Udiana Ñwed Pita3
Usen Abọọñ
1Mme ndima ufan, ami ado ayọhọ ñwedetob iba a-ami nnọọhọ isọk ndufo. Ñwet naña ñwed iba ami aditoiyo ndufo adinie eti akikere.2Ami ñyem ndufo etoiyo mme ikọ a-mme ndisana prọfed eketañña ke anyan ini a-akeboiyoke ye ewʌhọ A-Abọọñ ye Andinyaaña ñnyịn akinọọhọ ato mme abọsịd ndufo.3Ke akanna ado, ana ediọọñọ ke mme anọọ awo ñyọọ eyaedi ke mme akpatre usen, enọ ñyọọ enyʌñ ekeene mme ndiọi udọñ ammọ.4Ammọ eyaebo, “Mmọ ‘aditịmme ndi’ a-anye akenwọñọke? Sia tọọñọ mme ete ñnyịn ekekpañña, afịd ñkpọ asʌk aba naña akeba tọọñọ ke ntọọñọ ederimbod.”5Ado ammọ efọfiọk efre ebo ke anyan ini, ato ke ikọ Abasi hefịn amaaba ye isọñ e-ekenamma eto mmọọñ enyʌñ edat mmọọñ ebot.6Mmọọñ ami ñko ke ekedat efʌk enyʌñ esobo ederimbod a-akebaaha idahado.7Ato kpasʌk ke ikọ ado e-enịm mme hefịn ye isọñ e-ebaaha idahami enọ ikañ, sia enịm enọ usen ikpe ye adisobo mbon i-imiidiọọñọke Abasi.8Ado ikiifre ñkpọ keed ami, mme ndima ufan, usen keed ke anyen Abọọñ aba nte tọsịn isua, tọsịn isua anyʌñ aba nte usen keed.9Abọọñ iyeete ke adinam enwọñọ amọ, naña mme awo ekere ke anye a-ayeet. Anye akap anie anyanime ye ndufo, inyʌññọ iyem awo ndomokeed atak, ado ayem afịd awo etua ñkpọfiọk enyʌñ ekappa esịd.10Ado usen Abọọñ adiidi adiwat nte inọ. Mme hefịn eyaeboiyo efep ye ekamba uyom; ikañ ayaasobo se ekedat ebot ederimbod, ndin isọñ ye afịd ñkpọ ke esịd adiina ukpọk.11Sia ediisobo afịd ñkpọ ntom, nsoo utọ awo ke akpenaa ndufo edo? Akpena ndufo edu adisana uwem ye uwem ke uteeñe Abasi12naña ndufo etieghe ebet usen Abasi enyʌñ eyem asọsọp adi. Usen ado ke ediisobo mme hefịn ke ikañ, ñko se edat ebot ederimbod ayaatara ke akpọsọñ ufiob ado.13Ato ke se anye akenwọñọ ñnyịn idot anyen inyʌñ itie ibet ufa hefịn ye ufa isọñ, idʌñ adinenido.14Ke ntoro, mme ndima ufan, sia ndufo etieghe ebet mme ñkpọ ami, isịn afịd ifịk nọ ikịt ndufo naña enana ntọi, enana ndo enyʌñ eba ke emem ye anye.15Inyʌñ idiọọñọ ke anyanime Abọọñ ñnyịn awuọ adinyaaña, kpa naña Pọọl, ataa adima ayịneka ñnyịn ke Krais adat ifiọk A-Abasi akenọọhọ anye awet anọ isọk ndufo.16Anye awet afịd ñwedetob amọ ke usʌñ keed, atañ abaña mme ñkpọ ami. Mme ñwedetob amọ a-adọñọ mme ñkpọ i-imiisọọpọ inwaña awo, ndin mbon ndisịme ye mbon i-imiinieghe iwuuk eyʌttọ se ewet enịm, kpa naña ammọ enam ye ikọ Abasi mfen, ndin edat nsobo esọk idem ammọ.17Ke ntoro, mme ndima ufan, sia emaekidọdʌt ndufo utọñ ebaaña ñkpọ ami, ikpeme mbaak mme abiad mbed ediben ndufo etịn usʌñ enyʌñ enam ndufo eduọọk nsọọñọnda ndufo.18Ado ikọt ke mfọn ye ifiọk Abọọñ ye Andinyaaña ñnyịn Yisọs Krais.Yak ubọọñ anie anye ke ami ye ke nsi-nsi, Amen.
Biblica, Inc.