1Tumaas hanneenti yooni ma'a wuzaasik yiraratano futoni gitobaastawa. Es bari boor'a wogga woggaasik imtefa maa'aasikitonon ephphe Ha'ooski ta'efe asuni meyanon koi'sira kayim aane zagifa.2Tumaas koi'sira kayimsuk chimar sinfaanane shiiphok ta'efe asuni meya hepsa wolgunoy ugnak boor'aassin kayimete boor'anawa boor'besi foonto sinobesiison kanubesiissi arter sinna boor'a maa'aasi imanon beyone kaba.3Sinuntano es maa'aasikito wogga woggaasik boor'aason safarosonek zagirwa.4Omorunewa fizone asi hanna boor'aason feeshun uuk aafa chimanawuza.5Es bari boor'a Kiristoos;han daasta yeefena kabaasik ekka yi;maa'aasikitononnawa mabaasikitononna;neekin aane sholefat;sinuntano atuuson taak hoossit.6Kiichchoni maa'aasikitoknawa boor'aason feeshun uukna;dey imtefa maa'aasikitok aane girowe.7Es kabaasik ta:« ‹Ha'onaase! Matsafaassik ta chowaasik tichchenaasimato;ne fiqadiison koi'suktu yaanwa› » yin.8Bar dey tesusta es wuzaasikito tumaasimato awaster sinfanaknu: «Maa'aasikitononnawa mabaasikitononna; kiichchefa maa'aasikitonewa boor'aason feeshun uuk imtefa maa'aasikitone asin aane sholowe. Es barikitok dey aane girowe» yi.9Tusire dey: «Ese, ta fiqadineeson koi'suktu yaanwa» yi. Esiisik hepsaniison eddebaassi wolguk tesuniison shaarefa.10Es fiqadineesik Yesus Kiristoos ashak isarga maa'a sinne imtena boor'a inno korto sinniwa.11Maagiis isarba isarbaas boor'aason tishkuk chimnoy es maa'aasikitonon wolitaafe imet wonna wonna wostefe.12Sinuntano Kiristoos boor'aasik isa maa'aason koi'ba foontonon isarga imnanneen orfo Ha'oosi hoi'ta teshta di.13Hanneen ekalo gumabaasakito basa wochoosi sikalosi sinonenneen oodana.14Es bar dey sinnaas korto sina baassotin isa maa'aaski kamo tuum zagina boor'awa.15Korto Ayyanaasnu han chowaasik innok zaala makona. Tesusta:16«Es wonaasikitoneen orfo;baassoneen ane giruna teyyani kaamaas;haniiswa yifewa Daamiis;ta tumaason nibbesiissi foonak zaguna;baasso kanuussi dey tichuna» yi.17Tusire dey: «Boor'besiisonnawa nuurubesiisonna;hanneen ekalo;aafa wolla safarona wuza» yife.18Es bari boor'a boor'aas zuuttera feeshun yistenanneen orfo boor'ni feeshun uuk imtefa maa'aas hanneen ekalo aafa foona wuza.
Ha'ooski Tai'so Sholsu
19Ese aytaasakitono! Yesusni hannaaski kamo kortoosi kortosi girunik chima danniwa.20Giruniis yinuussi kamo; esiis dey basa ashaaski kamo gachna gaddo dey hayewa sina ugnaasikwa.21Ha'oosi keeta ha'suni hugnaba faana akam maagni feerwa.22Es bari boor'a mangu kanuussin kayimanik nibniison wir'tera; atuniison dey kayma akak masera; kayma nibnewa tuuma amantone ephpha Ha'ooski tai'soni.23Abdini kaamaason ima bar amanamto sinna boor'a amaneni abdiison ek hang unoy zaggira ephani.24Keeshtanaknawa ma'a wostokna guzira foonik isaas isaasik yaadassuwo.25Wonna wonna uphefaafa innotna innotna zaguniistano isa isa meya zagsefeesimato zuuttefeni baron beyaniita; arkissiranu dey Daamiis yoona wonaas ta'baason yaadatefaat es baron mai'sira zaguti.26Futoni aruuson ephpha taaninneen orfo arifat sholera boor'a wostefaanine hanneen ekalo boor'ni chowaasik imtoni isa maa'a aafa.27Sinuntano hash fu'te bar hanneenti sinni digsu mangsuni kar'aasewa oomtesefe baassotin muuni digsu geyaasewa.28Museni tumaason aata basaasta hep wedey keez asuni meya zaala maksefaatene fakiya foontonon kitunak zagter.29Eekin Ha'oosi Naanin kashshi bar; akorto sinna teyyani kaamaasi hannaason kiinsi bar; baak imte Ayyanaason me'a bar aakkane fa akama ke'o barik sholsu sinna nittok bestefaso?30«Kooni kaasto taarwa; ta sholsu kowaason kaasuna» yi bar oo sinnamato arifeni. Esiisimato: «Ha'oos bari daraasata mangsu kar'ar» yife Daamiis.31Es bari boor'a hayewa Ha'oosi kushusi gando akamanon digsuwa.32Chaarefa nittok chaarenanneen hankalo showo shana ephpha taara fakiseti zeemoti wonaasikitonon yaadatosoti.33Isa isa wono asuni sina mecheti; rakkateti. Isa isa wona dey es effatena shana kar'na asuni meyaneen ane zomo sineti boor'a shana ephpha taaseti.34Nitto ma'ar dey wonna wonna fooni otmanti samak faanamato ariti boor'a taatoni meyak kenashteti. Nittor sina foontiis oottefana kabaasik fakira es wuzason girak ephpha taati.35Ese akama wossuma danati amantooson ha'utiita.36Ha'oosi fiqadinon zagira Ha'oos nittok imanak girina abdini kaamaason danak fakiyak ooda sholsifa.37Es barik dey ekka yistera tichche:«Es yooni bar garo wonaneen orfo yoona;aafa dey wokana wuza.38Taar sina ooko asus amantok kaak foona;sinuntano orfo wolifaanane;barik aafa girona wuza.»39Sinuntano inno amanere farsoni baasso keenteno orfo wolsere tishuni asuni meeni keentewa.