Mme Abiideikpe17
Mme Isen Abasi Maika
1Akekem awo keed a-akekereke Maika ke abod abio Ifrem,2amaabo eka amọ, “Sekel silfa ikie duob mme keed (1,100) ado ekuubọọhọ fiin do, a-ami ñkekoppo naña afo asịn isuuñọ, mmọdo aba ye ami; ami ñkeben anye.”Akem eka amọ amaabo, “Abọọñ udiọñ fiin, ayịn mmi!”3Ke ini anye akebenne sekel silfa ikie duob mme keed (1,100) akenọ eka amọ, eka amọ amaabo, “Ami ke ayọhọ ukpono mmeyaak silfa mmi nnọ Abọọñ nọ ayịn mmi adat anam usọ mbid awo e-edatta silfa enam. Ñyaatịmme ñyaak anye unọ fiin.”4Ndin ke anye amaaketịmme akenọ eka amọ silfa ado, eka amọ amaaben sekel silfa ikie iba (200) akenọ anamusọ silfa, a-akedatta ammọ anam asen abasi. Ndin emaeben asen abasi ado ekewuuk ke ufọk Maika.5Ndin Maika amaanie ñwommo, ndin anye amaanam afọñ aboditọñ keed ye mme abasi ufọk ammọ anyʌñ atem ayịn amọ keed ke atu nditọ amọ nte aku.6Ke ini ado Isrel ikinieghe adidem; afịd awo ekenam ñkpọ naña ammọ ekemama enyʌñ ekere ke anen.7Akparawa Lifai keed a-aketooho Betlehem ke Yuda, a-akesidʌññọ ke ubon Yuda,8amaakpọñ abio Betlehem ke Yuda akeyem itie mfen se anye adʌñ. Ke usʌñ anye amaadiwakka ufọk Maika ke abod abio Ifrem.9Maika amaabịp anye, “Afo ato uke?”
Anye amaabọọrọ, “Ami ndo Lifai, nto Betlehem ke Yuda. Ami ñyeem itie nte ndʌñ.”10Ndin Maika amaabo anye ate, “Dʌñ ye ami nyʌñ do ete mmi ye aku, ndin ñyaunọ fiin sekel silfa duob ke isua, afọñ mfo ye ndidia mfo.”11Ndin Lifai ado amaanyịmme adidʌñ ye anye, ndin akparawa ado amaakappa atie nte keed ke atu nditọ ideen amọ.12Akem Maika amaanam Lifai ado akappa ado aku anyʌñ adʌñ ke ufọk amọ.13Ndin Maika amaabo, “Idahami mmediọọñọ nte ke Abọọñ ayaafọn ye ami, sia Lifai ami adooho aku mmi.”
Biblica, Inc.