قٲضؠ7
1دوٚیمِ دوٚہہ صُبحس ووٚتھ یرُبعلؔ یعنی جدعونؔ تہٕ تسُنٛد لشکر سُلے تہٕ وٲتؠ حرود ناگس پٮ۪ٹھ۔ مدیٲنؠ لشکر اوس یِم شمالس کُن مورہؔ بالس نکھہٕ وادی منٛز خٟمہٕ دِتھ۔ 2یہُوواہنؔ ووٚن جدعونسؔ، "ژےٚ چھی ژٔرؠ لوٗکھ سٟتؠ۔ یوٚدوے بہٕ توٚہہِ سارنےٕ مدیٲنؠ لشکرس سٟتؠ جنگ کرنہٕ دِمہٕ تہٕ چٲنؠ لشکر دِیہ تِمن شکس۔ یِم تھیٚکن مےٚ زِ اسہِ دیُت پٲنؠ پانہٕ میانہِ مدتہٕ ورٲے دُشمنن شِکس۔3اوے ون پننِس لشکرس، "یُس تہِ توٚہہِ منٛز بُزدِل چُھ یا کھوٚژان چُھ سُہ ہیٚکہِ نیرتھ تہٕ ژلہِ جلعاد بالہٕ پٮ۪ٹھٕ۔ "تہٕ ییٚلہِ جدعونن تِمن یہِ ووٚن، زُتووُہ ساس سِپاہ دراے یِمو منٛزٕ گرٕ کُن۔ پتھ کُن رودؠ صرف داہ ساس سِپاہ۔4مگر یہُوواہنؔ ووٚن جدعونسؔ، "وُنہِ تہِ چھی ژےٚ ژٔرؠ لوٗکھ! واتناوُکھ یِم ناگس پٮ۪ٹھ۔ تتہِ ژارکھ بہٕ یِمو منٛزٕ زِ کم کم نیرن ژےٚ سٟتؠ جنگس تہٕ کم نہٕ۔5ییٚلہِ جدعوننؔ پنٕنؠ نفر ناگس تل واتنٲوؠ، یہُوواہنؔ ووٚنُس ییٚلہِ یِم تریش چیٚن تِم لوٗکھ کڈُکھ اوٚک انٛد، یِم ہوٗنٮ۪ن ہنٛدؠ پٲٹھؠ تریشہِ زیٚوِ سٟتؠ لیٚوان لیٚوان چیٚن، دوٚیمہِ جمٲژ منٛز تھاوُکھ تِم لوٗکھ یِم کۅٹھٮ۪ن پٮ۪ٹھ وسِتھ آبس منٛز ٲس لٲگِتھ چیٚن۔6اوے ییٚلہِ یِمو تریش چیٚیہِ چھرا کٔرؠ تریٚوٕے ہتو لوٗکو پنٕنؠ اتھہٕ استعمال تریش ٲسس تام واتناونہٕ باپتھ۔ باقیٚو ساروٕے نرمٲوؠ کوٚٹھؠ آبس ٲس لٲگِتھ تریش چیٚنہٕ باپتھ۔7اوٕ پتہٕ ووٚن یہُوواہنؔ جدعونسؔ، "یِم ترےٚ ہتھ نفر یِمو تریش چیٚیہِ پننیٚو اتھو پٮ۪ٹھ آبس لیٚوِتھ، چھِ چٲنؠ لشکر۔ "یِمن دِمہٕ بہٕ مدد مدیانٮ۪ن تلفس تل اننہٕ باپتھ۔ باقین دِ پنُن پنُن گرٕ گژھنہٕ!"8اوے سمبرٲوؠ یِمو تریٚیو ہتو نفرو کھیٚن چیٚن سامان تہٕ نرسنگھا برکٹن ہنٛدؠ ہینٛگ بجاونہٕ باپتھ۔ باقےٕ تمام لوٗکو نِش تھٕ سوزٕن باقےٕ گرٕ۔9امہِ رٲژ منٛز ووٚن یہُوواہنؔ جدعونسؔ، "وۅتھ تھوٚد تہٕ نیر گژھِ تہنٛزِ چھاونی لشکر گاہس منٛز۔ ژٕ بوزکھ تتہِ پانہٕ تہِ کینٛہہ یُس ژےٚ بھروسہٕ دِیہ زِ بہٕ بناوکھ چٲنؠ نفر تِمن تلفس تل اننس لایق۔10وۅنؠ گوو یوٚدوے ژٕ کُن زوٚن تور گژھنس کھوٚژکھ، تیٚلہِ تلن پنُن غلام فُوراؔ سٟتؠ۔11نیر وس بوٚن کُن تہٕ بوز کینٛہہ مدیٲنؠ سِپاہ کیا چھِ ونان۔ ژےٚ یِیی واریاہ ہمت تہٕ گژھکھ تِمن پٮ۪ٹھ حملس تیار۔ اوے تُل جدعوننؔ فُوراؔ سٟتؠ ہتہٕ گۓ تہنٛدِس لشکر گاہ کِس گۅڈس تام۔12مدیٲنؠ عمالیق تہٕ مشرقی لشکر ٲسؠ خٟمہٕ دِتھ زنتہٕ ہالون ہنٛز کثرت۔ باسان اوس تہنٛدؠ اونٛٹ گنٛزراوٕنؠ تہِ چھنہٕ سہل کتھاہ۔ زنتہٕ سٮ۪کہِ پھٔلؠ سۅدرٕ بٔٹھِس پٮ۪ٹھ۔13جدعون گوو کھوکھجہِ واریاہ نکھہٕ تہٕ بوزُکھ اکھ زوٚنا پننِس یارس ونان خواب۔ تٔمؠ ووٚن مےٚ وُچھ وُنؠ وُنؠ اکھ خواب تہٕ خوابس منٛز وچُھم اکھ گول وُشکہٕ ژوٚٹ سٲنِس مدیٲنؠ لشکر گاہس منٛز پیٚوان۔ یہِ آیہِ أکِس خٟمس کُن تیژ زورٕ لاینہٕ زِ خٟمس گوو تلُک پٮ۪ٹھ تہٕ آو وُکراونہٕ۔14یارن ووٚنُس اورٕ، "امیُک تعبیر گوو زِ خدا بناوِ یُواسؔ سنٛدؠ نیٚچوؠ جدعونس تہٕ اسرائیلی لوٗکن یتھ سٲرؠ سےٕ لشکرس یۅسہ تہِ ییٚتہِ مدیٲنؠ نفری چھےٚ شِکس دِنس لایق۔15جدعوننؔ بوز أمِس نفرٕ سُنٛد خواب تہٕ امیُک تعبیر تٔمؠ کوٚر خدایہِ سُنٛد شکُر۔ پتہٕ آو سُہ تہٕ تسُنٛد نوکر فوراً واپس اسرائیلی لشکر گاہس منٛز۔ تٔمؠ دِژ پننٮ۪ن لوٗکن کرٮ۪کھ، "ؤتھِو! خدا چُھو مدیٲنؠ لشکرس پٮ۪ٹھ غلبہٕ دِوان۔"16أمؠ کٔرؠ پننہِ نفری ترےٚ باگ۔ پرٮ۪تھ باگس دِتُن اکھ کٹہٕ ہینٛگ تُریہِ رنگؠ مرتبان تہٕ بیٚیہِ دِژنکھ اکھ اکھ مشٲلؠ۔17پتہٕ ووٚننکھ، "مےٚ کُن روزیٚو وُچھان۔ ییٚلہِ أسؠ دشمن لشکرگاہس نکھہٕ واتو، پھٔہلِو اتھ گیرٕ تراونہٕ باپتھ۔ پتہٕ کٔرِو تی یہِ بہٕ کرٕ۔18یُتھےٕ میٲنؠ نفر نرسنگا واین، تیُتھےٕ وٲلؠ زیٚو لشکر گاہس گیرٕ ترٲوِتھ زٕ باگ تہٕ پنٕنؠ نرسنگا تہٕ تُلؠ زیٚو کریٚکھ۔ أسؠ چھِ یہِ کران یہُوواہؔ تہٕ جدعون سٕنٛدِ باپتھ۔"19یمہِ وِزِ نیصف راتھ ادا سپدنہٕ برونٛہہ منٛز رٲژ ہنٛز رٲچھ شروع گژھنہٕ وِزِ ییٚلہِ نٔوؠ رٲچھ در پرانیٚن رٲچھ درن فارغ کٔرِتھ پنٕنؠ جاے رٹان چھِ۔ جدعون تہٕ تسنٛدؠ ہتھ نفر وٲتؠ مدیٲنؠ لشکرگاہس گۅڈس نکھہٕ اچانک وٲے أمؠ تہٕ أمؠ سنٛزِ نفری ہینگ تہِ پھُٹرٲوِکھ پنٕنؠ مرتبان یتھ منٛز مشالہِ آسکھ 20أتھؠ سٟتؠ وٲے تریٚشوٕیو باگو پنٕنؠ ہینگ تہٕ پھُٹراوِکھ پنٕنؠ مرتبان۔ پننہِ مشالہِ رچیٚکھ ہیٚور کھوورٮ۪ن اتھن منٛز تہٕ ہینگ رٔٹِکھ کھوورین دٔچھنؠن اتھن منٛز تہٕ وارِ وارِ وایکھ یِم تہٕ دَژکھ کریکہٕ۔ اسہِ چھےٚ تلوار یہُوواہؔ تہٕ جدعون سنٛدِ باپتھ لڑنہٕ خٲطرٕ۔21جدعون سُنٛد پرٮ۪تھ کانٛہہ نفر رود پننہِ پننہِ جایہِ دٔرِتھ لشکر گاہن أنٛدؠ انٛدؠ۔ تِم رودؠ وُچھان سٲری مدیٲنؠ نفر گَے چھلہِ چھانگرِ اورٕ یور دوان تہٕ خوفہٕ سٟتؠ چِکہٕ دِوان۔22ییٚلہِ زن ترےٚ ہتھ اسرائیلی نفری پنٕنؠ ہینگ لٔگؠ تھےٕ وایان رودؠ، یہُوواہنؔ لٲگؠ مدیٲنؠ پانہٕ وٲنؠ ژُونس تہٕ جپھہِ کُن پننیٚو تلوارو سٟتؠ۔ کینٛژو مٲرؠ پانہٕ وٲنؠ لوٗکھ تہٕ باقےٕ ژٔلؠ۔ کینٛہہ ژٔلؠ جنوبس کُن بیت سِطہ، کینٛہہ ژٔلؠ صریراتؔ کُن طباتس نکھہٕ ابیل محولہ تام۔23امہِ پتہٕ سوزؠ جدعونن پٲغام سِپہن یِم نفتٲلؠ، آشرؔ تہٕ منسیؔ قبہیلہٕ کٮ۪ن زپُرٮ۪ن ہنٛدِس علاقس منٛز روزان ٲسؠ، تِمن یہِ وننہٕ باپتھ زِ ؤلِو تہٕ مدیٲنؠ لشکرس ژٲنِو لار۔24جدعوننؔ سوزؠ قٲصِد سٲرسےٕ کوٚہستٲنؠ علاقس کُن ییٚتہِ افرائیمؔ سٕنٛدؠ زُرؠ روزان ٲسؠ، یہِ ونہنہِ ؤسِو بوٚن تہٕ کٔرِو مدیٲنؠ لشکرس پٮ۪ٹھ حملہٕ۔ بوٚن یردن دریاوس تام گٔژھِو توٚت تام یتہِ لوٗکھ تار ہیٚکن لٔبِتھ۔ دشمن سنٛدٮ۪ن نفرن تارس ترنہٕ نِش پتھ رٹنہٕ باپتھ۔ نفری تھٲون منٲسب مقامن پٮ۪ٹھ دوٗر جنوبس منٛز بیت برہس تام۔ اوے کوٚر افرائیمؔ کیٚو لوٗکو تی یہِ جدعونن ووٚننکھ۔25تِمو بنٲوؠ بٲنٛدؠ مدیٲنؠ لشکرٕکؠ زٕ سردار عُوریبؔ تہٕ زئیبؔ تہٕ تِمو مور عُوریبؔ أکِس بٔڈِس پلس پٮ۪ٹھ یتھ وۅنؠ عُوریب سُنٛد پل ونان چھِ تہٕ زئیب مورُکھ تتھ جایہِ تتھس دچھِ رس کڑان ٲسؠ۔ اتھ چھِ از ونان زئیب سُنٛد وۅکھُل۔ پتہٕ ژٔٹؠ اسرائیل یو عُوریبؔ تہٕ زئیبؔ سٕنٛدؠ کلہٕ تہٕ أنِکھ جدعونسؔ نِش۔ یُس دریاے یردنس اپارِبٹھِ اوس۔
Bridge Connectivity Solutions Pvt. Ltd.