Udiana Ñwed Krọnikịd26
Usaiya Adidem Yuda
1Akekem afịd mbon Yuda emaeben Usaiya, a-akedooho isua duob mme itiokeed, enyʌñ enam anye adidem ke itie ete amọ Amasaiya.2Anye ado andikitịmme mbọp Elad anyʌñ atịmme aben asịn anọ Yuda ke adidem Amasaiya amaakenie nduọkadudu ye mme eteete amọ.3Usaiya akedo isua duob mme itiokeed idaha anye akedooho adidem, ndin anye amaakara ke Yeruselem isua aba mme duob mme iba. Anyịñ eka amọ akedo Yekolia, eka amọ aketo Yeruselem.4Anye amaanam se inen ke iso Abọọñ, kpa naña ete amọ Amasaiya akenam.5Anye amaayem Abasi ke ayio Sakaraiya, a-akekpeebe anye ke mbaak Abasi. Adaña nte anye akediọọñọke Abọọñ, Abasi amaanọ anye edikan.6Anye amaakaa ekọñ ye mbon Filistia anyʌñ akewuut mme ndibene Kad, Yabne ye Asdọd. Akekem anye amaatịmme abọp mme abio se ikikpere Asdọd ye itie mfen ke atu mbon Filistia.7Abasi amaanwam anye nọ akan mbon Filistia anyʌñ akan mbon Arab e-ekedʌññọ ke Kọọ Baal anyʌñ akan mme Meunịm.8Mbon Amọn emaeben utịb esọk Usaiya, ndin etob amọ amaasuana tutu asịm adaña Iyib, sia anye amaanie ataa adudu.9Usaiya amaabọp mme tọwa ke Yeruselem ke Inuaatob Inuuk, ke Inuaatob Abedeñ ye ke ñkpitʌñ ndibene, ndin anye amaasọọñọ ammọ.10Anye amaanyʌñ abọp mme tọwa ke anaan anyʌñ atịppe uwak ube mmọọñ, sia anye amaanie uwak ufene ke mme mben abod ye ke unaisọñ. Anye amaanie mbon e-ekenamma utom ke inwañ amọ ye mme inwañ fain ke mme abod ye ke mme nseghe isọñ, sia anye amaama inwañ.11Usaiya amaanie ekọñ akenekkeke abọ ukpeeb, ke mbeeñeidem adiwuọ ke mme ikpeghe asañake akekem ye mme ibad ammọ nte Yeiyel awedñwed aketịmme ammọ idem ye Maaseiya adaaha ke idak ndadusʌñ Hananaiya, keed ke atu mme adaaha ufọk mbọọñ.12Afịd ibad mme adadusʌñ ke mme ufọk ekeseeghe ñkpọ ebaña mbon anwan ekedo tọsịn iba mme ikie itiokeed (2,600).13Ke idak ammọ ideen mbon ekọñ tọsịn ikie ita mme itiaba mme ikie ition (307,500) ekesịne se imaikibọ ukpeeb ke ekọñ, udịm a-akenieghe adudu adinọ adidem ibededem nọ akan mme asua amọ.14Usaiya amaanọ mme atuekọñ, eduad, itam ukwak, nsiine ekọñ, utịgha ye itiad ikañakpọ esọk afịd mbon ekọñ.15Ke Yeruselem anye amaanam usọ e-ekekamake ke mme tọwa ye ke mme inuuk ndibene nọ mbon ekọñ ekeme editop idañ ye mme ikpọ itiad ntọ ke mme ndibene. Etob amọ amaasuana akaa anyan, sia anye amaabọ unwam akekponno tutu anye ado anie adudu.16Ado ke Usaiya amaakekappa anie adudu, ntañidem amọ amaadat iduọ asọk anye. Anye ikinamma akpanikọ ke iso Abọọñ Abasi amọ, amaanyʌñ adʌk ke tembịd Abọọñ akefọp insensi ke akpokoro uwa insensi.17Aku Asaria ye mme anie esịd aku Abọọñ anaañ emaekeene anye edʌk.18Ammọ emaeketañ ikọ ye adidem Usaiya enyʌñ ebo, “Idooho ke unen mfo, Usaiya, adifọp insensi nnọọ Abọọñ. Utom anye ado anie mme aku, mme nditọ Erọn, ake emaekekpọnnọ enịm enọ adifọp insensi. Kpọñ adisana itie, sia afo umuukunamma akpanikọ; ndin Abọọñ Abasi iduunọọhọ fiin ukpono.”19Usaiya, a-akekamake usan insensi ke ubọk amọ, abeeñe idem adifọp insensi, amaayat esịd. Ke ini anye akesʌkkọ akpot ikọ ye mme aku ke iso ammọ ke iso akpokoro uwa ke tembịd Abọọñ, akpamfia amaatịbe awuọñọ anye ke akoiso.20Ke ini Asaria ekamba aku ye afịd mme aku mfen ekeseeghe anye, ammọ emaekịt ke anye amaanie akpamfia ke akoiso, ntoro ke ammọ ekesọsọp esio anye. Ke aditịm ntañ, anye ke idem amọ amaanie udọñ adikpọñ, sia Abọọñ amaafiime anye ye udọñọ.21Adidem Usaiya amaanie udọñọ akpamfia tutu usen anye akekpaaha. Anye akedʌñ ke isio-isio ufọk, ye udọñọ akpamfia, enyʌñ enọ anye ikpan adika tembịd Abọọñ. Yọtam ayịn amọ awodeen akese ñkpọ abaña akwere adidem anyʌñ akara mbon awo ke idʌñ.22Mme ñkpọntịppe mfen ke ini ukara Usaiya, ke ntọọñọ tutu awuọ utịd, ado se prọfed Aisaiya ayịn Emọs akewet.23Usaiya amaakeduọk adudu ye mme eteete amọ, emaenyʌñ ebuuk anye ekpere ammọ ke itie ubuuk akpo ake mme mbọọñ ekenieghe, sia mbon awo ekebo, “Anye amaanie akpamfia.” Ndin Yọtam ayịn amọ awodeen amaadat itie amọ nte adidem.Biblica, Inc.