Udiana Ñwed Ndidem15
Asaria Adidem Isrel
1Ke ayọhọ isua edịb mme itiaba ke ukara Yerobuam adidem Isrel, Asaria ayịn Amasaiya adidem Yuda aketọọñọ adikara.2Anye akedo isua duob mme itiokeed idaha anye akedooho adidem, ndin anye amaakara ke Yeruselem isua aba mme duob mme iba. Anyịñ eka amọ akedo Yekolia; eka amọ aketo Yeruselem.3Anye amaanam se inen ke iso Abọọñ, kpa naña ete amọ Amasaiya akenam.4Ado, awo ikiwuudo mme ñkoñ-ñkoñ itie; mbon awo ekesʌk ekaka iso enam mme uwa enyʌñ efọp insensi ke ndo.5Abọọñ amaafiime adidem ye akpamfia tutu usen anye akekpaaha, ndin anye akedʌñ ke isio-isio ufọk. Yọtam ayịn adidem akese ñkpọ abaña ufọkadidem anyʌñ akara mbon abio.6Amaado mme ñkpọntịppe mfen ke ini ukara Asaria, ye afịd se anye akenam, ado nte awo iwette ke mme ñwed mbʌkutom mme ndidem Yuda?7Asaria amaaduọk adudu ye mme eteete amọ ndin emaebuuk anye ekpere ammọ ke Abio Defid. Ndin Yọtam ayịn amọ amaadat itie amọ nte adidem.Sakaraiya Adidem Isrel
8Ke ayọhọ isua edịb mme duob mme itiaita ke ukara Asaria adidem Yuda, Sakaraiya ayịn Yerobuam amaado adidem Isrel ke Sameria, ndin anye amaakara afiọñ itiokeed.9Anye amaanam idiọọkñkpọ ke anyen Abọọñ, kpa naña mbon se ikibem anye iso ikaara ekenam. Anye ikiwọññọke ikpọñ mme ndiọiñkpọ Yerobuam ayịn Nebad, ake anye akenamma Isrel anam.10Salum ayịn Yabes amaadioomo abaña Sakaraiya. Anye amaanwana ye anye ke iso mbon awo, awot anye anyʌñ adat itie amọ nte adidem.11Mme ñkpọntịppe mfen ke ukara Sakaraiya ado se ewet ke ñwed mbʌkutom mme ndidem Isrel.12Ndin ikọ Abọọñ eketañña ebaña Yehu amaasu: “Mbon ubon mfo eyaetie ke ebekpo Isrel tutu ayọhọ emana inaañ.”Salum Adidem Isrel
13Salum ayịn Yabes amaado adidem ke ayọhọ isua edịb mme duob mme usʌkkeed ke ukara Usaiya adidem Yuda, ndin anye amaakara ke Sameria afiọñ keed.14Ndin Menahem ayịn Kaadi amaato Tiasa akaa Sameria. Anye amaanwana ye Salum ayịn Yabes ke Sameria, amaawot anye amaanyʌñ adat itie amọ nte adidem.15Mme ñkpọntịppe mfen ke ukara Salum, ye udʌkadu a-anye akedatta usʌñ, ewet ke ñwed mbʌkutom mme ndidem Isrel.16Ke ini ado Menahem, tọọñọ ke Tiasa, amaanwana Tifsa ye afịd awo ke abio ye mbọhọ, sia ammọ emaesịn edibeere inuaatob ammọ. Anye amaasuan Tifsa anyʌñ akịm idịb afịd mme ibaan idịb asai.Menahem Adidem Isrel
17Ke ayọhọ isua edịb mme duob mme inaañ ke ukara Asaria adidem Yuda, Menahem ayịn Kaadi amaado adidem Isrel, ndin anye amaakara ke Sameria isua duob.18Anye amaanam idiọọkñkpọ ke anyen Abọọñ. Ke afịd ini ukara amọ anye ikiwọññọke ikpọñ ndiọiñkpọ Yerobuam ayịn Nebad, ake anye akenamma nọ Isrel enam.19Ndin Pul adidem Asiria amaadʌk isọñ ado, ndin Menahem amaanọ anye talen silfa tọsịn keed ke adibere ye anye ñnyʌñ nsọọñọ ukara amọ ke abioubọọñ ado.20Menahem amaabọ akʌk ami ato Isrel. Afịd imọ awo ekena etịp sekel aba mme duob se ediinọ adidem Asiria. Ndin adidem Asiria amaatịmme edem inyʌññọ iba aba ke isọñ.21Amaado mme ñkpọntịppe mfen ke ukara Menahem, ye afịd se anye akenam, ado nte awo ikiwette ke ñwed mbʌkutom ndidem Isrel?22Menahem amaaduọk adudu ye mme eteete amọ. Ndin Pekahia ayịn amọ amaadat itie amọ nte adidem.Pekahia Adidem Isrel
23Ke ayọhọ isua aba mme duob ke ukara Asaria adidem Yuda, Pekahia ayịn Menahem amaado adidem Isrel ke Sameria, ndin anye amaakara isua iba.24Pekahia amaanam idiọọkñkpọ ke anyen Abọọñ. Anye ikiwọññọke ikpọñ mme ndiọiñkpọ Yerobuam ayịn Nebad, ake anye akenamma Isrel anam.25Keed ke atu mme ekamba adaaha amọ, Peka ayịn Remalia, amaadʌk edioomo abaña anye. Anye amaadat ideen Kilied aba mme duob adian idem, amaanyʌñ awot Pekahia, ye Aakob ye Arie, ke akpọsọñ itie ke ufọkadidem ubọọñ ke Sameria. Ndin Peka amaawot Pekahia anyʌñ adat itie amọ nte adidem.26Mme ñkpọntịppe mfen ke ukara Pekahia, ye afịd se anye akenam, ewet ke ñwed mbʌkutom mme ndidem Isrel.Peka Adidem Isrel
27Ke ayọhọ isua ukara Asaria aba mme duob mme iba nte adidem Yuda, Peka ayịn Remalia amaado adidem Isrel ke Sameria, ndin anye amaakara isua edịb.28Anye amaanam idiọọkñkpọ ke anyen Abọọñ. Anye ikiwọññọke ikpọñ mme ndiọiñkpọ Yerobuam ayịn Nebad, a-anye akenamma Isrel anam.29Ke ini Peka adidem Isrel, Tiklad-Pilesa adidem Asiria amaadi anyʌñ adat Iyon, Ebeel Bed Maaka, Yanowa, Kedes ye Hasọ. Anye amaadat Kilied ye Kalili, ye afịd isọñ Naftali, anyʌñ akoono mbon awo akaa Asiria.30Ndin Hosie ayịn Ela amaadioomo abaña Peka ayịn Remalia. Anye amaanwana amaanyʌñ awot anye, ndin anye amaadat itie amọ nte adidem ke ayọhọ isua edịb ke ukara Yọtam ayịn Usaiya.31Amaado mme ñkpọntịppe ke ukara Peka, ndin afịd se anye akenam, ado nte awo iwette ke ñwed mbʌkutom mme ndidem Isrel?Yọtam Adidem Yuda
32Ke ayọhọ isua iba ke ukara Peka ayịn Remalia adidem Isrel, Yọtam ayịn Usaiya adidem Yuda amaatọọñọ ukara.33Anye akedo isua edịb mme ition idaha anye akedooho adidem, ndin anye amaakara ke Yeruselem isua duob mme itiokeed. Anyịñ eka amọ akedo Yerusa ayịn awonwaan Sadọk.34Anye amaanam se inen ke iso Abọọñ, kpa naña ete amọ Usaiya akenam.35Ado, awo ikiwuudo mme ñkoñ-ñkoñ itie; mbon awo ekesʌk ekaka iso enam mme uwa enyʌñ efọp insensi ke ndo. Yọtam amaamaana abọp Inuaatob Anyọñ ke tembịd Abọọñ.36Amaado mme ñkpọntịppe mfen ke ukara Yọtam ye se anye akenam, ado nte awo iwette isịn ke ñwed mbʌkutom mme ndidem Yuda?37(Ke ini ado Abọọñ amaatọọñọ adidọñ Resịn adidem Aram ye Peka ayịn Remalia ekaa anwan ye Yuda.)38Yọtam amaaduọk adudu ye mme eteete amọ ndin emaebuuk anye ye ammọ ke Abio Defid, abio ete amọ. Ndin Ahas ayịn amọ amaadat itie amọ nte adidem.Biblica, Inc.