ISANZU Bible Version14
1Lʉhikʉ lʉng’wɨ nʉla kʉsupya Yesʉ naɨ wanilwe wendelya ndya mʉnyʉmba mʉtongeeli ʉng’wɨ nʉa Apalisayo, antʉ aɨ atungɨe amʉone ʉkʉtendaʉli.2Pantongeela akwe aɨ ʉkolɨ mʉntʉ nʉkete ndwala akʉimba mʉɨlɨ wakwe wɨhi.3Yesʉ akaakolya amanyisi amalagɨɨlyo nɨa Palisayo, “Itɨɨ, igombigwene kʉponya mʉlʉhikʉ nʉla kʉsupya, ang’wɨ shanga igombigwe?”4Ingɨ nɨanso ɨhi akakɨlaja ihɨtwɨ. Kʉlʉlo ʉ Yesʉ akamʉamba ʉmʉlwae nʉanso akamʉponya, akamʉɨla walongole kitolakwe.5Sʉnga akaakolya, “Nyenyu mʉng’wanyu anga ʉng’waakwe ang’wi mʉtugo wakwe ʉgwɨle mikombo Lʉhikʉ nʉla Kʉsupya, shanga ʉkʉkaya kʉmʉpumya mʉ Lʉhikʉ nʉla Kʉsupya?”6Akaleng’wa kʉmʉsʉkɨɨlya ikolyo nɨlanso.7Yesʉ naɨ waaona antʉ naɨ anilwe akiaja kʉduma matuntu akʉntongeela ikiɨ matungo akʉlya, akaapumɨlya mpyani ɨyɨ,8“Anga mʉntʉ wakane mʉwɨnga, leka kitanguzɨɨlya kikaɨla ituntu nɨla ʉkʉligwa, angaitye wanilwe mʉkʉlʉ mʉngɨɨza kʉkɨla ʉewe.9Anga ʉtende itɨ ʉyʉ nʉmanile ʉnyenye nɨ mɨabɨɨlɨ wɨkapembya wakʉɨle. ‘Mʉlekele ʉyʉ ituntu nɨlanso.’ Papogwa ʉkihumya mɨnyala paantʉ ɨhi, ʉkʉlongola wikiɨ kʉ matuntu nɨshanga aakʉlʉ.10Ingɨ nʉʉkʉpembya ʉyʉ nʉkanile, wakʉɨle, ‘Mʉhʉmba mɨane pembya kʉnʉ wikiɨ mituntu nɨla ʉkʉlʉ.’ Papo gwa ʉkʉtula wakʉligwaa ntongeela aantʉ ɨhi nɨakʉgozee.11Kʉnsoko nanso, mʉntʉ wɨhi nʉikʉlyaa ʉkʉninopigwa, nʉyʉ nʉininompyaa ʉkʉkʉligwa.”12Sʉnga Yesʉ akamʉtambʉɨla ʉyʉ nʉanile, “Anga ʉnoneelye iloeelya nɨlandya ng’ʉng’wɨ ang’wi ʉtikʉ, leka kana iahʉmbaɨako ang’wi alunaako ang’wi anyadʉgʉ ako nianyakɨsalɨ ako nɨagolɨ, kʉnsoko anga ʉtende itɨ, nɨenso ahume kʉana kʉmatolao akʉtula akʉsʉkɨɨlya ayo naɨʉatendee.13Ingɨ anga ʉnoneelye iloeelya, ane aʉla nɨalema nɨakɨtele nɨapoku,14anga witʉme itɨ ʉkʉkembetwa ni Itunda, kʉnsoko nɨanso agila nɨkakʉʉsʉkɨɨlya ʉewe ʉkʉsʉkɨɨligwa lʉhikʉ nʉla kiʉkigwa ɨantʉ nɨagombekile kʉng’wi Itunda.”15Itɨ gwa naɨwija inkani izi mʉntʉ ʉng’wɨ naɨwikalanilye nʉ Yesʉ akalʉnga, “Ʉkembetilwe mʉntʉ ʉyo nʉʉzɨɨzalya indya miloeelya nɨla Ʉtemi wang’wi Itunda.”16Yesʉ akamʉsʉkɨɨlya, “Mʉntʉ ʉng’wɨ aɨ ʉnonilye iloeelya ikʉlʉ, akana antʉ ɨdʉ ikɨlo.17Naɨapika matungo akandya iloeelya, akamʉlagɨɨlya ʉmitʉmi wakwe waaɨla awo naɨanilwe, ‘Kɨlanyi maintʉ ɨhi akonda.’18Ingɨ awo naɨanilwe akandya kilongola ʉng’wɨ ʉng’wɨ. Nʉa ng’wandyo akamʉile ʉmitʉmi, ‘Ʉnene ngʉile mʉgʉnda, ntakɨwe nende ʉgoza, ndeke nongole.’19Nʉmʉya akalʉnga. ‘Ngʉile ng’ombe ikʉmi niyakʉlɨmɨla, itɨ gwa itungo ɨlɨ nongoe kʉigemela, kʉlompa ngombye nongole.’20Nʉmʉya akalʉnga, ‘Ntɨnile mʉsʉngʉ mahikʉ yaya, kʉleng’wa kʉpembya.’21“Mitʉmɨ nʉanso akatʉlya nʉ kʉmʉɨla ʉmʉkola iloeelya nkani nianso. Mʉkola iloeelya akahʉng’wa ikuo, akamʉlagɨɨlya ʉmitʉmi wakwe, ‘Kayanga longola mʉmapanda nʉ mʉminsambwa anzɨla aisalɨ, ʉalete iaula nɨakɨtele nɨalema niapoku.’22Itungo ʉdu, ʉmitʉmi nʉanso akamʉɨla ʉmʉkola iloeelya ‘Mʉkʉlʉ wane, makani ɨhi itʉng’waa anga naza ʉlagɨɨye, nɨitɨga lyoma lɨkɨlɨ lɨkolɨ mʉnyʉmba iloeelya.’23Mʉkʉlʉ nʉanso akamʉɨla ʉmitʉmi wakwe, ‘Longola mʉmapanda nʉ mʉminsambwa nzɨla mʉisalɨ niino mʉapele ɨatʉ kʉpembya ɨnyʉmbane izʉle.24Kʉnsoko, kʉmʉɨla, mʉantʉ awo naza anilwe ahita, kʉtilɨ anga mʉntʉ wɨhi nʉkʉlʉlya indya miloeelya lane.”’25Antʉ aɨ ɨkʉɨlania nʉ Yesʉ, akaapɨlʉkɨla akaaɨla,26“Mʉntʉ wɨhi anga walowe kʉtula mʉmanyisigwa wane, ʉtakɨwe wandowe ʉnene kʉkɨla nʉaloilwe ihe nʉnyinya nʉmʉsʉngʉ wakwe nɨana akwe aheʉ akwe nɨaluna akwe nɨakɨsʉngʉ, hangɨ ʉtakɨwe wandowe hanza ʉnene kʉkɨla nʉiloilwe nʉanso. Anga wahite kʉtenda itɨ shanga ʉhumile kʉtula mʉmanyisigwa wane.27Mʉntʉ wɨhi nɨshanga ʉgombile kagigwa nʉkʉsha nʉtyatile, shanga ʉkʉtula mʉmanyisigwa wane.’28Kʉnsoko itɨ nyenyu mʉng’waanyu nʉloilwe kʉzenga nyʉmba amatapaali, nɨshanga ʉkikiɨ nʉkʉaɨɨlya ɨmaintʉ wahume kʉlɨnga ʉketene ingulu niakʉkondya ʉlʉzengo?29Anga ize shangaʉʉ, anga wakondye kʉgʉmɨla imagwe mʉmʉkuɨla, waleng’we kʉkondeelya ɨantʉ akʉmʉheka,30azelʉnga, ‘aza ʉkidaya kʉzenga, kʉnʉ mʉgila anga lʉgʉlʉ nʉla kʉzenga.’31“Ntambʉle mpyani ngɨza, ‘anga itule ʉkolɨ mʉtemi ʉtakile kenda kikʉa nʉ mʉtemi mʉngɨɨza, itɨɨ, shanga ʉkikiɨ hanza nʉkʉsɨganɨɨlya anga ɨze ʉkʉhuma, nʉanso nɨanyambita akwe magana anzogu ikʉmi lɨng’wɨ ʉkʉhuma kikʉa nʉ mʉtemi nʉkete anyambita magana anzogu makʉmi abɨɨlɨ?32Anga waone shanga ʉkʉhuma, ʉkʉlagɨɨlya amalʉme akwe aze akɨlɨ akolɨ kʉlɨ ende alompe igombye.33Iti ʉʉ, Yesʉ akalʉnga, “kʉtilɨ ga nʉng’wi mʉng’waanyu nʉʉkʉtula mʉmanyisigwa wane anga wahite kʉhʉlya maintʉ ɨhi nʉmakete.’34“Mʉnyʉ ingɨ ʉza, anga ʉpele kʉkoela, ʉkʉlʉngɨlwa ntʉni ʉkoele?35Mʉnyʉ nʉanso shanga ʉtakɨwe kʉɨkʉlwa mihalʉ ang’wi mʉʉtinko. Antʉ ɨʉhunʉlaa kʉli. Nʉkete kʉtwɨ nʉije.”
The Word for the World International