AGALATIA5

1Kilisito wakʉpee widesi, wɨkalowa kʉsage mʉwidesi. Kʉlʉlo imɨki mikomeelye mʉleke kʉgomba hangɨ kʉsʉka mʉlwago nʉla ʉtʉʉng'wa nʉwa malagɨɨlyo.2Tegeelyi. Ʉnene Paʉlo, kʉmʉɨla anga mʉgombe kʉtalwa kiganda kʉnsoko akʉtyata malagɨɨlyo ang'wa Mʉsa, ʉ Kilisito shanga ʉkʉmʉaɨɨlya anga kɨntʉ kɨhi.3Kʉtambʉla kɨhenga hangɨ, mʉntʉ wɨhi nʉkʉgomba kʉtalwa kiganda kʉnsoko akʉtyata malagɨɨlyo ang'wa Musa, ʉtakɨwe watyate ɨmalagɨɨlyo ɨhi nang'wa Musa.4Ʉnyenye mʉkʉduma kʉgombeka kʉng'wi Itunda kʉkɨɨla kʉamba amalagɨɨlyo ang'wa Mʉsa, kʉnzɨla nanso mɨkoma kʉlɨ nʉ Kilisito, mʉkolɨ kʉlɨ nʉ ʉkende wang'wi Itunda.5Ʉsese kipande litʉ, kʉlindɨɨe isʉmbɨɨlyo kʉngulu a Ng'wahʉ Ng'welʉ kʉgombeke kʉng'wi Itunda kʉkɨɨla kʉmʉhʉɨɨla ʉ Kilisito.6Ndogoelyo anga ɨze kʉkamɨnkana nʉ Kilisito Yesʉ, kʉtalwa kiganda kʉnsoko akʉtyata malagɨɨlyo ang'wa Mʉsa ang'wɨ kʉlekwa kʉtalwa kiganda shanga kɨntʉ, nɨkɨtakɨwe ingɨ kituma mʉlɨmo kʉʉlowa papo yikʉlagɨɨla ʉhʉɨɨli witʉ.
7Aɨmʉtongolomokile iza mʉ ʉhʉɨɨli! Nyenyu nʉmʉgɨɨye kʉtyata itai?8Itunda nʉmitangile shanga ʉsakilye makani aya.9Ʉmanyisi ʉwʉ nʉwa ʉteele wɨhanga, amila nkehʉ nɨgasisa utu wɨdʉ.10Nɨhʉɨɨe mʉʉkamɨnkani wanyu ni Isekʉlʉ, shanga mʉkʉpɨʉlwa mʉtyate ʉmanyisi ʉngɨza. Ingɨ mʉntʉ wɨhi nʉkʉmʉkongela ʉnyenye ʉkʉpɨsɨɨligwa ni Itunda, shanga yʉkʉkelwa nʉanso nyenyu.
11Anyandʉgʉ ane ingɨ ʉnene anga ɨze nkɨlɨ nongolekile kʉatanantɨlya antʉ atalwe kiganda kʉnsoko akʉtyata malagɨɨlyo ang'wa Mʉsa, nɨkɨ kagigwa? Anga ɨze kʉtanantya itɨ ʉtanantyɨ wane nʉwa nsha ang'wa Kilisito mʉ mʉsalaba shanga ʉkʉatasha Ayahudi.12Bahu antʉ nɨanso nɨakʉmʉnyoma azaitule enso.
13Ʉnyenye anyandʉgʉ ane, aɨmitangilwe mʉhege mʉʉtʉng'wa, widesi wanyu ʉleke kʉtula nsoko akʉmʉsasha mʉtyate kɨlaku laku ka mʉɨlɨ, ingɨ mɨhi mɨaɨɨlye kʉ ʉlowa.14Kʉnsoko malagɨɨlyo ang'wa Musa ɨhi alamɨigwe kʉtyata ilagɨɨlyo lɨng'wɨ, “Mʉlowe ʉmɨako anga nʉwiloilwe ʉewe.”15Angamilʉmange nʉkidedʉlanga anga ɨkalɨ, kendegeli mʉleke kilimansɨɨlya.
16Kʉlʉlo nʉngile itɨ, mʉtongwe nʉ Ng'wahʉ Ng'welʉ, nʉnyenye anga mʉtende itɨ shanga mʉkʉtyata kɨlaku lakʉ ka mʉɨlɨ.17Ndogoelyo, kɨlaku lakʉ ka mʉɨlɨ kikʉngʉma nɨ Ng'welʉ Ng'welʉ, nɨ Ng'welʉ Ng'welʉ nɨ kɨlaku lakʉ nɨmʉkete mʉmɨɨlɨ anyu. Maintʉ aya nabɨɨlɨ shanga ɨzigombilye nʉ kʉnsoko nanso ʉnyenye shanga mʉhumile kitʉma aya nɨmʉloilwe.18Anga mʉtongwa nʉ Ng'wahʉ Ng'welʉ, shanga mʉkʉtongwa nɨ malagɨɨlyo ang'wa Musa.19Itɨ gwa, intendo niya mʉɨlɨ ingɨ yɨgeeʉ nizo sizi, ʉgoolyi, ʉsambo, ʉdosi,20kʉkʉlya adʉdʉ, ʉlogi, wiimbɨli, wilei, wɨlu, ikuo, ʉbɨ wankolo, wikʉngʉmi, minyomo,21wibɨpɨlwi, ʉgala ntʉlɨ, ʉlaku nɨ makani mangɨza nimpyani naya. Kʉmʉhugulya hangɨ anga nazantongee kʉmʉhugulya kɨna, antʉ nɨɨtende ntendo niyanso, shanga akingɨla mʉʉtemi wang'wi Itunda.
22Mʉntʉ nʉwɨtongwa nʉ Ng'wahʉ Ng'welʉ ʉkʉtula nʉ wilowi nʉ ʉlowa nʉ matiliga nʉ wiʉmɨɨlyi nʉ ʉkende nɨ nkolo nza nʉ kʉhʉɨɨlwa,23nʉ ʉpolo nʉ kihama. Kʉtilɨ ilagɨɨlyo nɨlɨhumile kʉgilya mʉntʉ waleke kitʉma makani aya.24Antʉ ɨhi nɨakamɨnkanile nʉ Kilisito Yesʉ akomile mʉmʉsalaba masɨgoao nɨmabɨ ni ilakulaku nimbɨ naɨakete.25Ng'wahʉ Ng'welʉ wakʉpee ʉpanga, kʉmʉleke wakʉtonge.26Itɨ gwa, kʉleke kiketa nakanda, kʉleke kisokoolya ang'wɨ kionela wɨlu.

The Word for the World International

https://app.library.bible/content/a61fa9a81f3a5fa3