Ditrọnọmi30
Uforo ke Emaetịmme Enyọñ Ekeene Abọọñ
1Ke ini afịd mme adidiọñ ye mme isuuñọ a-ami nnịmme ke iso ndufo amaisịm ndufo ndin ndufo enyʌñ eben ammọ esịn ke esịd ndufo itie akeedodo A-Abọọñ Abasi ndufo isuanna ndufo ke atu mme idịd,2ndin ndufo ye nditọ ndufo emaetịmme ebịne Abọọñ Abasi ndufo enyʌñ ekop item amọ ke afịd esịd ndufo ye ke afịd ukpọñ ndufo, ekeene afịd ñkpọ se itemme ndufo mfịn ami,3ndin Abọọñ Abasi ndufo ayaamaana inọ ndufo se ikitak anyʌñ itua ndufo mbọm, amaana ikoono ndufo ato afịd mme idịd a-anye akisuanna ndufo adọñ.4Akpekọm ekibịn ndufo ekaa ataa anyan isọñ ke idak mme hefịn, Abọọñ Abasi ndufo ayaikoono ndufo ato udo anyọñ adi.5Abọọñ Abasi ndufo ayaiben ndufo adi isọñ a-akenieghe mme eteete ndufo, ndin ndufo eyaedat anye enie. Anye ayaanam ndufo eforo e-enyʌñ ewak ekan mme eteete ndufo.6Abọọñ Abasi ndufo ayaanam esịd ndufo asana ye esịd ubon ndufo, nọ ndufo ema anye ke afịd esịd ndufo ye afịd ukpọñ ndufo, enyʌñ edu uwem.7Abọọñ Abasi ndufo ayaadot afịd mme isuuñọ ado ke idem mme asua isuaha ndufo enyʌñ ifʌnnọ ndufo.8Ndufo eyaemaana ekop item Abọọñ enyʌñ enam afịd mme item amọ a-ami inọọhọ ndufo mfịn ami.9Ndin Abọọñ Abasi ndufo ayaanam ndufo eforo ekan ke afịd ubọkutom ndufo ye mfịd idịb ndufo, ñyịn ufene ndufo ye mbunwịm inwañ ndufo. Abọọñ ayaamaana anem esịd ye ndufo anyʌñ anam ndufo eforo, kpa naña anye akenem esịd ye mme eteete ndufo,10adieke ndufo ekoppo item Abọọñ Abasi ndufo enyʌñ enịm mme item ye mme ewʌhọ amọ e-ekewette ke Ñwed Mbed ami enyʌñ ewọññọ ekeene Abọọñ Abasi ndufo ke afịd esịd ye ke afịd ukpọñ ndufo.Uwem ye Ñkpa
11Se ami iwuuk ndufo mbo enam mfịn ami isọññọ ibọhọ inyʌññọ ido ñkpọ se ndufo imiidiikanna inam.12Idooho ke hefịn, nọ ato do afo abịp abo, “Anie adiidọọk ika hefịn ikidat anye idi ndin adidọkkọ ñnyịn nọ ikop inam?”13Inyʌññọ ido ke edem akpainyañ, nọ ato ke ado afo abịp, “Anie adiiboiyo akpainyañ ikidat anye idi ndin adidọkkọ ñnyịn nọ ikop inyʌñ inam?”14Iyoo, ikọ anekke ikpere ndufo; asịne ke inua ndufo ye ke esịd ndufo nọ ndufo ekop enyʌñ enam.15Kap se, ami mmenịm ke iso ndufo mfịn ami uwem ye uforo, ñkpa ye nsobo.16Sia ami mmiiwuuk ndufo mfịn ami adima Abọọñ Abasi ndufo, adisaña ke ñkobitem amọ, ñnyʌñ nnam mme item, mme ewʌhọ ye mme mbed; ndin ndufo eyaedu enyʌñ etọt, ndin Abọọñ Abasi ndufo ayaidiọñ ndufo ke isọñ a-ndufo edʌkkọ adidat nnie.17Ado adieke esịd ndufo ewọññọke ndin ndufo ikoppo item, ndin ekeene etuak iwuod enọ mme abasi mfen enyʌñ ekpono ammọ,18ami mmenwọñọ ke ana ndufo ekịt nsobo. Ndufo idiiduuho ikpeene ke isọñ a-ndufo ekaañake Yọdan adidʌk ndat nnie.19Mfịn ami mmekoot mme hefịn ye isọñ nte mme ntiense inọ ndufo ke ami mmenịm ke iso ndufo uwem ye ñkpa, adidiọñ ye isuuñọ. Idahami imek uwem, nọ ndufo ye nditọ ndufo edu,20inyʌñ ima Abọọñ Abasi ndufo, ikpañ utọñ inọ uyio amọ, iyịre anye ifat ikama. Sia Abọọñ ado uwem ndufo, ndin anye ayainọ ndufo uwak isua ke isọñ a-anye akenwọñọke adinọ mme ete ndufo, Ebraham, Aisik ye Yekọb.Biblica, Inc.