Eksọdọs17
Mmọọñ A-atooho Itiad
1Afịd ubon Isrel emaedaaña eto Akpautatan Sin, enam isañ tọọñọ ke itie keed tutu ekewuọ itie mfen naña Abọọñ akenọọ ammọ uyio. Ammọ emaeba etək ini ke Refidịm, ado mmọọñ ikibaaha se mme awo enwọñ.2Ndin ammọ emaetọhọ ye Moses enyʌñ ebo, “Inọ ñnyịn mmọọñ nọ inwọñ.”Moses amaabọọrọ abo, “Nsoo ido nọ ndufo etọhọ ye ami? Nsoo inam nọ ndufo edomo Abọọñ idomo?”3Ado itọñ amaasat ammọ do, ammọ emaenyʌñ esuuk Moses uyio. Emaebo anye ete, “Nsoo ikinam nọ afo akisịññe ñnyịn, nditọ ye ufene ñnyịn ke Iyib nọ idiikpañña nsaditọñ?”4Ndin Moses amaatua, aseeme anọ Abọọñ, “Afo abo nnam soo ye ibon ami? Ayak ataa etək-etək, ammọ ekpaentọọñ miin ke itiad.”5Abọọñ amaabọọrọ Moses ate, “Kaa keda ke iso mme awo. Dat ubaak ñkpisọñ Isrel nyʌñ ben esañ a-afo akemiaha Inyañ Nail kama ke ubọk mfo.6Ami ñyaada do ke iso mfo ke mben itiad ke Họreb. Mia itiad ado, ke mmọọñ ayaawuọ se mme awo enwọñ.” Moses amaanam ami ke iso ñkpisọñ Isrel.7Anye akekoot itie ado Masa ye Meriba sia nditọ Isrel emaedutañña enyʌñ edomo Abọọñ idomo, ebo, “Me Abọọñ mmọdo aba ke atu ñnyịn me ibaaha?”
Ekan Mbon Amalek
8Mbon Amalek emaedinwana ye nditọ Isrel ke Refidịm.9Moses amaadọkkọ Yọsua abo, “Mek mme awo ke atu ideen ñnyịn nyʌñ kaa ke nwana ye nditọ Amalek. Ñkpọñ, ami ndiida ke anyọñ abod ye esañ Abasi ke ubọk mmi.”10Ndin Yọsua amaanwana ye mbon Amalek, kpa naña Moses akenọọ anye uyio, ndin Moses, Erọn ye Họọ emaedọọk ekaa anyọñ abod ado.11Adaña ini ubọk Moses akebaaha ke anyọñ, Isrel emaekan ke ekọñ, ado ini a-anye akesuuhọ ubọk, nditọ Amalek emaekan.12Ke ini ubọk amaakemem Moses, ammọ emaeben itiad esịn ke idak nọ anye atie ke anyọñ itiad ado. Erọn ye Họọ emaedịppe ubọk amọ ke anyọñ, keed ke ubọk umi, keed ke ubọk uko, nọ anam ubọk amọ asọñada ke anyọñ tutu utịn asop.13Ke ntoro Yọsua amaakan mbon ekọñ Amalek ke akañkañ.14Akema, Abọọñ amaabo Moses, “Wet ñkpọ ami sịn ke ikpañwed nte ñkpọ aditoiyo, nyʌñ nam Yọsua akop abaña, sia ami ñyaasọọk anyịñ Amalek nsio afịd-afịd ke idak hefịn.”15Moses amaabọp akpokoro uwa, anyʌñ akoot anye: Abọọñ ado Afọñidiọọñọ mmi.16Anye akebo, “Sia emaedịppe ubọkanwan etuuk ebekpo Abọọñ, ndin Abọọñ ayaanwana ekọñ ye nditọ Amalek ke afịd emana.”Biblica, Inc.