1 AKOLINTO14
1Longoleki kilowa, hangɨ kagupi kʉsɨngɨɨlya ipegwa ningɨɨza kʉpuma kʉ Ng'wahʉ wang'wi Itunda, nɨkɨkʉlʉ kɨpegwa nɨkakʉtanantya ʉlʉkani lang'wi Itunda.2Nʉkʉligitya ɨntambʉ na kɨgeni shanga wɨligitya nɨantʉ ingɨ wɨligitya ni Itunda kʉnsoko kʉtilɨ mʉntʉ nʉɨmʉlɨnga, nʉwanso wɨligitya kʉ ngulu aNg'wahʉ ɨmakani aya antʉ nɨshanga amalɨngile.3Ingɨ nʉkete ɨkɨpegwa kakʉtanantya ʉlʉkani nʉlang'wi Itunda wɨligitya nɨantʉ wɨzeamanyisa nʉkʉaaɨɨlya nʉkʉakomelya nkolo kʉmʉhʉɨɨla Itunda.4Nʉkʉtambʉla kʉntambʉ nʉpewe Nʉng'wahʉ wang'wi Itunda wimanyisa ʉng'wenso, ingɨ nʉkete ɨkɨpegwa kakʉtanantya ʉlʉkani lang'wi Itunda ʉkʉmanyisa antʉ nɨamʉhʉɨɨe ʉKilisito.5Itɨ gwa, azandoilwe ʉnyenye mɨhi mʉligitye ntambʉ nɨmʉpewe nʉ Ng'wahʉ Ng'welʉ, ingɨ ndoilwe lʉkʉlʉ mʉtule nɨkɨpegwa kakʉtanantya lʉkani lang'wi Itunda. Kʉnsoko mʉntʉ nʉkete ɨkɨpegwa kakʉtanantya ʉlʉkani lang'wi Itunda ingɨ wɨaɨɨlya ɨantʉ kʉkɨla mʉntʉ nʉkʉtambʉla kʉ ntambʉ nakɨgeni. Ingɨ itakɨwe pang'wanso wazeʉkomolɨ mʉntʉ nʉwakʉnononsola ɨmakani nanso nakʉtambʉlwa, ingɨ antʉ nɨamʉhʉɨɨe ʉKilisito ahume kʉaɨɨligwa.6Itɨ gwa anyandʉgʉ ane, aganɨze kitolanyu ndigitye kʉ ntambʉ akɨgeni ɨkʉmʉaɨllya ntʉni? Shanga ɨkʉmʉaɨlya anga kɨntʉ. Ingɨ anga nʉmʉtambʉɨle ʉlɨngi nʉwa kɨtʉnga ang'wɨ lʉkani lang'wi Itunda ang'wɨ ʉkunʉkʉlwa wang'wi Itunda ang'wɨ nʉmanyise papo kʉmʉaɨɨlya.7Niintʉ niigila ʉpanga niyɨpumya ʉlʉli anga pɨlɨmbɨ ang'wɨ kɨnanda. Itɨɨ, mʉntʉ ʉhumile ʉlɨ kʉlɨnga ɨlyɨmbo nɨlɨkɨmbwa anga maintʉ nanso shanga yʉkʉpumya ʉlʉli anga nitakɨwe?8Mpembe anga ɨkʉwe ɨhite kʉlɨngwa antʉni, nyenyu nʉkihamba kʉ mbita?9Itɨʉ nʉnyenye, angamʉtambʉle nkani nɨshanga imanyɨkile, nyenyu nʉkʉlɨnga nɨmʉkʉtambʉla? Nkani yanyu yʉkʉtula shakaʉ.10Ingɨ mihɨɨ yimolɨ ntambʉ yɨdʉ, kʉtilɨ ga nɨyɨ nɨng'wɨ nɨngila ɨndogoelyo.11Ingɨ anga ɨze shanga nɨngile ndogoelyo antambʉ nʉkʉligitya mʉntʉ mʉngɨɨza, ʉnene nɨmʉgeni kʉ mʉntʉ nʉwanso nʉng'wenso mʉgeni kʉng'wane.12Nʉnyenye, kʉnsoko ʉdu mʉkete ɨnsʉla kʉtula niipegwa niya Ng'wahʉ, kagupi nangalu kʉlija nipegwa niyakʉaɨlya kʉamanyisa antʉ nɨamʉhʉɨɨe ʉKilisito.13Kʉlʉlo, mʉntʉ nʉkʉtambʉla ntambʉ nakɨgeni nʉwalompe apegwe ʉhumi nʉwa kʉnononsola14Kʉnsoko, anga nompe kʉntambʉ akɨgeni, nkolo ane yɨyo ɨkʉlompa, ingɨ ɨmahala ane magila nga mʉlɨmo.15Ntendeʉlɨ gwa? Kʉlompa mʉnkolo ane, hangɨ kʉlompa kʉmahala ane. Kɨmba kʉnkolo ane, hangɨ kɨmba kʉmahala ane.16Anga ʉmʉkʉlye Itunda kʉnkolo ako du, ʉkʉlumɨɨlyaʉlɨ mʉntʉ mʉngɨɨza nʉmolɨ pamilʉndo walʉnge, “Ɨtai”, anga ɨze shanga ʉlɨngile nʉkʉligitya?17Malompi ako nakʉmʉkʉlya Itunda ahumile atule maza tai, ingɨ shanga akʉaɨɨlya antʉ nɨangɨɨza.18Nʉmʉsongeeye Itunda kɨna ʉnene kʉligitya ntambʉ akɨgeni kʉkɨla ʉnyenye mɨhi.19Ingɨ mʉmilʉndo nʉwa ahʉɨɨli ntakile kʉligitya nkani itaano niilɨngɨkile ingɨ nɨamanyise nɨantʉ angɨɨza, kʉkɨla kʉligitya nkani elupu niya ntambʉ akɨgeni.20Anyandʉgʉ ane, leki kʉtuli anga ang'enya, mʉmakani nɨmabɨ mʉtule anga ang'enya nɨadabʉ, ingɨ nɨmʉkʉsɨga mʉtule anga antʉ nɨakʉlʉ.21Mʉwandɨkwa wang'wi Itunda yandɨkilwe, Isekʉlʉ ʉtambʉe itɨ, “Kʉkɨɨla antʉ nɨakʉntambʉla kʉ ntambu akɨgeni, nʉkʉkɨɨla antʉ nɨageni, Kʉligitya nɨantʉ awa. Nɨitɨga antʉ ane shanga akʉntegeelya.”22Kʉlʉlo gwa, ingɨ kɨpegwa kakʉligitya kʉntambʉ akɨgeni ingɨ kɨlɨngansɨlyo, shanga kʉantʉ nɨakete ʉhʉɨɨli, ingɨ kʉantʉ nɨshanga amʉhʉɨɨɨe ʉKilisito, ingɨ ɨkɨpegwa nɨkakʉtanantya ʉlʉkani lang'wi Itunda ingɨ kʉantʉ awo nɨahʉɨe shanga nɨshanga amʉhʉɨɨe ʉKilisito.23Itɨ gwa, antʉ ɨhi nɨɨamʉhʉɨɨe ʉKilisito nɨakʉtankana palʉng'wɨ, ɨhi azetambʉla ntambʉ akɨgeni, anga apike antʉ nɨshanga alɨngile ɨntambʉ nanso ang'wɨ nɨshanga amʉhʉɨɨe ʉKilisito, itɨ, shanga akʉlʉnga kɨna ʉnyenye mɨahaline?24Ingɨ anga ɨze mʉntʉ wɨhi ʉkʉtanantya lʉkani lang'wi Itunda anga wapike mʉntʉ nɨshanga ʉhʉɨɨɨe, mʉntʉ nʉwanso anga wije ʉkʉtambʉlwa ʉbɨ wakwe, mʉntʉ nʉwanso nʉkija ʉkilamʉla ng'wenso.25Makani napihilwe mʉnkolo akwe akʉpihʉlwa nʉ mʉntʉ nʉwanso ʉkʉtugama nʉkʉmʉkʉlya Itunda, wazelʉnga, “Ɨtai Itunda ʉkolɨ palʉng'wɨ nʉnyenye!”26Anyandʉgʉ, kʉlʉnge ʉlɨ gwa? Nɨmʉkʉtankana palʉng'wɨ kʉmʉkʉlya Itunda, nʉntʉ ʉng'wɨ wɨmbe ɨlyɨmbo, nʉmʉya wamanyise, nʉmʉya watule nʉkʉnʉkʉɨlwa kʉpuma kʉng'wi Itunda, ʉmʉya witʉmɨle ɨkɨpegwa nɨkakʉligitya kʉntambʉ nɨngeni nʉmʉya anononsole makani aya nakʉtambʉlwa. Ɨhi atule kʉnsoko akʉaaɨɨlya antʉ nɨamʉhʉɨɨe Itunda.27Anga ɨze amolɨ antʉ nɨakʉtambʉla ntambʉ nɨngeni, aligitye abɨɨlɨ abɨɨlɨ ang'wɨ ataatʉ taatʉ, aleke kʉkɨlɨnkɨla azeligitya ʉng'wɨ ʉng'wɨ, hangɨ wazʉmole ʉyʉ nʉwa kʉnononsola makani nakʉtambʉlwa.28Ingɨ anga ɨze kʉtilɨ nʉkʉnononsola, papo ʉgwa, nʉkʉtambʉla ɨntambʉ akɨgeni wakilage, nʉwaligitye ni Itunda.29Nɨ antʉ awo nɨa amanga ang'wi Itunda apumye ʉmanga nʉwang'wi Itunda nɨang'wɨ alamʉʉle makani aya nakʉtambʉlwa.30Ingɨ mʉntʉ ʉlongolekile anga wahole mʉloto kʉpuma kʉng'wi Itunda, nʉkʉtambʉla nʉmʉya, anga mʉntʉ mʉngɨɨza pang'wanso wamʉtegeelye mʉntʉ ʉyʉ naza ʉkʉtambʉla nʉwakilaje.31Kʉndogoelyo mɨhi mʉhumile kʉtambʉla ʉmanga kʉpuma kʉng'wi Itunda, ʉng'wɨ ʉng'wɨ mɨhi mʉhume kimanyisa nʉkikomelya nkolo.32Nɨakete kɨpegwa ka kʉtanantya lʉkani lang'wi Itunda, atakɨwe akɨhume ɨkɨpegwa kao,33kʉnsoko Itunda shanga waminyomo ingɨ Itunda nʉwa matiliga.34Anga niyɨlɨ Mʉnyʉmba ang'wi Itunda kwe, asʉngʉ nɨakilaje ɨhɨtwɨ mʉmilʉndo nʉwahʉɨɨli ang'wi Itunda, Shanga agombigwe kʉligitya ingɨ atule nʉlwiji anga natambʉe malagɨɨlyo.35Anga ɨzeakete makolyo, aakolye agohaao kʉmatolao, kʉnsoko mɨnyala mʉsʉngʉ kʉligitya mʉmilʉndo nʉwahʉɨɨli ang'wi Itunda.36Itɨɨ, mʉlʉngile ʉlʉkani lang'wi Itunda lʉpumile kʉng'wanyu? Ang'wɨ lʉmɨzɨɨe ʉnyenye dune?37Mʉntʉ anga walɨnge kɨna nʉwanso ingɨ mʉmanga wang'wɨ ʉkete kɨpegwa kang'wi Itunda mʉntʉ nʉwa nʉwanso walɨnge nanso nɨkʉmʉandɨkɨla, kɨna malagɨɨlyo ang'wi Isekʉlʉ.38Ingɨ mʉntʉ nɨshanga ʉkʉlɨnga nanso, ʉgwa, leka kʉmʉkela ʉmʉntʉ nʉwanso.39Itɨ gwa, anyandʉgʉ ane, mʉtakiwe kʉtula nɨnsʉla akʉtanantya ʉlʉkani lang'wi Itunda, ingɨ mʉleke kʉmʉgilya ʉmʉntʉ nʉkʉtambʉla kʉntambʉ nɨngeni.40Kʉlʉlo makani ɨhi itʉng'we anga mʉitakɨwe.
The Word for the World International