Yems2
Ekpan Adusad
1Nditọeka mmi ke Krais, mbon e-enịmme Abasi ke akpanikọ, enyʌññọ enie mbuọdidem ke mfọn ubọọñ Abọọñ Yisọs Krais, inaaha enam adusad.2Akpedo anam awo a-asịneke ñkpannuun kold ye uyaiya afọñ adʌk adi ufọkabasi ndufo, ndin uweene awo a-asịneke ntaha afọñ ñko adʌk adi.3Adieke ndufo enọọhọ awo a-asịneke uyaiya afọñ asaña-asaña ukpono enyʌñ ebo, “Se eti itie mfo mi,” ado ebo uweene awo, “Afo da do,” me “Tie ke isọñ ke mben ukod mmi,”4nte ndufo isịnne adusad ke atu idem ndufo, ndin enyʌñ ekpe ukuañ ikpe ke idiọọk akikere?5Ikpañ utọñ, mme ndima nditọeka ke Krais. Nte Abasi imekke mbon e-edoññoke uweene ke anyen ederimbod nọ edido imọ ke mbuọdidem enyʌñ eben abioubọọñ a-anye akenwọñọke anọ mbon e-emaaha anye enie?6Ado ndufo ememiom mme uweene. Nte idooho mme imọ awo edo mbon itʌkkọ ndufo? Idooho ammọ iben ndufo eka ikpe ke esob?7Idooho ammọ edoñño mme andisappa anyịñ Abasi a-adooho andinie ndufo.8Adieke ndufo etʌmmọ enịm mbed a-ndufo ekịtte ke ñwed Abasi, “Ma mbọhọidʌñ mfo nte idem mfo,” emenam se ido adinen.9Ado adieke ndufo ewọttọ adusad, ndufo emenam idiọọkñkpọ ndin i-ibiom ndufo ikpe nte mme abiad mbed.10Sia awo akeedodo a-anịmme afịd mbed ado akpu ke keed kpọd aba ke ubiomikpe adibiat afịd mbed.11Sia andikibo, “Kuusịn efịbe,” akenyʌñ abo, “Kuuwot awo.” Adieke afo umuusịnne efịbe ado awot awo, afo ado abiad mbed.12Itañ ikọ inyʌñ inam ñkpọ nte mbon se ediikpe ikpe inọ ikeene mbed a-asioho awo ke ufʌn.13Sia ubiideikpe a-ananake mbọm ado se ediinọ awo akeedodo imiinieghe mbọm. Mbọm akpon akan ubiideikpe!Mbuọdidem ye Adinam
14Nsoo ido ufọn, nditọeka mmi ke Krais, adieke awo abooho ke iminie mbuọdidem ado inieghe adinam ndomokeed? Nte utọ mbuọdidem ado akeme inyaaña anye?15Ikere ise, adieke ayịneka ke Krais iminieghe afọñ se asịne me ndidia se adia,16ndin keed ke atu ndufo abo anye, “Nyọñ ke emem; sịne afọñ fuuk idem nọ afiop, nyʌñ dia ñkpọ nọ uyʌkkọ,” ado inamma ñkpọ ndomokeed ibaña unana ikpọkidem ammọ, nsoo ufọn iba do?17Ke ukem usʌñ ami, mbuọdidem ke idem amọ, adieke imiisañake ye adinam, a-akpa.18Ado awo ayaabo, “Afo amenie mbuọdidem; ami mmenie adinam.”Ñwọt miin mbuọdidem mfo i-imiisañake ye adinam, ndin ami ñyauwọt fiin mbuọdidem mmi ato ke se ami nnam.19Afo amenịm abo ke Abasi keed aba. Afọn! Ukem-ukem ado ñko ke mme dimọn enịm, ndin enyʌñ ekop akpọsọñ ndịk.20Afo ndisịme awo, afo ayem idiọọñọ a-awọttọ ke mbuọdidem i-imiisañake ye utom ado ikpu-ikpu?21Ado nte awo ikikereke ke ete ñnyịn Ebraham amaanen ke se anye akenam ke ini anye akekaaha adiwa ayịn amọ Aisik ke akpokoro uwa?22Ndufo emekịt ke mbuọdidem amọ ye mme adinam amọ akesaña keed, ndin emaenam mbuọdidem amọ ayọhọ ke se anye akenam.23Ndin se ekewet ke ñwed Abasi amaasu, a-abooho ke, “Ebraham amaanịm Abasi ke akpanikọ, ndin emaebat ado enọ anye nte adinenido,” ndin emaenyʌñ ekoot anye ufan Abasi.24Ndufo emekịt ke awo anen ato ke se anye anam, itooho ke mbuọdidem ikpọọñ.25Ke ukem usʌñ ado, ado nte awo ikikereke ke Rehab, awonwaan akpara, amaanen ato ke se anye akenam ke ini anye akenọọhọ mbon uyeb itie nnaa ndin asio ammọ unyọñ ke afañ mfen?26Kpa naña ikpọkidem i-miinieghe sịbidịd akpa, kpa ntoro ke mbuọdidem i-imiisañake ye utom akpa.
Biblica, Inc.