Esra3
Adimaana Mbọp Akpokoro Uwa
1Ke ini ayọhọ afiọñ itiaba amaakedisịm nọ nditọ Isrel eketekke eba ke mme abio ammọ, mme awo emaedisoobo idem itie keed ke Yeruselem.2Akema Yọsua ayịn Yosadak ye mme aku mfen ye Serubabel ayịn Sieltiel ye mme nsaña amọ emaetọọñọ edibọp akpokoro uwa Abasi Isrel nọ enam ufọfọb uwa ke itie ado, nọ asaña akekem se ewet ke Mbed Moses, awo Abasi.3Akpesʌkado ndịk mbon se ikiba ikanna ammọ akenamma ammọ, ammọ emaebọp akpokoro uwa ke anyọñ itie itiad idakisọñ amọ, enyʌñ enam ufọfọb uwa do enọ Abọọñ, kpa mme uwa ake ubakusen ye ake ndubiayio.4Ndin nọ asaña akekem naña ekewet, ammọ emaenam Usọrọ mme Tabanakịd ye akemibad ñkpọ ufọfọb uwa se ekebiere enịm enọ usen keedekeed.5Ado amaakeboiyo, ammọ emaewa ufọfọb uwa ke ini ke ini, mme uwa ake Ufa Afiọñ, ye mme uwa ekenịmme enọ mme ndisana usọrọ Abọọñ, ye mme mbon se ekeben edi nte mme uwa enọ imaesịd enọ Abọọñ.6Ke akpa usen ke ayọhọ afiọñ itiaba, ammọ emaetọọñọ adinam ufọfọb uwa nnọọ Abọọñ, akpesʌkado awo ikisịnne itiad idakisọñ tembịd diin.Adimaana Mbọp Tembịd
7Ndin emaenọ mme abọbufọk ye mme adomusọ akʌk; enọ mbon Sidọn ye Tai ndidia ye ukọd ye adan ọlif, nọ ammọ ekoono mme ekpad sida esaña ke inyañ eto Lebanọn ekewuọ Yopa, kpa naña Sairọs adidem Pesia akenọọ ammọ uyio.8Ke ayọhọ afiọñ iba ke ayọhọ isua iba ke ammọ emaekediwuọ ufọk Abasi ke Yeruselem, Serubabel ayịn Sieltiel, Yọsua ayịn Yosadak ye mme mbon awo mfen (mme aku, mme Lifai, ye afịd mbon ñko e-eketooho ñkọbntem edisịm Yeruselem) emaetọọñọ utom. Ammọ ekemek mme Lifai ekesọññọ isua edịb me akanna ado yak ese ñkpọ ebaña ubọbufọk Abọọñ.9Yọsua ye mme nditọ ideen amọ ye mme nditọeka ideen amọ ye Kadmiel ye nditọ ideen amọ (nditọ ake Hodafia) ye nditọ ideen Henadad ye nditọ ammọ ideen ye nditọeka ammọ ideen, afịd mme Lifai emaediana keed ke adise anyen ke mbon se ikinam utom ke ufọk Abasi.10Ke ini mme abọbufọk emaekesịn itiad idakisọñ tembịd Abọọñ, mme aku ke mme nsiine ammọ ye mme adukpoñ ammọ, ye mme Lifai (nditọ ideen Asaf) ye mme ñkukwak, emaedat itie ammọ ke aditooro Abọọñ, ekeene usʌñ mbed naña adidem Isrel, Defid, akenọọ uyio.11Ammọ emaekwọ itooro ye ekọọm ami enọ Abọọñ:“Anye a-afọn ido;ima a-anye anieghe anọ Isrel, asʌk adada ke nsi-nsi.”Ndin afịd mme awo emaekwọ ke akpọsọñ uyio enọ Abọọñ.12Ado uwak mme aku, Lifai ye mme adaaha ke mme ubon, emaekpoon awo ke isua emana, e-emaekekekịt akaan tembịd, emaesio ñkpo etua ke ini ammọ ekekịtte naña esịn itiad idakisọñ tembịd, ke ini uwak mbon mfen ekesioho ñkpo idaara.13Awo ndomokeed ikikanna idiọọñọ me akedo uyio ayịd me akedo ñkpọ idaara, sia mme awo emaenam uyom eti-eti. Ndin emaekop uyom ado ke ataa anyan usʌñ.Biblica, Inc.