Rud3
Rud ye Boas ke Isọñ Ukọkabakpa
1Usen keed Nọọmi ekaebe Rud amaabo anye, “Ayịn awonwaan mmi, ana ami ñyem ufọk unọ fiin, itie se ediinekke ise ñkpọ ubaña fiin.2Sese Boas, ake afo anamma utom ye mme ibaan amọ, ado ayịnete ñnyịn. Akonayio ami anye ayaakeñ mbio asio ke baali ke afe ubeek abakpa.3Yie idem, fiọññọ pefium, ñnyʌñ sịne ataa uyaiya afọñ mfo. Ndin kaa afe ubeek abakpa, ado kuuyak anye adiọọñọ ke afo mmọdo aba do tutu anye adia ñkpọ anyʌñ anwọñ ukọd ama.4Ke ini anye asuuhọ ana, diọọñọ itie a-anye anaaha. Ndin kaa ke fʌkkọ ukod amọ nyʌñ suuk naa. Anye ayaudọkkọ fiin se uduunam.”5Rud amaabọọrọ, “Ami ñyaanam afịd se afo abo yak nnam.”6Ndin anye amaadakka akaa afe ubeek abakpa akenam afịd se ekaebe amọ akebo anye anam.7Ke ini Boas adiaha ñkpọ anyʌñ anwọñ ñkpọ ama, anye amaakaa akena ke akpatre utịd eboho mme mfịd. Rud amaadakka usʌk-usʌk akaa, akefʌkkọ anye ukod asuuk anaa.8Ke ufọọd akonayio ñkpọ amaadịkke ete ado; anye akanna idem, ndin awonwaan mmọdo ana anye ke ukod!9Anye amaabịp, “Afo ado anie?”Anye amaabọọrọ, “Ami ndo Rud ayịnufọk mfo.” Adian ndo, “Tat utọñ ewịra mfo mfʌk miin, sia afo adooho andifak anọọ mme mbon ekpək ñnyịn.”10Anye amaabọọrọ, “Ayịn mmi awonwaan, Abọọñ udiọñ fiin. Mfọn anye ami a-akpon akan anye a-afo akeñwọttọ miin akpa ini koo: Afo ufegheke ukeene ntək ñkparawa, me e-enie akʌk me inieghe.11Ndin idahami, ayịn mmi awonwaan, kuukop ndịk. Ami ñyaanam afịd se afo abeeñe unọ fiin. Afịd awo ke idʌñ ñnyịn e-ediọọñọ ke afo ado awonwaan a-anieghe eti edu.12Akpesʌkado ado akpanikọ ke ami ndo andifak isọñ nnọọ ekpək ñnyịn, aba awo mfen anekkeke awuana ñkpọ añkan miin.13Ba mi akonayio ami tutu ubakusen, adieke anye ayemme adinam utom amọ nte andufak a-aseeghe ñkpọ ubaña, a-afọn; yak anye ufak fiin. Ado adieke anye imiimaaha, adaña nte Abọọñ aduuho uwem ami ñyaanam. Naa mmi tutu ayio asiere.”14Ndin anye amaanaa ke ukod amọ tutu ayio asiere, ado amaabak ademme mbemiso awo adiọọñọ; anye amaanyʌñ abo, “Inaaha awo ndomokeed adiọọñọ ke awonwaan amaadi afe ubeek abakpa.”15Anye amaamaana abo, “Ben adifʌhọ afọñ a-afo asịneke do di dette nnọ.” Ke ini anye akenamma ntoro, anye amaanwañña mfịd baali ñkpọ nte udomo itiokeed adọñ anọ anye anyʌñ adịppe anọ anye. Ndin anye Boas atịmme anyọñ abio.16Ke ini Rud akekaaha abịne ekaebe amọ, Nọọmi amaabịp anye, “Ayịn awonwaan mmi akeba die?”
Ndin anye amaadọkkọ anye afịd se Boas akenam anọ anye17anyʌñ adian do, “Anye amannọ miin udomo baali itiokeed abo, ‘Kuunyọñ ubịne ekaebe mfo ubọk-ubọk.’ ”18Ndin Nọọmi amaabo, “Ayịn awonwaan mmi, bet, tutu afo adiọọñọ se itịppe. Sia ete ado idiiduọkkọ adudu tutu anye adiọọñọ iwuod ñkpọ ado mfịn.”
Biblica, Inc.