Aepeso4

1Itɨ gwa, ʉnene nɨntungilwe kʉnsoko akʉmitʉmɨla Isekʉlʉ, kʉmʉlompa mishiɨ likalo anga nɨmʉtakɨwe mʉwitangwi wanyu.2Mʉzeleka kikʉlya hangɨ mʉzeleka kʉmalya. Ɨze mɨagimyi nʉkitegeelya kʉ ʉlowa.3Kagupi kʉsʉnja ʉkamɨnkani nʉletilwe nʉ Ng'wahʉ Ng'welʉ, kishiɨ palʉng'wɨ kʉ matiliga.4Ʉkolɨ mʉɨlɨ ʉng'wɨ nʉ Ng'wahʉ ʉng'wɨ, anga Itunda naɨʉmʉhoile mʉtule nisʉmbɨɨlyo lɨng'wɨ du.5Hangɨ ʉkolɨ Isekʉlʉ ʉng'wɨ nʉ ʉhʉɨɨli ʉng'wɨ nʉ ʉbadisigwa ʉng'wɨ du.6Itunda ingɨ ʉng'wɨ hangɨ ingɨ Tata waantʉ ɨhi, nʉtemile maintʉ ɨhi, witʉma mʉlɨmo kʉkɨɨla sese kɨhi hangɨ wishiɨ mʉng'witʉ kɨhi.
7Mʉntʉ wɨhi ʉpewe kɨpegwa anga mʉloewe ʉ Kilisito kʉmʉpa.8Yɨyo ndogoelyo wandɨkwa wang'wi Itunda nʉwandɨkilwe, “Aɨʉlumile migʉlya nangalu, wɨkahola atungwa, wɨkaapumya kɨpegwa.”
9Itɨ gwa nɨyandɨkilwe kɨna, “aɨʉlumile migʉlya nangalu kʉng'wi Itunda,” ndogoelyo akwe ntʉni? Ndogoelyo akwe ingɨ ʉ Kilisito aɨʉsimile hanza mihɨɨ.10Kilisito naɨʉsimile mihɨɨ, ng'wenso aɨʉlumile migʉlya kʉkɨla igʉlʉ lɨhi ingɨ watule ʉkolɨ nkɨka yɨhi.11Kilisito yʉyo “naɨʉapee antʉ ipegwa”, wikaaɨka nɨangɨza kʉtula itʉmi nɨ antʉ ang'wɨ kʉtula amanga nɨ antʉ ang'wɨ kʉtula atanantya Nkani Nza nɨ antʉ ang'wɨ kʉtula adɨmi nɨ antʉ ang'wɨ kʉtula amanyisi.12Ingɨ aɨʉtendile itɨ kʉanoneelya antʉ ang'wi Itunda kʉnsoko a mʉlɨmo wakwe nʉwakʉtula akomu anga nʉwɨlɨ ʉmʉɨlɨ wang'wa Kilisito.13Nɨitɨ ʉsese kɨhi kʉpikɨɨle mʉhangʉ nʉwa ʉhʉɨɨli nʉkʉmʉlɨnga Ng'wana wang'wi Itunda, kʉtule antʉ nɨakulaa nʉ kʉʉpikɨɨla ʉkondanɨɨli wang'wa Kilisito ng'wenso.14Itɨ gwa, shanga kʉtula anga ang'enya nɨadabʉ, nʉkʉlutwa nʉ ʉmanyisi wɨdʉ nʉ ʉkʉletwa nɨantʉ nɨɨkongelana ahume kʉalimɨlya antʉ ang'wɨ kʉ ʉmanyisi wao nʉwa ʉteele.15Kɨmɨkɨɨli kakwe, kʉzitambʉɨla ɨtai kʉ ʉlowa, kʉkʉle mʉ makani ɨhi, nʉkʉmʉpikɨɨla ng'wenso nɨɨza mʉtongeeli ingɨ Kilisito.16Ʉsakilye mʉɨli wɨhi ʉkamɨnkane nʉkʉhongekeelya nʉ mʉkano ʉng'wɨ. Kʉnʉ ipiliga lɨhi litʉma mʉlɨmo wakwe, ɨlɨ lɨsasha mʉɨlɨ wɨhi ʉkʉle nʉkizenga mʉʉlowa.
17Nkete lʉkani nʉlakʉmʉɨla kʉʉhumi wang'wi Isekʉlʉ, kʉmʉhʉgʉlya, leki kʉlongoleki kishiɨ anga antʉ nɨshanga amʉhʉɨɨe Itunda, antʉ nɨanso masɨgoao nɨɨza mabɨɨ.18Antʉ nɨanso agila anga mahala hangɨ akomilwe kʉlɨ nʉ ʉpanga wang'wi Itunda. Kʉnsoko aʉpʉngʉ nʉ lʉgoha lao.19Antʉ awa agila mɨnyala itʉma ʉbɨɨ hangɨ aile asambo. Kʉlʉlo alongolekile kitʉma makani ɨhi na ʉdosi.
20Ingɨ ʉnyenye shanga aɨmʉmanyisigwe itɨ apo naɨmamʉlɨnga ʉ Kilisito.21Nɨngile ʉnyenye aɨmigulye kɨsa mpola yakwe, hangɨ anga mʉtule mɨahemba akwe mʉmanyisigwe makani atai napumile kʉng'wa Yesʉ.22Aɨmʉmanyisigwe mʉleke ʉʉbɨɨ wanyu nʉwakalɨ anga mʉntʉ nʉkʉtugʉla ngʉo, ntendo yanyu niyakalɨ, naɨimʉgazangilwe nɨkɨlakulaku kakwe nɨka ʉkongelani,23mʉnkolo mʉhume kʉtendwa mɨapya mʉmasɨgo nintendo yanyu.24Hangɨ mʉtule nʉlikalo nʉlʉpya anga ni Itunda aɨʉmʉʉmbɨle kimpyana nʉ ng'wenso, ɨze mʉgombekile lʉkʉlʉ nʉkʉleka kʉsokigwa ni Itunda.
25Kʉlʉlo leki ʉteele, mʉntʉ wɨhi ʉtakɨwe wazetambʉla ɨtai, kʉnsoko ʉsese kɨhi kɨmapiliga mʉmʉɨlɨ wang'wa Kilisito.26Anga mʉhung'we ikuo, mʉleke kʉgomba ikuo lanyu lɨmʉsashe kitʉma mʉlandʉ, hangɨ lyoa lɨleke kʉhaɨɨla ɨze mʉkɨlɨ mʉhumilwe ikuo.27Ikuo lɨkʉmʉpa lyoma ʉ Shetani wamʉhume.28Mʉntʉ wɨhi nɨmii, waleke kia, witʉme mɨlɨmo nɨmɨza kʉmɨkono akwe, walije miaɨlɨlyo akwe nʉkʉmʉgeela mʉkʉmbɨli.29Leki kʉtambʉli nkani nɨmbɨ, ingɨ mʉzɨtambʉlya nkani ninza nɨyihumile kʉaɨɨlya antʉ nɨangɨza. Itɨ gwa nkani nɨmʉkʉtambʉla yiakendepe antʉ nɨamʉtegeeye.30Hangɨ leki kʉsashi ʉkɨa kʉ Ng'wahʉ Ng'welʉ wang'wi Itunda. Itunda aɨʉkʉpee Ng'wahʉ Ng'welʉ anga kɨɨkɨli kɨna ʉnyenye mɨantʉ akwe hangɨ kɨna ʉkʉmʉsʉnja kʉpikɨɨla lʉhikʉ nʉkʉmʉkomola.31Itɨ gwa, leki ʉ wilei, ang'wɨ ikuo nʉ ʉtaki ni iyogo ni itʉki. Mʉleke kitʉma ʉbɨ wɨhi.32Mʉtule nɨ nkolo nza hangɨ mʉntʉ wɨhi wamʉaisɨɨlye ʉmʉya. Milekela anga Itunda naɨʉmʉlekee ʉnyenye kʉkɨɨla Kilisito.

The Word for the World International

https://app.library.bible/content/a61fa9a81f3a5fa3