠ ابی ملک سنٛدِ وننہٕ مطٲبق کتھ۔ تِمو ووٚن اکھ أکِس "اسہِ پزِ ابی ملکسؔ پنُن حکمران بننُک اجزات دیُن، تکیازِ سُہ چُھ سون ٲشناو۔"4اوے تُل سکِم کیٚو سردارو بعلؔ بریت سنٛدِ بُت خانہٕ پٮ۪ٹھٕ اکھ کلو روٚپھ تہٕ دِتُکھ ابی ملِکسؔ۔ امہِ سٟتؠ ہیٚتؠ أمؠ کینٛہہ فسٲدؠ موٚلؠ پننہِ مدتہٕ باپتھ تہٕ تِم رودؠ ابی ملکسؔ پتہٕ پتہٕ یوٚت تہِ سُہ گوو۔ 5ابی ملک تہٕ تسٕنٛدؠ پتہٕ پتٲلؠ گے عُفرہ پننِس مٲلؠ سنٛزِ روزن جایہِ تہٕ مٲرِکھ اتہِ امسٕنٛدؠ ستتھ باے، پننِس مٲلؠ سٕنٛدؠ جدعونؔ سٕنٛدؠ نیٚچوؠ۔ تِمو مٲرؠ یِم سٲری نفر أکِس بٔڈِس کنہِ پلس پٮ۪ٹھ۔ وۅنؠ گوو جدعونؔ سٕنٛدؠ لۅکٕٹؠ نیٚچوؠ یُوتامنؔ دِژ ژھٮ۪پھ تہٕ بچوو ابی ملکسؔ تہٕ تسٕنٛدٮ۪ن نفرن نِش۔6اوٕ پتہٕ آے سمِتھ سمٕکھؠ بیت مِلو جایہِ ہنٛدؠ سٲری سردار سکِم شہرس منٛز أکِس شاہ بلوط کُلس تل۔ اتہِ کوٚر یِمو ابی ملکؔ پنُن حٲکم مقرر۔7ییٚلہِ یُوتامنؔ یہِ خبر بوز، سُہ کھوٚت گرزِیمؔ بالہٕ سنگر پٮ۪ٹھ۔ سُہ کھوٚت بالہٕ مالہِ پٮ۪ٹھ تہٕ لٲیِن بوٚن کُن لوٗکن کریکھ، "ہے سکِم کیٚو سردارو، میون بوزِو تاکہِ خدا بوزٕ تُہنٛد!8اکہِ دوٚہہ کوٚر ساروے کُلیٚو پنُن اکھ بادشاہ بناونُک فٲصلہٕ۔ اوے ووٚن یِمو شاہ زیتون کُلِس، "ژٕ روز سون بادشاہ!"9مگر زیتون کُلؠ وونُک، "نَہ! بہٕ بنہٕ نہٕ تُہنٛد بادشاہ۔ میون تیل چُھ خدایس تہِ شوبان تہٕ لوٗکن تہِ۔ بہٕ کرٕ نہٕ زیتون وۅپداوُن بند یِمو پٮ۪ٹھٕ تیل کڑنہٕ یِوان چُھ۔ تاکہِ بہٕ کرٕ توٚہہِ باقین پٮ۪ٹھ بادشٲہی۔10امہِ پتہٕ ووٚن تِمو انجیر کُلِس، "ولہٕ ژٕ بن سون بادشاہ!"11مگر انجیر کُلؠ ونُکھ، "نہ! بہٕ ہیٚکنہٕ پنُن مُدُد پھل وۅپداوُن ترٲوِتھ تہٕ نیرٕ توٚہہِ باقےٕ کُلٮ۪ن پٮ۪ٹھ بادشٲہی کرنہِ"12امہِ پتہٕ ووٚن کُلیٚو دچھہِ کُلِس، "ہے! ژٕ بن سون بادشاہ"13مگر دچھہِ کُلؠ وونُک، "نہَ بہٕ بنہٕ نہٕ تُہنٛد بادشاہ۔ تازٕ دچھہِ رس شراب چُھ خدایس تہٕ لوٗکن خوشی دِوان۔ بہٕ چُھسنہٕ یژھان دچھ وۅپداوٕنؠ بند کرن تہٕ نیرن توٚہہِ سارنےٕ پٮ۪ٹھ بادشاہ بننہِ۔14پتہٕ ووٚن ساروے کُلیٚو کٔنٛڈؠ دوپھس، "ولہٕ ژٕ بن سون بادشاہ۔15کٔنٛڈؠ دوپھن ووٚن کُلٮ۪ن یورٕ، "یوٚدوے توٚہؠ پزی مےٚ باشاہ مقرر کرُن چُھو یژھان، ؤلِو میانٮ۪ن لنجن ہنٛدِس شہلِس تل۔ یوٚدوے تی چُھو نہٕ یژھان، مےٚ چھےٚ امید زِ میانہِ منٛزٕ نیرِ اکھ نار یُس لُبنان کٮ۪ن سارنے دِودارن زٲلِتھ نِیہِ۔16ییٚلہِ یوتامنؔ تِمن یہِ تمثیل ؤنِتھ مۅکلٲو ادٕ ووننکھ، "وۅنؠ چُھسو بہٕ یہِ پرژھان توٚہؠ چُھوا پزنہٕ پٲٹھؠ ایماندار تہٕ خلوصہٕ وٲلؠ۔ ییٚلہِ توٚہہِ ابی ملکؔ پنُن بادشاہ بنووُن؟ توٚہہِ کوٚروا جدعونؔ یس توٚہؠ یرُبعلؔ تہِ ونان چُھو سُنٛد پزی حق ادا تِمو رژو کامیٚو باپتھ یِمہٕ تٔمؠ تہنٛدِ باپتھ انٛزراوِ؟ نَہ!"17یہِ مہٕ مشرٲیو زِ میٲنؠ مٲلؠ لوٚڈ تہنٛدِ باپتھ جنگ تہٕ سُہ اوس تہنٛدِ باپتھ زُو دِنہٕ باپتھ تیار یوٚدوے ضرورت پیٚیہِ۔ توٚہہِ مدیٲنؠ لوٗکن ہنٛدِ شرٕ نِشہ بچاونہٕ باپتھ۔18مگر وۅنؠ گوو توٚہؠ میٲنِس مٲلؠ سنٛدِس ٹبرس خلاف۔ تہٕ توٚہہِ مٲرِو تسٕنٛدؠ ستتھ شُرؠ اکِس پلس پٮ۪ٹھ تہٕ کوٚروون مقرر پنُن بادشاہ ابی ملکؔ یُس میٲنِس مٲلؠ سنٛزِ نوکرانہِ ہُنٛد شُر چُھ۔ نہَ زِ تس سنٛزِ زنانہِ ہُنٛد۔ تُہنٛد بادشاہ بننس لایق یُس توٚہہِ سکِم کٮ۪ن لوٗکن پٮ۪ٹھ حکمران بنہِ۔ توٚہہِ کوٚرُو یہِ چھرا اوٕ کِنؠ زِ سُہ چُھ تُہنٛد ٲشناو۔19وۅنؠ یوٚدوے توٚہہِ پزی انصاف تہٕ خلوصہٕ سان عمل کٔرمٕژ چُھو جدعونؔ تہٕ تسنٛدِس ٹبرس سٟتؠ تیٚلہِ چُھس بہٕ امید کران زِ ابی ملک تھاوِ توٚہہِ خوش تہٕ توٚہؠ تہِ تھٲؠ وُن سُہ خوش۔20وۅنؠ گوو یوٚدوے تُہنٛد یہِ کوٚرمُت درُست چُھنہٕ، بہٕ چُھس یژھان زِ ابی ملکؔ کٔرِن سکِم تہٕ بیت مِلو شہرس تلُک پٮ۪ٹھ۔ تہٕ بہٕ چُھس یژھان زِ سکِم تہٕ بیت مِلو شہرن ہنٛدؠ لوٗکھ کٔرِن ابی ملکسؔ بُرباد۔21ییٚلہِ یُوتامنؔ یہِ مۅکلوو ؤنِتھ، سُہ ژوٚل یِمن نِش زُو بچٲوِتھ بیر شہرس کُن۔ سُہ رود أتی تکیازِ سُہ اوس پننِس ورٕ بٲیِس ابی ملکسؔ کھوٚژان زِ سُہ ما مارِ تس۔22ابی ملکؔ رود ترٮ۪ن ؤرین اسرائیلی لوٗکن پٮ۪ٹھ حکمران۔23امہِ پتہٕ سوز خداین بدروح سکِم کٮ۪ن سردارن تہٕ ابی ملکس پانہٕ وٲنؠ ہَر تُلناونہٕ باپتھ۔ امیُک تر دراو زِ سکِم شہرٕکؠ لوٗکھ گۓ ابی ملکسؔ بُتھؠ پھرؠ۔24سکِم کیٚو سردارو اوس ابی ملکسؔ جدعونؔ سٕنٛدؠ ستتھ شُرؠ مارنس منٛز مدد کوٚرمُت۔ یِم امسنٛدؠ وۅرٕ بٲے ٲسؠ۔ اوے سوز خداین بد روح یِمن سارنےٕ سزا دِنہٕ باپتھ پنہِ امہِ کامہِ ہُنٛد۔25سکِم کیٚو سردارو لٲج بالہٕ مالہٕ پٮ۪ٹہہٕ زاگ۔ یپٲرؠ یُس تہِ پکان اوس تس ٲسؠ یِم لُٹاوان۔ مگر کٔمؠ تام ووٚن یہِ ابی ملکسؔ۔ اوے تہِ دراو نہٕ سُہ اپٲرؠ۔26جعلؔ ناوُک اکھ نفرا یُس عبدؔ سُنٛد نیٚچو اوس آو سکِم شہرس منٛز پننٮ۪ن باین سٟتؠ۔ سکِم کیٚو سردارو ہیژ أمِس پٮ۪ٹھ پژھ کرٕنؠ۔27تِم دراے پننٮ۪ن دچھِ باغن کُن دچھ والنہِ۔ تِمو کوٚڈ اتھ دچھِ رس تہٕ بنووُکھ شراب تہٕ کوٚرُکھ پننِس خدایہِ سٕنٛدِس گرس منٛز سال تہٕ کھیوکھ یڈ بٔرِتھ تہٕ چیوکھ واریاہ شراب۔ پتہٕ سوزکھ ابی ملکسؔ لعنت۔28جعلنؔ ونُکھ، "اسہِ پزِ نہٕ ابی ملکسؔ پنُن حکمران روزنہٕ دیُن۔ سُہ چُھ چھرا اکُ شُر جدعونؔ سُنٛد۔ بوزوَے تہٕ ژکہِ چُھنہٕ سُہ اسہِ کہین واتان۔ تٔمؠ کوٚر اسہِ پٮ۪ٹھ مقرر زبُول ناوُک اکھ صوبیدار پنُن نایب۔ اسہِ پزِ وفادار روزُن حمورؔ سنٛدیو زُریو منٛزٕ کٲنٛسہِ أکؠ سُنٛد۔ یُس سانہِ شہرچ بُنیاد تراون وول اوس تہٕ تِموےٕ منٛزٕ اکھ سردار بناوُن۔ نہَ زِ ابی ملکؔ۔29یوٚدوے توٚہؠ مےٚ پنُن سردار مقرر کٔرِو، بہٕ مۅکلاوَو ابی ملکسؔ نِش۔ بہٕ ونہٕ تمِس، "سمبراو پنٕنؠ نفری! تہٕ ولہٕ لڑ مےٚ سٟتؠ!"30کٔمؠ تام واتنوو جعلؔ سُنٛد ونُن زبُولسؔ نِش، تہٕ سُہ گوو نارو نار۔31تٔمؠ سوزؠ شیٚچھہِ وٲلؠ ابہؔ ملکسؔ نِش تِمو ووٚن تس، "جعلؔ تہٕ تسٕنٛدؠ بٲے چھِ یور سکِم وٲتؠ مٕتؠ تہٕ تِم چھِ لوٗکن تُلان تاکہِ ژےٚ لگنَے بُتھِ۔32ژےٚ تہٕ چانٮ۪ن نفرن پزِ راتھ کیُت وتھُن تہٕ شہرس نٮ۪بٕرؠ کِنؠ کھہَن منٛز زاگ دِتھ بِہُن۔33یُتھےٕ پگاہ سُلہِ سِریہِ کھسہِ تہٕ ؤتھِو تہٕ کٔرِو شہرس پٮ۪ٹھ حملہٕ۔ ییٚلہِ جعل تہٕ تسٕنٛدؠ نفر توٚہہِ بُتھِ ؤتھِتھ یِن توٚہؠ ہکیٚو تِمن سٟتؠ تہِ کٔرِتھ یہِ خوش کریٚو۔"34اوے ؤتھؠ ابی ملکؔ تہٕ تس سٟتؠ باقے سٲری نفر راتھ کیُت۔ تِمو بناوِ ژور جمٲژ تہٕ رودؠ ژوٗرِ سکِم شہرس نکھہٕ کھہَن منٛز۔35دوٚیمہِ دوٚہہ صُبحس دراو جعلؔ نٮ۪بر تہٕ رود وۅدٕنؠ شہرکِس پھاٹکس نِش۔ ییٚلہِ سُہ اتھ جایہِ اوس، ابی ملکؔ تہٕ تسٕنٛدؠ سِپاہ آے پننٮ۪و چھپَن جایو پٮ۪ٹھٕ نیرتھ تہٕ لوگُکھ شہرس کُن پکُن۔36ییٚلہِ جعلنؔ یِمہٕ سِپاہ وُچھ، تٔمؠ ووٚن زبوُلس، "وپچھ لوٗکھ چھِ بالہٕ پٮ۪ٹھٕ بوٚن وسان۔ "مگر زبُولو ووٚنُس، "ژٕ چُھکھ وُچھان صرف کُلؠ ژایہِ بالس پٮ۪ٹھ۔ یِم چھِنہٕ لوٗکھ، یِم چھِ باسان لوٗکھ۔"37مگر جعلنؔ وُچھ وارٕ تہٕ ووٚننس، "ہے وُچھ لوکھ چھِ منٛز مٲدانس پکان۔ اکھ جماتھ چھےٚ بلوط کُلٮ۪ن کُن تہِ یِوان ییٚتہِ لوٗکھ وننہٕ کِنؠ تِم مرن والٮ۪ن ہنٛدٮ۪ن روحن سٟتؠ کتھ چھِ کران۔38زبُولنؔ ووٚن جعلسؔ، "چون یہِ بکواس چُھ فضول۔ ژےٚ ووٚنُتھ اسہِ پزِ نہٕ ابی ملکسؔ حٲکم روزنہٕ دیُن۔ ژےٚ بنووُتھ یِمن لوٗکن مذاق۔ لہٰذا گژھِ تہٕ لگ یِمن بُتھِ۔"39اوے دراو جعلؔ سکِمچ نفری ہٮ۪تھ شہرٕ نٮ۪بر ابی ملکؔ سٕنٛدِس لشکرس سٟتؠ لڈنہِ۔40ابی ملکؔ تہٕ تسٕنٛدؠ نفر دورییہ یِمن پتہٕ تہٕ مٲرِکھ جعلؔ سٕنٛدؠ واریاہ نفر واپس شہرکِس پھاٹکس منٛز اژنہٕ برونٛہہ۔41ابی ملکؔ تہٕ تسٕندؠ نفر رودؠ سکمہٕ پٮ۪ٹھٕ پانٛژھ میٖل دوٗر ارومہ نٲوؠ جایہِ۔ تہٕ زبُولؔ سنٛدیو نفرو کٔرؠ جعلؔ تہٕ تسٕنٛدؠ بٲے شہرٕ منٛزٕ نیرنس پٮ۪ٹھ مجبور۔42دوٚیمہِ دوٚہہ سپٕدؠ سکِم شہرٕکؠ لوٗکھ تیار شہرٕ منٛز نیرنہٕ تہٕ پننٮ۪ن کھہَن منٛز کامہِ کرنہٕ باپتھ۔ ییٚلہِ کٔمؠ تام یہِ شیٚچھ تہِ ابی ملکسؔ واتنٲو،43تٔمؠ بٲگرٲوؠ پنٕنؠ نفر ترٮ۪ن جمٲژن منٛز تہٕ ووننکھ کھہَن منٛز ژوٗرِ بیٚہُن۔ تِمو کوٚر یی۔ یُتھےٕ تِمو لوٗکھ شہرٕ منٛزٕ نیران وُچھ، تِم آے یِمن پٮ۪ٹھ وۅگلِتھ کُنے وۅٹہِ۔44ابی ملکؔ تہٕ تس سنٛز نفری یِم تس سٟتؠ ٲسؠ، دورییہِ شہرکِس پھاٹکس کُن تہٕ گنٛڈکھ اتھ در ہیٚو باقےٕ ز لوٗکن ہنٛدؠ درؠ رلییہِ کُہن منٛز لوٗکن کُن تہٕ کوٚرہکھ حملہٕ۔45ابی ملکؔ تہٕ تسٕنٛدؠ نفر رودؠ پوٗرٕ دوٚہس لڑان۔ تِمو کوٚر شہرس پٮ۪ٹھ قبضہٕ تہٕ مٲرِکھ سٲری لوٗکھ۔ تِمو وٲلؠ سٲری تعمیر تہٕ وۅتھرووُکھ سٲرسےٕ پتھرِس نوٗن تاکہِ اتھ کھسہِ نہٕ تہنٛدؠ کِنؠ کانٛہہ تہِ وۅپزِتھ دُبارٕ۔46ییٚلہِ سکِم شہرس نٮ۪برؠ مینارن منٛز روزن والیٚو سردارو بوز زِ سپُد کیا تِم دورییہ قلعس انٛدر چھپنہِ۔ یُس تہنٛدِس خدا البریتؔ سُنٛد گرٕ تہِ اوس۔47مگر کٔمؠ تام بٲو یہِ کتھ ابی ملکسؔ زِ سٲری سردار چھِ اتہِ سمِتھ۔48اوے دراو سُہ تہٕ تہنٛدؠ نفر ضلمونؔ بالس کُنیُس سکِم شہرس نکھے اوس۔ ابی ملکنؔ ژچہِ کُلٮ۪ن ہنٛزٕ کینٛہہ لنجہِ مکژِ سٟتؠ تہٕ لزن پھیٚکِس۔ پتہٕ ووٚنُن پانس سٟتؠ سارنےٕ نفرن زِ ؤتھیٚو کٔرِو تی یہِ مےٚ کوٚر۔49اوے ژچہِ امسنٛدیٚو نفرو لنجہِ واجکھ بالہٕ بوٚن ابی ملکسؔ پتہٕ پتہٕ۔ تِم وٲتؠ قلعس نکھہٕ تہٕ کوٚرُکھ یِمن لنجن دیوارس سٟتؠ انبار۔ ادٕ زولُکھ اتھ نار تہٕ نارن زول یہِ قلعہٕ تہٕ مٲرِن سٲری یِمہٕ اتہِ انٛدر ٲسؠ۔ لہٰذا تِم سٲری لوٗکھ یِم انٛدر ٲسؠ، الہٕ پلہٕ اکھس ساس مرد، زنانہٕ مودؠ سٲری۔50پتہٕ گَے ابی ملکؔ تہٕ تسٕنٛدؠ نفر تیبِض۔ تِمو تروو اتھ گیرٕ تہٕ کوٚرہس قبضہٕ۔51وۅنؠ گوو شہرس منٛز اوس اکھ دوٚر مینار۔ اوے تہ دورییہ سٲری مرد، زنانہٕ تہٕ سردار أتھؠ مُنارس کُن۔ ییٚلہِ اندر ژاے، تِمو کٔرؠ امِکؠ دروازٕ بند۔ پتہٕ کھٔتؠ امہِ مینار کِس پشس پٮ۪ٹھ۔52ابی ملکؔ تہٕ تسٕنٛدؠ نفر وٲتؠ مینارس نِش تہٕ کٔرِکھ انٛدر اژنٕکؠ ژھل مگر ہیٚکؠ نہٕ کٔرِتھ۔ پتہٕ کٔر ابی ملکنؔ اتھ نار دِنچ تیٲری۔53مگر یُتھے ابی ملکؔ برس نکھہٕ ووت، اکہِ زنانہِ، یۅسہ پشس پٮ۪ٹھ ٲس ترووُس اکہِ بجہِ گریٹنہِ ہُنٛد پیٚٹھِم پوتُر کلس پٮ۪ٹھ۔ یمؠ أمِس کلہٕ کھوپر ژٔٹِتھ وٲج۔54ابی ملکنؔ دیُت وُژھی أکِس جوانس ناد یُس امسُنٛد ہتھیار ہٮ۪تھ اوس تہٕ وٚننس، "پنٕنؠ کرتل کڈ تہٕ ژھن مےٚ مٲرِتھ۔ بہٕ چُھس نہٕ یژھان زِ لوٗکھ گژھن ونٕنؠ اکہِ زنانہِ مور ابی ملکؔ اوے وٲج أمؠ جوانن ابی ملکسؔ کرتل، تہٕ ابی ملکؔ مود۔55ییٚلہِ اسرائیلی سپہو وُچھ زَ ابی ملکؔ مود تِم آے واپس پھیرِتھ پننٮ۪ن گرن۔56یتھٕ پٲٹھؠ دیُت خداین ابی ملکسؔ پننٮ۪ن تمام کۅ کارن ہنٛدِ باپتھ سزا یِم تٔمؠ پننس مٲلِس خلاف کٔرؠ پنٕنؠ ستتھ بٲے مٲرِتھ۔57خداین دیُت سزا سکِم کٮ۪ن لوٗکن تہٕ پننیٚو کٔرؠ مٕتیٚو کۅ کارو باپتھ۔ تہٕ ییٚلہِ یِم واقہٕ سپٕدؠ، یِمو بنوو جدعونؔ سٕنٛدِس نیٚچو یُوتامؔ سُنٛد ووٚہو پوٚز۔
Bridge Connectivity Solutions Pvt. Ltd.