Nọmba19
Mmọọñ Uyet Idiọọkñkpọ
1Abọọñ amaabo Moses ye Erọn:2“Ami ado se mbed ayem A-Abọọñ akewuuhọ: Dọkkọ nditọ Isrel yak edat ndad-ndad ñyịn umanenañ a-afọnnọ, imiinieghe ndo inyʌññọ isịne ke akpọnọ.3Ben anye nọ Eliasa a-adooho aku; yak eben anye ewuọ ekpọñ itie nnaa enyʌñ ewot anye ke iso amọ.4Ndin Eliasa a-adooho aku anie adideep usʌk iyiib ke nnuunubọk ammọ anyʌñ asiime ke iso atayad mbono akañ itiaba.5Ke ini anye adaaha akpeme, ana efọp ñyịn umanenañ ado, ikpa amọ, abʌk, iyiib ye mme nsia.6Aku ayaadat eto sida, haisọb ye ndad-ndad idededọñ anyʌñ atoomo ammọ adọñ ke ikañ e-efọppọ ñyịn umanenañ ado.7Ke ami aboiyoke, ana aku ayeet mme afọñ amọ anyʌñ akama mmọọñ ayie idem. Ndin anye akeme adidọọk ndi ke itie nnaa, ado anye adiido ndedeghe tutu ndubiayio.8Awo andifọp anye ñko ana ayeet mme afọñ amọ anyʌñ akama mmọọñ ayie idem, ndin anye ñko ayaado ndedeghe tutu ndubiayio.9“Awo a-asanake ayaawoppo ntọñ ñyịn umanenañ ado anyʌñ abon ammọ ke itie a-asanake ke esiin itie nnaa. Ana nditọ Isrel enịm ntọñ ado nọ esisịn ammọ ke mmọọñ e-ekamake enam ñkpọ asana; anye ado ke edat enam uwa idiọọkñkpọ.10Ana awo a-awoppoke ntọñ ñyịn umanenañ ami ñko ayeet afọñ amọ; anye ayaanyʌñ ado ndedeghe tutu ndubiayio. Anye ami ayaado nsi-nsi ewʌhọ anọ nditọ Isrel ye mme adidʌñ e-edʌññọ ke atu ammọ.11“Awo akeedodo a-atuuhọ akpo awo ñkpa ayaado ndedeghe ke usen itiaba.12Ana nte ammọ eyie idem ammọ ke mmọọñ ado ke ayọhọ usen ita ye ke ayọhọ usen itiaba, ndin ammọ eyaesana. Ado adieke ammọ imiiyieghe idem ke ayọhọ usen ita ye ke ayọhọ usen itiaba, ammọ idiisanake.13Adieke ammọ etreke ediyie idem ke emaeketuuk akpo awo, ammọ esappa adisana itie Abọọñ. Ana ebịne ammọ esio ke Isrel. Sia awo ikisiimeke ammọ mmọọñ uyet idiọọkñkpọ, ammọ edo ndedeghe; ndek ammọ adiana ammọ ke idem.14“Ami ado mbed a-anaaha enịm adieke awo akpaaha ke atayad: Awo akeedodo a-adʌkkọ atayad ye awo akeedodo a-asịneke ke esịd eyaedo ndedeghe ke usen itiaba,15ndin afịd iko a-anaaha inwañ i-imiinieghe ukʌb se ekʌp anye emʌm ekama ayaado ndedeghe.16“Awo keed akeedodo ke anwa a-atuuhọ awo e-ekewotto ke akañkañ me awo a-akpaaha ñkaña ñkpa, me awo a-atuuhọ akpọ awo ñkpa me udi, ayaado ndedeghe ke usen itiaba.17“Amaado ake ndedeghe awo, sịn etək ntọñ a-atooho uwa e-ekefọppọ adinam asana ke usan nyʌñ tọkkọ mmọọñ idịm duọk.18Ndin awo a-adooho adisana anie adidat etək haisọb, anyiin anye ke mmọọñ ado anyʌñ asiime ke atayad ye afịd ñkpọ mbana ufọk ye mme awo e-ebaaha do. Ana anye anyʌñ asiime awo akeedodo a-aketuuho akpọ awo ñkpa me udi me awo akeedodo e-ekewotto me awo akeedodo a-akekpaaha ñkaña ñkpa.19Awo a-asanake anie adisiime mbon se imiisanake ke ayọhọ usen ita ye ke ayọhọ usen itiaba, ndin ke ayọhọ usen itiaba anye anie adinam ammọ esana. Ana mbon e-enamma nọ esana eyeet afọñ ammọ enyʌñ eyie idem ke mmọọñ, ndin ke ndubiayio ado ammọ eyaesana.20Ado adieke mbon e-edegheke imiiyieghe idem ammọ, ana ebịne ammọ esio ke abio, sia ammọ e-esappa adisana itie Abọọñ. Awo isiimeke ammọ mmọọñ uyet idiọọkñkpọ, ammọ edoñño ndedeghe.21Ami ado nsi-nsi ewʌhọ anọ ammọ.“Awo a-asiimeke mmọọñ uyet idiọọkñkpọ ana anyʌñ ayeet afọñ amọ ñko, ndin awo akeedodo a-atuuhọ mmọọñ uyet idiọọkñkpọ ayaanyʌñ ado ndedeghe tutu ndubiayio.22Ñkpọ akeedodo a-ndedeghe awo atuuhọ akappa ado ndedeghe, ndin awo akeedodo a-atuuhọ anye akappa ado ndedeghe tutu ndubiayio.”
Biblica, Inc.