Yọsua6
1Ndin emaenekke esọọñọ mme inuaatob Yeriko ke ntak nditọ Isrel. Awo ndomokeed ikiwuọhọwuọ, awo ndomokeed ikinyʌññọ idọdʌk.2Ndin Abọọñ amaabo Yọsua ate, “Sese, ami mmeyaak Yeriko usịn fiin ke ubọk, ye adidem amọ ye mbon unwana ekọñ amọ.3Saña kanna abio ado akañ keed ye afịd mbon ekọñ. Nam ami ke usen itiokeed.4Yak mme aku itiaba ekama adukpoñ nnʌk akukịmedọñ ke iso akebe edioomo. Ke ayọhọ usen itiaba, isaña ikanna abio ado akañ itiaba, ke ini mme aku efịtte adukpoñ.5Umaukop naña ammọ efịt anyan uyio ke adukpoñ, yak afịd mbon ekọñ ebọñ ñkpo ke akpọsọñ uyio; ndin ndibene abio ado ayaaduọ, ndin udịmekọñ ye afịd awo eyaeboiyo edʌk.”6Ndin Yọsua ayịn Nọn amaakoot mme aku anyʌñ abo ammọ ate, “Ndufo iben akebe edioomo Abọọñ inyʌñ inam aku itiaba ekama adukpoñ ebem anye iso.”7Ndin anye amaanọ mbon ekọñ uyio ate, “Itọọñọ isañ! Isaña ikanna abio, yak mbon se ikama ñkpọ ekọñ eboiyo akebe edioomo Abọọñ iso.”8Ke Yọsua amaaketañ ikọ ye atu awo ima, mme aku itiaba e-ekebiommo adukpoñ itiaba ke iso Abọọñ, emaeboiyo iso esʌk efịt adukpoñ, mbon e-ekebiommo akebe edioomo Abọọñ enyʌñ ekeene ammọ ke edem.9Mbon ekọñ emaebem mme aku e-ekefịtte adukpoñ iso, mbon ekọñ mfen emaenyʌñ ekeene akebe edioomo ke edem. Afịd ini ami esʌk efịt adukpoñ.10Ado Yọsua amaanọ mbonekọñ uyio ate, “Ndufo ikiisio ñkpo ekọñ, ikiibenne uyio, ikiitañ ikọ ndomokeed tutu akem usen se ami ndiibo yak ebọñ ñkpo. Ndin ndufo ebọñọ ñkpo!”11Ndin anye amaanam eben akebe edioomo Abọọñ esaña ekanna abio ado akañ keed. Ndin mbon ekọñ emaetịmme enyọñ itie nnaaekọñ ekedaiya.12Yọsua amaabak ademme edem usen, ndin mme aku emaeben akebe edioomo Abọọñ ebiom.13Mme aku itiaba ado e-ekekamake adukpoñ itiaba emaeboiyo iso, esaña ke iso akebe edioomo Abọọñ esʌk efịt adukpoñ. Mbon ekọñ emaeboiyo iso, mbon ukpeme akebe edioomo Abọọñ emaekeene, ke ini adukpoñ akekaaha iso afịt.14Ke ayọhọ usen iba ammọ emaesaña ekanna abio akañ keed enyʌñ etịmme enyọñ itie nnaaekọñ. Ammọ emaenam ntom ke usen itiokeed.15Ke ayọhọ usen itiaba, ammọ emaebak edemme ke usiere enyʌñ esaña ekanna abio akañ itiaba ke ukem-ukem usʌñ, ado ke usen ado, ammọ ekekanna abio akañ itiaba.16Ke ayọhọ akañ itiaba, ke ini mme aku ekefịtte adukpoñ, Yọsua amaanọ mbon ekọñ uyio ate, “Ibọñ ñkpo! Sia Abọọñ ayaak abio inọ ndufo!17Enie adinịm abio ye afịd se idọñọ ke esịd asaña-asaña nte ñkpọ nsobo nnọọ Abọọñ. Sʌk Rahab, akpara ado, ye afịd mbon se iba ye anye ke ufọk amọ ediidu uwem, sia anye amaadịp mbon uyeb a-ñnyịn ikidọññọ utom.18Ado ndufo ikiisaña ikpere mme asaña-asaña ñkpọ nsobo, mbaak ndufo ediben nsobo inọọ idem ndufo ke adidat mme ñkpọ ado. Imiidooho ntoro eyaenam itie nnaaekọñ Isrel akappa ado ñkpọ nsobo enyʌñ edat mfịna esọk anye.19Afịd silfa ye kold ye mme ñkpọ brọns ye ukwak edo ndisana enọ Abọọñ ndin ana edọñ ke itie unịmñkpọ amọ.”20Ke ini mme adukpoñ ekefịtte, mbon ekọñ emaesio ñkpo, ndin ke uyio adukpoñ, ke ini ideen ekesioho akpọsọñ ñkpo, ndibene amaaduọ; ndin afịd awo emaebʌññọ edọñọ, ndin emaenyʌñ edat abio ado.21Ammọ emaeyaak abio enọ Abọọñ enyʌñ ekama akañkañ esobo afịd mme aduuwem ñkpọ ke esịd, ideen ye ibaan, ikpọawo ye ntəkayịn, mme enañ, mme edọñ ye mme dọñki.22Yọsua amaabo awo iba e-ekekeyeppe isọñ ado ate, “Ikaa ufọk akpara ado inyʌñ ikisio anye ye afịd se inie anye idi, kpa naña ndufo ekenwọñọ enọọ anye.”23Ndin mme ñkparawa e-ekekaaha uyeb emaedʌk ekesio Rahab, ete ye eka amọ, nditọeka amọ ideen ye ibaan ye afịd se ikinie anye ewuọ edi. Ammọ emaesio afịd ufọk amọ edi enyʌñ enịm ammọ ke itie keed ke esiin itie nnaaekọñ Isrel.24Ndin ammọ emaefọp afịd abio ye afịd se idọñọ ke esịd amọ, ado emaedọñ mme silfa, kold ye mme ñkpọ brọns ye ukwak ke itie unịmñkpọ ke ufọk Abọọñ.25Ado Yọsua amaayaak Rahab, akpara ado, ye ubon amọ ye afịd mbon se anye akenie, sia anye amaadịp mbon se Yọsua akedọñ eka uyeb ke Yeriko, ndin anye mmọdo adʌñ ke atu nditọ Isrel tutu mfịn.26Ke ini ado Yọsua amaanam saña-saña enwọñọ ami: “Adọdiọọk ke iso Abọọñ anọ awo a-ayemme adimaana mbọp abio Yeriko ami, Yeriko:“Ado akpan amọke anye adiidat isịn itiad idakisọñ;ado akpeedem ayịn amọke anye adiidat ikọọk mme inuaatob amọ.”27Ndin Abọọñ amaaba ye Yọsua, ndin etob amọ amaasuana ke afịd idʌñ.
Biblica, Inc.