Udiana Ñwed Krọnikịd32
Senakerib Anam Ikọ ye Yeruselem
1Ke Hesikaiya amaakenam afịd ñkpọ ke akpanikọ ye ke afịd esịd ama, Senakerib adidem Asiria amaadika ekọñ ye Yuda. Anye amaanam nnaaekọñ akanna mme ñkpọsọñ abio, akere adikan ammọ ndat nnọọ idem amọ.2Ke ini Hesikaiya akekịtte ke Senakerib amaadi ndin ke anye akeduak adinwana ekọñ ye Yeruselem,3anye amaadʌk adu ye mme adaaha amọ ye mme anam utom ekọñ abaña adisiit usʌñ mmọọñ a-atooho mme idịm e-ebaaha ke esiin abio, ndin ammọ emaenwam anye.4Ammọ emaebon ekamba atu awo e-ekesiide afịd idịm ye mmọọñ ekefegheke ke afịd isọñ. Ammọ emaebo, “Ntak a-anaaha mme ndidem Asiria edi enyʌñ edikịt uwak mmọọñ-ọ?”5Ndin anye amaasịn idem ke aditịmme ndiọñ mme ñwuudo itie ke ndibene anyʌñ abọọp mme tọwa adoot ke ammọ. Anye amaabọp ndibene mfen ke edem anye añko anyʌñ asọọñọ mme ndibene ke Abio Defid. Anye ñko amaanyʌñ anam uwak ibad ñkpọ ekọñ ye mme atuekọñ.6Anye amaamek mme ikpọawo ekọñ anọ mme awo anyʌñ asoobo ye ammọ ke anwa ke inuaatob abio anyʌñ asọọñọ ammọ idem ke mme ikọ ami:7“Isọñ idem inyʌñ isọñ esịd. Ikiikop ndịk me iduọesịd ke ntak adidem Asiria ye akpa-akpa udịm ekọñ e-ebaaha ye anye, sia adooho adudu a-akponno akan mmọdo ye ñnyịn akan andiba ye anye.8Andiba ye anye ado ñkpọ ekọñ ubọk awo kpọd, ado andiba ye ñnyịn ado Abọọñ Abasi ñnyịn adiinwam ñnyịn anyʌññọ adiinwana ekọñ ñnyịn.” Ndin mme awo emaebọ nsọọñọidem eto ke se Hesikaiya adidem Yuda aketañ.9Akemaana koo, ke idaha Senakerib adidem Asiria ye afịd udịm ekọñ amọ e-ekenamma nnaaekọñ ekanna Lakis, anye amaadọñ mme etubom amọ eben etob eka Yeruselem esọk Hesikaiya adidem Yuda ye afịd awo Yuda e-ekebaaha do:10“Ami ado se Senakerib adidem Asiria abo: Uko mfo ami asọọñọ ada ke nsoo, yak afo atie ke Yeruselem ke idak nnaaekọñ ekannake ekʌk?11Ke ini Hesikaiya abooho, ‘Abọọñ Abasi ñnyịn ayainyaaña ñnyịn asio ke ubọk adidem Asiria,’ anye idat ndufo atịn usʌñ, nọ ndufo ekpañña abiọọñ ye nsaditọñ.12Idooho kpa Hesikaiya ke idem amọ akewuuñọ mme ñkoñ-ñkoñ itie abasi ami ye mme akpokoro uwa, abo Yuda ye Yeruselem, ‘Ana nte ndufo ekpono Abasi ke iso akpokoro uwa keed enyʌñ efọp uwa ke ndo’?13“Nte ndufo idiọọñọke se ami ye mbon ekembemme miin iso nte ndidem Asiria ekenam ye mbon idʌñ mfen? Nte mme abasi mme idịd ado emaekan efak idʌñ ammọ ensio miin ke ubọk?14Anie ke atu afịd mme abasi ke mme idịd ake mbon ekembemme miin iso esobo akenie ukeme adinyaaña mbon amọ insio miin ke ubọk? Die ndin ke abasi ndufo akeme adifak ndufo nsio ke ubọk mmi?15Ndin ikiiyak Hesikaiya ibiaaña ndufo anyʌñ idat ndufo atịn usʌñ ntom. Ikiinịm anye ke akpanikọ, sia ibaaha abasi ndomokeed ke idịd me ke abio adidem ndomokeed a-akekanna adifak mbon amọ nsio ke ubọk mmi me ke ubọk mbọọñ ekembemme miin iso eba. Die ndin ke abasi ndufo adiifak ndufo isio ke ubọk mmi!”16Ikpọawo Senakerib emaekaa iso etañ ikọ edian Abọọñ Abasi enyʌñ edian Hesikaiya.17Adidem amaanyʌñ awet ñwed adinọ Abọọñ, Abasi Isrel ñnyọọ, anyʌñ atañ ikọ ami adian anye: “Kpa naña mme abasi mbon idʌñ mfen imiikinyaañake mbon ammọ isio ke ubọk mmi, kpa ntoro abasi Hesikaiya idiinyaañake mbon amọ isio ke ubọk mmi.”18Akem ammọ emaekama usem Hibru ekoot mbon Yeruselem e-ekedoroke ke ndibene, adinam ammọ ekop ndịk enyʌñ enyeñ idem ma ammọ edʌk edat abio.19Ammọ emaetañ ebaña Abasi Yeruselem kpa naña eketañ ebaña mme abasi mbon idʌñ mfen, e-edoññoke mme utom ubọk awo.20Adidem Hesikaiya ye prọfed Aisaiya ayịn Emọs emaeseeme ke akam enọ anyọñ ebaña ñkpọ ami.21Ndin Abọọñ amaadọñ enyere, akesoboke afịd mbon ekọñ ye mme adaiso ekọñ ye mme adaaha ke itie nnaaekọñ adidem Asiria. Ke ntoro anye amaawuọ anyọñ idʌñ amọ ke abuud. Ndin idaha anye akekaaha akedʌk tembịd abasi amọ, usʌk nditọ ideen amọ, kpa abʌk ye iyiib amọ, emaekpi anye ewot ke akañkañ.22Ntom ke Abọọñ akenyaaña Hesikaiya ye mbon Yeruselem asịññe ke ubọk Senakerib adidem Asiria ye ke ubọk afịd mbon mfen. Anye amaakpeme ammọ ke afịd usʌñ.23Uwak awo emaeben enọ edi ke Yeruselem edinọ Abọọñ ye mme nsọñudua enọ esọk Hesikaiya adidem Yuda. Ndin tọọñọ ke ini ado afịd mme idịd emaese anye nte andikpon ñkan.Ñkokkoidem, Ñwuọnda ye Ñkpa Hesikaiya
24Ke ini ado Hesikaiya amaadọñọ anyʌñ akpere ñkpa. Anye amaabọñ akam anọ Abọọñ, a-akebọọrọke anye anyʌñ anọ anye utịppe idiọọñọ.25Ado esịd Hesikaiya amaakokko ndin anye ikibọọrọke mfọn ekefọnnọ ye anye; ke ntoro Abọọñ amaayat esịd ye anye ye Yuda ye Yeruselem.26Akekem Hesikaiya amaatua ñkpọfiọk abaña ntañidem esịd amọ, kpa naña mbon Yeruselem ekenam; ke ntoro iyadesịd Abọọñ ikisịmme ammọ ke ini ukara Hesikaiya.27Hesikaiya amaanie uwak inie ye ukpono, ndin anye amaanam mme ufọk ubonoñkpọ ake silfa amọ ye kold ye mme nsọñudua itiad amọ, anem ufịk mfiọññọ, mme atuekọñ ye afịd mme nsọñudua ñkpọ.28Anye ñko amaabọp mme ufọk ekebonno abakpa idọk, ufa mmịn ye adan ọlif; anye amaanyʌñ anam mme aba anọ mme nsio-nsio enañ, ye aba anọ mme udịmedọñ.29Anye amaabọọp mme idʌñ anyʌñ anie uwak ibad edọñ ye ufene, sia Abasi amaanọ anye ataa uwak inie.30Akedo Hesikaiya akesiit iso iwuod idịm Kihọn anyʌñ asio mmọọñ ado yak afeghe akaa ñkañ usobutịn Abio Defid. Anye amaakịt unen ke afịd ñkpọ se anye aketuuk anam.31Ado ke ini mme isʌñutom ekebenne etob mme adaukara Babilọn nọ edibịp anye ebaña utịppe idiọọñọ aketịppeke ke idʌñ, Abasi amaakpọñ anye ke idem amọ adidomo anye ñnyʌñ ndiọọñọ afịd se ikisịne ke esịd amọ.32Mme ñkpọ mfen se ikitịppe ke ukara Hesikaiya ye mme utom ñwaidem amọ ewet esịn ke ñkukịd prọfed Aisaiya ayịn Emọs ke mme ñwed mbʌkutom ndidem Yuda ye Isrel.33Hesikaiya amaakeduọk adudu ye mme eteete amọ emaenyʌñ ebuuk anye ke abod ake mme udi mbon ubon Defid ebaaha. Afịd Yuda ye mbon Yeruselem emaenọ anye ukpono ke ini ñkpa amọ. Ndin Manase ayịn amọ amaadat itie amọ nte adidem.Biblica, Inc.