Lefitikọs1
Ufọfọb Uwa
1Abọọñ amaakoot Moses, anyʌñ atie ke atayad mbono atañ ikọ anọ anye. Anye amaabo Moses ate,2“Dọkkọ nditọ Isrel bo: ‘Ke ini awo ndufo ndomokeed abenne enọ asọk Abọọñ, yak aben unam ato ke atu udịmenañ me atu udịmedọñ adi.3“ ‘Enọ ado akpedo ufọfọb uwa a-atooho udịmenañ, afo anie adiwa ayaara i-imiinieghe ndo. Ana afo aben anye akenọ ke inuausʌñ atayad mbono, nọ ato do Abọọñ adiibọ anye.4Afo anie adiben ubọk mfo ndot ke iwuod ufọfọb uwa ado, ndin eyaebọ anye ke iwuod mfo nọ edat enam ñkpeubọk unọ fiin.5Afo anie adiwot ñyịn ayaaraenañ ado ke iso Abọọñ, ndin nditọ ideen Erọn, mme aku, eyaeben iyiib ado enyʌñ esiime ekanna akpokoro uwa ke inuausʌñ atayad mbono.6Afo anie adiyaara ikpa ufọfọb uwa ado, anyʌñ akpok anye ñkeñe-ñkeñe.7Nditọ ideen aku Erọn enie adisịn ikañ ke akpokoro uwa ado, enyʌñ eneeñe ifia edọñ ke ikañ.8Ndin nditọ ideen Erọn e-edooho mme aku, eyaeneeñe mme ñkikʌk unam ado, akọrọ ye iwuod ye akpọñ, ebono ke ifia a-asakka ke akpokoro uwa.9Afo anie adidat mmọọñ ñyet ñkpọ mme ñkpọ esịd idịb ye mme ukod, ndin aku anie adifọp afịd ñkpọ ado ke akpokoro uwa. Anye ado ufọfọb uwa, uwa ndidia, uwa a-anemme ufịk anọ Abọọñ.10“ ‘Uwa ado akpedo ufọfọb uwa a-atooho ufene, me ato edọñ me ato ebod, afo anie adinọ ayaara i-imiinieghe ndo.11Afo anie adiwot anye ke akpokoro uwa ukañ adoro, ke iso Abọọñ, ndin nditọ ideen Erọn, mme aku, eyaeben iyiib ado esiime ekanna akpokoro uwa.12Afo anie adikpok anye ñkeñe-ñkeñe, ndin aku ayaaneeñe ammọ abon, ye iwuod ye akpọñ ke ifia a-asakka ke akpokoro uwa.13Afo anie adiyet mme ñkpọ esịd idịb ye mme ukod ke mmọọñ, ndin aku anie adiben afịd mme ñkpọ ado ndifọp ke akpokoro uwa. Ado ufọfọb uwa, uwa ndidia, uwa a-anemme ufịk anọ Abọọñ.14“ ‘Adieke uwa e-eyemme adinọ Abọọñ adooho ufọfọb uwa e-ekamake mme inuen, afo anie adinọ ibiom, imiidooho afo anọ ñyịn abomoñkuku.15Aku anie adiben anye ndi akpokoro uwa, ana afiakka anye itọñ asio, anyʌñ afọp anye ke akpokoro uwa; ndin anyịmme iyiib ado asio aduọk ke mben akpokoro uwa.16Anye anie adisio akpənitọñ, afịp ñwa amọ, anyʌñ atop ammọ abon ke ukañ usakkautịn akpokoro uwa, ke itie a-ntọñ abonoke.17Anye ayaasiak anye akʌppọ ke mba, ado idiaññake isio afịd-afịd, ndin aku ayaafọp anye ke ifia a-asakka ke akpokoro uwa. Ami ado ufọfọb uwa, uwa ndidia, uwa a-anemme ufịk anọ Abọọñ.Biblica, Inc.