Udiana Ñwed Samwel24
Defid Awet Mbonekọñ Anyịñ Asịn ke Ñwed
1Iyadesịd Abọọñ amaatịmme ademme ye Isrel, anye ñko amaadọọñ Defid nọ ado usʌñ ñkpọiduọ anọ ammọ, ate, “Ikaa ikinam ubadawo ke afịd Isrel ye Yuda.”2Ndin adidem amaabo Yoab ye mme adaiso ekọñ ekebaaha ye anye ate, “Isaaña ke afịd esiin Isrel, tọọñọ ke Daan tutu akewuọ Beeseba inyʌñ iwet ibad ideen se ido mme anwana ekọñ, yak ami ndiọọñọ me ammọ edo awo ifañ.”3Ado Yoab amaabọọrọ adidem ate, “Yak Abọọñ Abasi mfo anam ibad mbonekọñ atọt akan akañ ikie, ñko yak anyen abọọñ mmi adidem anyʌñ akịt. Ado nsoo ido yak abọọñ mmi adidem ayem adinam utọ ñkpọ ami?”4Ke akpatre, uyio adidem amaasọñ ada akan ake Yoab ye ake mme adaiso ekọñ; ndin ammọ emaekpọñ iso adidem ekaa adikibat mbon unwana ekọñ ke Isrel.5Ammọ emaekekaaña eboiyo Yọdan, emaenam nnaaekọñ ekpere Arowa, ke usuuk usʌñ abio ado, ndin esaña eboiyo Kad ekewuọ Yasa.6Ammọ emaekaa Kilied ye ñkanñkʌk Tatịm Hodsi, ye Daan Yaan enyʌñ ekanna ekpere Sidọn.7Akem ammọ emaekaa ñkañ akpọsọñ itie Tai ye afịd mme abio Hif ye Kenan. Ke akpatre ammọ emaekaa Beeseba ke Nekef ke Yuda.8Ke ammọ emaekesaña ekanna afịd isọñ abio, ammọ emaetịmme enyọñ Yeruselem ke utịd afiọñ usʌkkeed mme usen edịb.9Yoab amaakedọkkọ adidem ibad ideen se ido mme anwanaekọñ: ke Isrel, tọsịn ikie itiaita (800,000) ekekop adudu, ekekemekke ikama akañkañ, ndin ke Yuda akedo tọsịn ikie ition (500,000).10Ado esịd amaabʌññọ Defid ke anye amaakebat mme anwanaekọñ, ndin anye amaabo Abọọñ ate, “Ami mmenam ekamba idiọọkñkpọ ke se nnam ami. Abọọñ, mbọk, mmuukpeiye mbo yak aben ukwaññkpọ awo mfo afep. Sia ami mmenam ataa ndisịme ido.”11Mbemiso Defid akedemme ubakusen, uyio Abọọñ amaasịm prọfed Kad, akịdñkukịd nnọọ Defid:12“Kaa kedọkkọ Defid, ‘Ami ado se Abọọñ atañ: Ami unọ fiin usʌñ ñkpọ ita. Mek keed ke atu ammọ sio se ami mben umia fiin ufen.’ ”13Ndin Kad amaakaa abịne Defid akebo anye, “Afo ayem akañ aba ke isọñ mfo ke isua ita? Me ayem ifeghe itọk ke afiọñ ita ñkpọñ mme asua mfo ke ammọ esʌkkọ ubịne fiin? Me ayem udọñọ nsobo ke usen ita ke isọñ mfo? Tịm kere idaha ado, nyʌñ mek naña ami ndiikibọọrọ andikindọñ miin utom.”14Defid amaabo Kad, “Ami mba ke ataa ekamba mfʌhọ. Yak ñnyịn iduọ idʌk ubọk Abọọñ, sia mbọm amọ akpon; ado kuuyak ami nduọ ndʌk ubọk awo.”15Ndin Abọọñ amaadọñ udọñọ nsobo asịn ke isọñ Isrel tọọñọ ke ubakusen ado tutu awuọ utịd ini e-ekebiereke, ndin awo tọsịn ata mme duob (70,000) emaekpañña tọọñọ ke Daan tutu akesịm Beeseba.16Idaha enyere akesioho ubọk anyan adisobo Yeruselem, Abọọñ amaakop mbọm abaña idiọọk ido ado anyʌñ adọkkọ enyere akewotto mme awo do abo, “Akem! Dʌt ubọk mfo sio.” Enyere Abọọñ akeba idaha ado ke afe ubeek abakpa Arauna, awo Yebus.17Defid akekịt enyere akewotto mbon awo, anye amaabo Abọọñ ate, “Ami mmedue; ami, akpemeedọñ, mmenam idiọọkñkpọ. Mbon awo ami edo mme edọñ. Nsoo ke ammọ enam? Yak ubọk mfo andoro miin ye ufọk mmi.”Defid Abọp Akpokoro Uwa
18Kad amaabịne Defid ke usen ado akebo anye ate, “Dọọk kaa ke bọp akpokoro uwa nọ Abọọñ ke afe ubeek abakpa Arauna, awo Yebus.”19Ndin Defid amaadọọk akaa, nte Abọọñ akenọọ uyio ato Kad.20Arauna akebenne anyen ase anyʌñ akịt nte adidem ye mme adaaha amọ esaña edikpere anye, anye amaawuọ akaa aketuak iwuod ke iso adidem, atuuk iso amọ ke isọñ.21Ndin Arauna amaabo, “Nsoo ido nọ abọọñ mmi adidem adi ufọk ayịnufọk amọ?”Defid amaabọọrọ ate, “Ndi adidep afe ubeek abakpa mfo, nọ ndat mbọp akpokoro uwa nnọ Abọọñ, yak udọñọ nsobo a-awotto mme awo atre.”22Arauna amaabo Defid ate, “Yak abọọñ mmi adidem adat se anye akpeyeyem aben awa anọ Abasi. Se mme ñyaaraenañ ufọfọb uwa mi, nyʌñ se mme akpeti ubeek abakpa ye mme akpọnọ enañ nte ifia mi.23O Adidem, Arauna anọ adidem afịd mme ñkpọ ami. Yak Abọọñ Abasi mfo ubọ fiin.”24Ado adidem amaabọọrọ Arauna ate, “Iyoo, ana ami ñkpe ekọmudua amọ ke itie isọñ ami. Ami ndiiwaaha ufọfọb uwa nnọ Abọọñ Abasi mmi ake imiñkpaaha miin ñkpọ ndomokeed.”
Do ndin Defid amaadep afe ubeek abakpa ye mme abaakenañ ado, anyʌñ akpe sekel silfa aba mme duob ke iwuod amọ.25Defid amaabọp akpokoro uwa ke ndo anọ Abọọñ anyʌñ awa mme ufọfọb uwa ye uwa adiwuanakeed. Akem Abọọñ amaabọọrọ akam amọ ke iwuod mbon awo ke abio ndin udọñọ nsobo ke Isrel amaatre.
Biblica, Inc.