2 Akolinto3
1Itɨɨ, ʉsese kʉandya kɨkoola ne? Itɨɨ, kʉʉhiya balʉa ne nakikoola kʉng'wanyu, ʉsese shanga anga antʉ nɨangɨza nɨɨlompa balʉa akikoola kʉ ng'wanyu?2Ʉnyenye ingɨ mɨbalʉa itʉ nɨandɨkilwe mʉnkolo yitʉ nɨmanyɨkile nʉkʉsong'wa nɨ antʉ ɨhi ahume kumanya mʉlɨmo nɨkitumile kʉng'wanyu.3Ingɨ ɨtai kɨna ʉnyenye mʉmanyɨkile kɨna mɨbalʉa nɨpumɨɨe kʉng'wa Kilisito, naɨʉmɨtae kʉkɨɨla ʉsese. Nɨshanga ɨandɨkilwe kʉ wino, ingɨ kʉ Ng'wahʉ wang'wi Itunda nʉ mʉpanga, shanga ɨandɨkilwe mʉng'waigwe nʉsesilwe, ingɨ mʉnkolo ya ana antʉ.4Kʉhumile kʉtambʉla aya kʉnsoko isʉmbɨɨlyo litʉ nɨkʉkete kʉng'wi Itunda kʉkɨɨla makani nʉkʉtende ʉ Kilisito.5Shanga kʉhumile kitʉma kɨntʉ kɨhi kʉngulu yitʉ, ingɨ ʉhumi witʉ wɨhi wɨpuma kʉng'wi Itunda.6Itunda yʉyo wɨkakʉaɨɨlya ʉsese kʉlɨtʉmɨla Ilago Nipya shanga ilago nɨlamalagɨɨyo naandɨkilwe, ingɨ Ilago la Ng'wahʉ. Kʉnsoko malagɨɨlyo naandɨkilwe ileta nsha, ingɨ Ng'wahʉ wɨleta ʉpanga.7Malagɨɨlyo aɨ aɨkilwe akaze aandɨkilwe mʉ ana magwe. Ɨmpelo akwe ingɨ nsha, ʉkʉlʉ wakwe wɨkatula ʉkʉlʉ nangulu nɨ ana Aisilaeli ɨkaleng'wa kʉʉgoza ʉsʉ wang'wa Musa kʉnsoko aʉmɨlɨgɨntu wakwe. Hangi ʉmɨlɨgɨntu nʉwanso aɨwitungo ikupɨ. Kʉitɨ, anga ɨtule malagɨɨlyo naɨasakilye ɨnsha iletilwe kikʉlyo nikʉlʉ itɨ,8ʉʉgwa mʉlɨmo nʉwa Ng'wahʉ wang'wi Itunda ʉkete ʉkʉlʉ nangalu.9Anga itule mʉlɨmo nʉwanso nʉwɨsasha ʉlamʉlwi kʉ antʉ ʉkete ikʉlyo, kʉlʉlo ikʉlyo nɨla mʉlɨmo nʉwɨasasha antʉ agombeke kʉng'wi Itunda ingɨ ʉkʉlʉ mbele.10Kʉlʉlo ikʉlyo nɨ Lilago la kalɨ lalimansɨɨla, kʉnsoko ikʉlyo Lilago Nipya nikʉlʉ ikɨlo lahola ɨlyoma lakwe.11Anga ɨze ɨkɨ nɨkɨkɨla kɨkete ikʉlyo lakwe, ʉʉgwa ɨkɨ nɨkakishiɨ kalɨ na kalɨ kɨkʉtula nɨkʉlyo ikʉlʉ nangalu12Kʉnsoko ɨlɨ lɨlɨ isʉmbɨɨlyo litʉ, ʉsese kʉʉligitya kʉngulu yɨhi kɨagila anga woa.13Ʉsese shanga kʉʉtenda anga Musa naɨʉtakɨwe kʉkunɨkɨla ʉsʉ wakwe kʉ kɨtambala Aisilaeli aleng'we kʉona ʉsʉ wakwe kʉpikɨɨla ʉmɨlɨgentu ʉwo naɨ ʉkʉzizɨɨla.14Ingɨ Aisilaeli ɨpilimig'wa mahalaao, sambʉnʉyʉ anga lɨsong'we Ilago nɨla Kalɨ shanga ɨlɨnga ɨtai. Kɨtambala nɨkanso kɨkʉhega ʉdu anga mʉntʉ wamʉhʉɨɨle ʉ Kilisito.15Sambʉnʉyʉ nakʉsong'wa malagɨɨlyo ang'wa Musa mahalaao iza akɨlɨ akunɨkɨwe shanga ɨlɨnga ɨtai.16Ingɨ, anga Wandɨkwa wang'wa Mʉsa nʉwandɨkilwe kɨna, “Mʉntʉ anga wamʉgombe Isekʉlʉ kɨtambala nɨkanso kɨhegigwa.”17Itɨ gwa “Isekʉlʉ” ingɨ Ng'wahʉ, napo nʉkolɨ ʉ Ng'wahʉ wang'wi Isekʉlʉ papo widesi ʉmolɨ.18Itɨ gwa, ʉsese kɨhi nɨɨza shanga kʉkunɨkɨwe ʉsʉ witʉ, kɨona ʉkʉlʉ wang'wi Isekʉlʉ anga mʉkɨyoo, kʉ ʉkaɨlwa kimpyane nangalu nʉng'wenso kʉpuma ʉkʉlʉ kenda ʉkʉlʉ, nʉwanso ingɨ mʉlɨmo wa Ng'wahʉ wang'wi Isekʉlʉ.
The Word for the World International