Udiana Ñwed Samwel6
Eben Akebe Edioomo edi Yeruselem
1Defid amaamaana akoot afịd ñkparawa ke Isrel se ikop adudu, awo tọsịn edịb mme duob (30,000).2Defid ye afịd ideen amọ emaekaa Baala ke Yuda adikiben akebe edioomo Abasi nsio, e-ekoodo ke Anyịñ ado , anyịñ Abọọñ Andikponñkan, e-edotto ke ufọọd mme serubim a-adoroke ke akebe edioomo.3Ammọ emaedot akebe edioomo Abasi ke ufa ukpadñkpọ enyʌñ esio anye ke ufọk Abinadab, a-akedoroke ke abod. Nditọ Abinadab, Usa ye Ahio ekekpeme ufa ukpadñkpọ4ake akebe edioomo Abasi akedoroke, ndin Ahio, ayịn Abinadab, akesaña ke iso akebe ado.5Defid ye afịd nditọ Isrel ekesʌk enam idaara ke afịd ukeme ammọ ke iso Abọọñ, ekama uwak ñkpọ mbre nte mme ñkporo , mme ekpa, mme ndidoudʌk, mme ibịdubọk, mme nsak ye mme simbal.6Ke ini ammọ emaekediwuọ itie ukọkñkpọ Nakọn, Usa amaasio ubọk akemʌm akebe edioomo Abasi, sia enañ amaafiọnnọ.7Iyadesịd Abọọñ amaabịppe ata Usa ato ke ntak edu unamñkpọ amọ; ndin Abasi amaamia anye anịm do ke isọñ, anye anyʌñ akpa do ke mben akebe edioomo Abasi.8Ndin Defid amaayat esịd sia ifiobesịd Abọọñ amaabịmme akeene Usa, ndin tutu mfịn ami ekoot itie ado Peres Usa .9Defid amaakop ndịk abaña Abọọñ usen ado anyʌñ abo ate, “Akebe edioomo Abọọñ adiinam die idi ukañ mmi?”10Anye ikinyịmmeke adiben akebe edioomo Abọọñ nọ adiba ye anye ke Abio Defid. Utu ke ado, anye amaaben akenịm ke ufọk Obed-Edom awo Kad.11Akebe edioomo Abọọñ akeba afiọñ ita ke ufọk Obed-Edom, awo Kad, ndin Abọọñ amaadiọñ anye mme afịd ubon amọ.12Ndin emaedọkkọ Adidem Defid ete, “Abọọñ adiọñ afịd ufọk Obed-Edom ye afịd ñkpọ se anye anie, ke ntak akebe edioomo Abasi.” Ke ntoro Defid amaakaa adikiben akebe edioomo Abasi nsio ke ufọk Obed-Edom ndi ke Abio Defid ye idaara.13Akedo mbon se ikibiom akebe edioomo Abọọñ emaesaña ikpadisañ itiokeed, anye awa ayaara enañ keed ye ukọkʌk ñyịn enañ keed.14Defid akesịne nduọ-nduọ afọñ aboditọñ linen anyʌñ anek unek ke iso Abọọñ ye afịd adudu amọ,15ke ini Defid ye afịd Isrel ekebenne akebe edioomo Abọọñ ye ñkpo idaara ye uyom adukpoñ.16Idaha akebe edioomo Abọọñ akesʌkkọ adʌk Abio Defid, Maikal ayịn awonwaan Sọọl amaada ke ubenafịm ase. Ke anye amaakekịt Adidem Defid naña ataam anyʌñ anek unek ke iso Abọọñ, anye amaase anye ke ndek ke esịd amọ.17Ammọ emaeben akebe edioomo Abọọñ enyʌñ enịm anye ke esịd atayad ake Defid akewuuhọ anịm anọ anye, ndin Defid amaawa mme ufọfọb uwa ye uwa ewuana ke iso Abọọñ.18Ke Defid amaakema ufọfọb uwa ye uwa ewuana, anye amaadiọñ mbon awo ke anyịñ Abọọñ Andikponñkan.19Ndin anye amaadeeme nsio-nsio utọ uyo anọ afịd mbon Isrel, ibaan ye ideen. Akema afịd awo emaenyọñọ ufọk ammọ.20Ke ini Defid amaaketịmme anyọñ ufọk nọ akediọñ ikọd ufọk amọ, Maikal ayịn awonwaan Sọọl amaawuọ adisoobo anye anyʌñ abo, “Se naña adidem Isrel akpono idem amọ etob mfịn, ayak etək akpesaña ifed ke iso afịd ifʌn ibaan nditọufọk amọ, nte ndisịme awo idʌñ akpenam!”21Ndin Defid amaabọọrọ Maikal ate, “Akedo ke iso Abọọñ, a-akemmekke miin utu ke ete mfo me awo mfen ke ubon amọ, ke ini anye akensioho miin nte adaukara nnọọ ikọd Abọọñ Isrel, ami ñyaanam idaara ke iso Abọọñ.22Ami ñyaanana ukpono ñkan ado, ndin ami ñyaasuenne idem ke anyen mmi. Ado ke abaña mme ifʌn ibaan afo atañña abaña mi, ami ñyaanie ukpono nto ammọ.”23Do ndin Maikal ayịn awonwaan Sọọl ikinieghe nditọ tutu usen anye akekpaaha.Biblica, Inc.