Udiana Ñwed Ndidem23
Yosaiya Amaana Ademme Edioomo
1Ndin adidem amaakoot afịd mme ñkpisọñ ake Yuda ye Yeruselem.2Anye amaadọọk akaa tembịd Abọọñ ye mbon Yuda, mbon se idʌñ ke Yeruselem, mme aku ye mme prọfed, afịd mbon awo tọọñọ ke andisịb ñkan tutu awuọ andikpon ñkan. Anye amaakoot afịd mme ikọ Ñwed Edioomo e-ekekịtte ke tembịd Abọọñ, ammọ ekop.3Adidem amaada ke mben abai amaana ademme edioomo ke iso Abọọñ adikeene Abọọñ ñnyʌñ nnịm mme ewʌhọ amọ, ye mme item ye mme mbed amọ ke afịd esịd ye ke afịd ukpọñ amọ, ado ndin amaasọọñọ mme ikọ edioomo e-ewette ke ñwed ami. Ndin afịd awo emaesọọñọ enyʌñ enyịmme edida ke edioomo ado.4Adidem amaabo Hilkia akwa aku, mme udiana aku ye mme akpemeusʌñ esioño afịd ñkpoduoho se ekenam enọ Baal ye Asera ye afịd mme udịmanyọñ ke tembịd Abọọñ. Anye amaafọp ammọ ke ewuọhọ ekpọñ Yeruselem ke inwañ Abedeñ Kidrọn anyʌñ akoono ntọñ akaa Beteel.5Anye amaatre mme aku e-emaaha ubobodñkpọ ake mme ndidem Yuda ekemekke nọ esifọp insensi ke mme ñkoñ-ñkoñ itie ke mme abio Yuda ye mbon se iba ke ñkanñkʌk Yeruselem, mbon e-ekefọppọ insensi enọ Baal, enọ utịn ye afiọñ, enọ mme udịmanyọñ.6Anye amaasio abai Asera ke tembịd Abọọñ akaa Abedeñ Kidrọn ke ewuọhọ ekpọñ Yeruselem anyʌñ afọp anye do. Anye amaakọk anye aforo ntọñ ndin asuan ntọñ ado ke mme udi mme ñkaña awo.7Anye amaanyʌñ awuut itieidʌñ mme akpara ideen ekebaaha ke tembịd Abọọñ, itieidʌñ ibaan e-ekesituakka afọñ enọ Asera.8Yosaiya amaaben afịd mme aku ato mme abio Yuda anyʌñ asappa mme ñkoñ-ñkoñ itie, tọọñọ ke Keba tutu awuọ Beeseba, itie a-mme aku ekefọppọ insensi. Anye amaawuut usʌñatob ke ntondʌk Atob Yọsua, etubom abio, a-akebaaha ke ubọk ufiin inuaatob abio.9Akpesʌkado mme aku mme ñkoñ-ñkoñ itie ikinamma ñkpọ ke akpokoro uwa Abọọñ ke Yeruselem, ammọ emaeta uyo se yiis imiisịneke ye mme emọ-emọ aku ammọ.10Anye amaasappa Tofed, a-akebaaha ke Abedeñ Ben Hinọm, mbaak awo ndomokeed adikama awa ayịn me ayịn awonwaan ke ikañ Mọlek.11Anye amaasioño ke ntondʌk tembịd Abọọñ mme enañmbakara ake mme ndidem Yuda ekediọññọ enịm enọ utịn. Ammọ ekebono ke akwere a-akpereke ubeed adaaha keed e-ekekoodo Natan-Melek. Ndin Yosaiya amaafọọmọ mme sariọd e-ekenịmme enọ utịn.12Anye amaawuut mme akpokoro uwa mme ndidem Yuda ke akọm a-akpereke ubeed anyọñ Ahas, ye mme akpokoro uwa Manase akebọppọ ke mme akwere iba ake tembịd Abọọñ. Anye amaasioño ammọ ke ndo, asuan ammọ ñkeñe-ñkeñe anyʌñ atoomo ammọ adọñ ke Abedeñ Kidrọn.13Adidem amaanyʌñ asappa mme ñkoñ-ñkoñ itie ekebaññake ke usakkautịn Yeruselem ke usuuk Abod Mbubiam, mbon se Sọlọmọn adidem Isrel akebọp anọ Astọred abʌd-abʌd abasianwaan mbon Sidọn, ake Kemos abʌd-abʌd abasi mbon Mọb, ye ake Molek abʌd-abʌd abasi mbon Amọn.14Yosaiya amaaboom mme ndisana itiad anyʌñ akpok mme abai Asera anyʌñ afʌk mme itie ado ye mme akpọ awo.15Kpa ye tembịd ke Beteel, ñkoñ-ñkoñ itie Yerobuam ayịn Nebad, akenamma Isrel enam idiọọkñkpọ anye amaawuut kpa ye akpokoro uwa ado ye ñkoñ-ñkoñ itie anyʌñ akọk anye aforo ntọñ, anyʌñ afọp abai Asera ñko.16Akem Yosaiya amaaseet akanna, ndin anye akekịt mme udi ke anyọñ abod, anye amaanam ekoono mme akpọ ado enyʌñ efọp ke akpokoro uwa nọ esappa anye, nọ akekem ye ikọ Abọọñ aketañña ato awo Abasi a-aketañña abaña mme ñkpọ ami.17Adidem amaabịp, “Nsoo ido itiad udi a-ami ñkịtte ko?”Mbon abio ado emaebo, “Ado idiọọñọ awo Abasi a-aketooho Yuda adi anyʌñ atañ abaña akpokoro uwa Beteel mme ñkpọ a-afo anamma abaña anye.”18Anye amaabo “Saana yaak, kuuyak awo ndomokeed atịmede mme akpọ amọ.” Ndin ammọ emaesaana mme akpọ amọ eyaak ye ake prọfed aketooho Sameria adi.19Kpa naña anye akenam ke Beteel, Yosaiya amaasịññe afịd mme tembịd ke mme ñkoñ-ñkoñ itie ake mme ndidem Isrel ekebọppọ ke mme abio Sameria a-akedemmeke ifiobesịd Abọọñ.20Yosaiya amaawoot afịd mme aku mme ñkoñ-ñkoñ itie ke mme akpokoro uwa anyʌñ afọp mme akpọ awo ke anyọñ ado. Ndin anye amaatịmme anyọñ Yeruselem.21Adidem amaanọ uyio enọ afịd awo: “Idia Usọrọ Nsaña Mboiyo inọ Abọọñ Abasi ndufo, kpa naña ewet ke Ñwed Edioomo ami.”22Kpaanam awo ikinamma Usọrọ Nsaña Mboiyo a-akebaaha ntoro, me ke ayio mme abiideikpe e-ekedatta Isrel usʌñ me ke ini mme ndidem Isrel ye mme ndidem Yuda.23Ado ke ayọhọ isua duob mme itiaita ke ukara Adidem Yosaiya, emaenam Usọrọ Nsaña Mboiyo ami enọ Abọọñ ke Yeruselem.24Ke adidian do, Yosaiya amaabịne mbiaidiọñ, ye mme ekpoawo, mme abasi ufọk, mme ubobodñkpọ ye mme mbubiam ñkpọ ekekịtte ke Yuda ye Yeruselem. Anye akenam ami nọ enam afịd se ekeyem ke mbed e-ekewette ke ñwed aku Hilkia akekịtte ke tembịd Abọọñ.25Me mbemiso Yosaiya, me aboiyoke anye, utọ adidem a-akebaaha nte anye, a-akewọññọke akeene Abọọñ naña anye akenam ke afịd esịd amọ ye afịd ukpọñ amọ ye afịd ukeme amọ, akeene afịd mbed Moses, ikibaaha.26Kpayeado, Abọọñ ikiwọññọke iyadesịd a-anye akenieghe abaña Yuda akeene afịd se Manase akenam adidemme ifiobesịd amọ.27Ndin Abọọñ amaabo, “Ami ñyaasio Yuda mfep ke iso mmi naña ñkesio Isrel, ndin ñyaasịn Yeruselem, abio ami ñkemekke, ye tembịd ami, ake ami ñkebooho mbaña, ‘Anyịñ mmi adiiba do.’ ”28Amaado mme ñkpọ mfen ke ukara Yosaiya, ye afịd se anye akenam, ado nte awo iwette ke ñwed mbʌk utom mme ndidem Yuda?29Idaha Yosaiya akedooho adidem, Fero Neko adidem Iyib amaadọọk akaa Inyañ Yufretis adikinwam adidem Asiria. Adidem Yosaiya amaasaña akaa adikisoobo anye ke ekọñ, ado Neko amaanwana ye anye anyʌñ awot anye ke Mekido.30Nditọufọk Yosaiya emaeben akpo amọ ke sariọd eto Mekido ekaa Yeruselem emaenyʌñ ekebuuk anye ke udi amọ. Ndin mbon isọñ abio ado emaeben Yehoahas ayịn Yosaiya eyet anye adan enyʌñ enam anye adidem ke itie ete amọ.
Yehoahas Adidem Yuda
31Yehoahas akedo isua edịb mme ita idaha anye akedooho adidem, ndin anye amaakara ke Yeruselem afiọñ ita. Anyịñ eka amọ akedo Hamutal ayịn awonwaan Yerimaiya; anye aketo Libna.32Anye amaanam idiọọkñkpọ ke anyen Abọọñ, kpa naña mme eteete amọ ekenam.33Fero Neko amaadọñ anye ñkpọnọ ke Ribla ke isọñ Hamad mbaak anye adikara ke Yeruselem, amaanyʌñ adot isob talen silfa ikie (100) ye talen kold keed anọ Yuda.34Fero Neko amaanam Eliakịm ayịn Yosaiya adidem ke itie ete amọ Yosaiya anyʌñ akpəho anyịñ Eliakịm akoot anye Yehoiyakịm. Ado anye amaaben Yehoahas anyọñ Iyib, ndin anye amaakekpa ke udo.35Yehoiyakịm amaakpe Fero Neko silfa ye kold a-anye akeyemme. Nọ ato do anye akan anam ntoro, anye amaadot ekọmudua anọ isọñ anyʌñ anam mbon awo etịp silfa ye kold akeene naña ekebiere enọ ammọ.Yehoiyakịm Adidem Yuda
36Yehoiyakịm akedo isua edịb mme ition idaha anye akedooho adidem, ndin anye amaakara ke Yeruselem isua duob mme keed. Anyịñ eka amọ akedo Sebida ayịn awonwaan Pedaiya aketooho Ruma.37Ndin anye amaanam idiọọkñkpọ ke iso Abọọñ, kpa naña mme eteete amọ ekenam.Biblica, Inc.