Mme Abiideikpe13
Emana Samsịn
1Ini mfen mbon Isrel emaetịmme enam se idiọọk ke iso Abọọñ, ndin Abọọñ amaayaak ammọ asịn ke ubọk mbon Filistia ke isua aba.2Awo Sora keed, a-akekereke Manoa, a-aketooho ubon Daan, amaanie anwaan a-akedooho ada, a-mmiikikanna iman ayịn.3Akem enyere Abọọñ amaabiọññọ anọ anye anyʌñ abo, “Afo ado ada unyʌññọ unie ayịn, ado afo ayaayommo anyʌñ aman ayịn.4Idahami kịt bo ke afo unwọññọ ukọd ndomokeed me ndañ ukọd; mfen ñko ke afo unyʌññọ udia ñkpọ se imiisanake.5Afo ayaayommo anyʌñ aman ayịn awodeen a-adooho akadañ inaaha atuuk iwuod amọ sia ayịn ado adiido Nasariin, a-anieghe Abasi tọọñọ ke idịb. Anye adiida iso ke adinyaaña Isrel nsio ke ubọk mbon Filistia.”6Ndin awonwaan ado amaakaa abịne ebe amọ anyʌñ akedọkkọ anye ate, “Awo Abasi keed amaadi ambịne miin. Anye aketie nte enyere Abasi, anie uteeñe eti-eti. Ami ñkibịppe anye itie nte anye aketo adi, anye ikiinyʌññọ indọkkọ miin anyịñ amọ.7Ado anye amaambo miin, ‘Afo ayaayommo anyʌñ aman ayịn awodeen. Idahami ndin, kịt bo ke imọ inwọññọ ukọd me ndañ ukọd; mfen ñko ke unyʌññọ udia ñkpọ ake imiisanake, sia ayịn ado adiido Nasariin a-anieghe Abasi tọọñọ ke idịb tutu usen ñkpa amọ.’ ”8Ndin Manoa amaabọñ akam anọ Abọọñ ate, “Dakka nọ ayịnufọk mfo, Abọọñ. Ami mmuubeeñe fiin yak anam awo Abasi ado afo akedọññọ inọọ ñnyịn amaana atịmme adikpeep ñnyịn naña idiikama ayịn ado a-adi imana.”9Abasi amaakop anọ Manoa, ndin enyere Abasi ado amaatịmme adi abịne awonwaan ado ke ini anye akebaaha ke inwañ; ado ebe amọ Manoa ikibaaha ye anye.10Anwaan ado amaasọp isañ akaa aketañ anọ ebe amọ ate, “Anye mmọ mi! Awodeen a-akebiọññọke annọọ miin usen anye ako!”11Manoa amaadakka ada anyʌñ akeene anwaan amọ. Anye amaakedisịme awodeen ado, anye amaabo, “Nte afo ado awo aketañña ikọ anọọ anwaan mmi?”Anye amaabọọrọ ate, “Ami ke ado.”12Ndin Manoa amaabịp anye ate, “Mme ikọ mfo emaewuọ isu, nsoo idiido mbed a-adiikaara uwem ayịn ami ye ubọkutom amọ?”13Enyere Abọọñ amaabọọrọ Manoa, “Anwaan mfo ana nte anam afịd se ami ñkedọkkọ anye.14Inaaha anye adia ñkpọ ndomokeed a-atooho fain, me anwọñ ukọd ndomokeed me ndañ ukọd me adia ñkpọ ndomokeed i-imiisanake. Ana nte anye anam afịd ñkpọ se ntemme anye.”15Manoa amaabo enyere Abọọñ, “Ñnyịn ikpaima afo atie tutu ñnyịn item ñyịn ebod unọ fiin.”16Enyere Abọọñ amaabọọrọ, “Akpekọm afo ammʌm miin anịm ukad, ami ndiidiaha ndidia mfo ndomokeed. Ado adieke afo anamma ufọfọb uwa, wa anye nọ Abọọñ.” (Manoa ikiidiọọñọke ke anye akedo enyere Abọọñ.)17Ndin Manoa amaabịp enyere Abọọñ, “Nsoo ido anyịñ mfo, nọ ñnyịn idu ukpono fiin ke ini ikọ mfo awuọhọ asu?”18Ado enyere Abọọñ amaabọọrọ, “Nsoo inam nọ afo ambịp miin anyịñ mmi? Anye ado ayañña awo ifiọk.”19Ndin Manoa amaaben ñyịn ebod, ye uwa ñkpasi, anyʌñ adoot anye ke itiad awa anọ Abọọñ. Akem Abọọñ amaanam ataa utịppeñkpọ ke ini Manoa ye anwaan amọ ekedaaha ese20naña edemeikañ asak awuọ ke akpokoro uwa adọọk anyọñ, enyere Abọọñ amaadọọk ke edemeikañ ado. Ke ekịtte ami, Manoa ye anwaan amọ emaeduọññọ ekʌp iso ke isọñ.21Ke ini enyere Abọọñ imiikitịmmeke idiwọt Manoa ye anwaan idem amọ, Manoa ndin amaadiọọñọ ke anye akedo enyere Abọọñ.22Manoa amaadọkkọ anwaan amọ “Ebiere inọ ñnyịn edikpañña! Ñnyịn imikịt Abasi!”23Ado anwaan amọ amaabọọrọ, “Akpedo Abọọñ amaayem adiwot ñnyịn, anye ikpiikibọọhọ ufọfọb uwa ye uwa mfịd inwañ ke ubọk ñnyịn, me adiwọt ñnyịn afịd mme ñkpọ ami me ñkpọ anye idọkkọke ñnyịn idahami.”24Ndin awonwaan ami amaaman ayịn awodeen anyʌñ asio anye anyịñ Samsịn. Anye amaakọt ndin Abọọñ amaanyʌñ adiọñ anye,25ndin Sịbidịd Abọọñ amaatọọñọ adibukko anye ke ini anye akebaaha ke Mahane Daan, ke ufọọd Sora ye Estaol.
Biblica, Inc.