Akpa Ñwed Samwel25
Defid, Nabal ye Abikel
1Akem Samwel amaakpa, ndin afịd Isrel emaeboho atọ keed adifʌhọ anye; ammọ emaenyʌñ ebuuk anye ke isọñ idʌñ amọ ke Rama. Ndin Defid amaasaña asọiyọ adʌk Akpautatan Paran. 2Akem awo keed amaaba ke Maon, a-akenieghe inie eti-eti ke Kamel, amaanekke amọinyọ. Anye amaanie ebod tọsịn keed (1,000), ye edọñ tọsịn ita (1,000), anye akefatta ammọ ided ke Kamel.3Anyịñ amọ akedo Nabal; anwaan amọ akekere Abikel. Anye akedo awo ifiọk ye uyaiya anwaan, ado ebe amọ akedo ataa asọñido awo ke mme adinam amọ, anye aketo aduuk Kaleb.4Ke ini Defid akesʌkkọ aba ke anaan, anye amaakop ke Nabal asʌk afat edọñ ided.5Ndin Defid amaadọñ ñkparawa ideen duob anyʌñ abo, “Ikaa ibịne Nabal ke Kamel ikikọọm anye innọ.6Ibo anye: ‘Itọñ uwem usọñ fiin! Idem usọñ fiin ye afịd ufọk mfo! Yak idem usọñ fiin ye afịd ufọk mfo!7“ ‘Ndin ami mmekop ke idahami ado ini ufat edọñ ided. Idaha mme akpemeedọñ mfo ekebaaha ye ñnyịn, ñnyịn ikidiọọhọ ye ammọ, ñko afịd ini ammọ ekebaaha ke Kamel ñkpọ ammọ ndomokeed ikisoppo.8Bịp nditọufọk mfo ke ammọ eyaudọkkọ fiin. Ke ntak ado fọn ido ye ideen mmi, sia adooho ñnyịn idi ke ini usọrọ. Mbọk nọ nditọufọk mfo ye Defid ayịn mfo se adodo udʌkkọ fiin ubọk.’ ”9Ke ini ideen Defid ekedisịmme ammọ emaenọ Nabal etob Defid. Ndin esọñ eda ebet ibọọrọ.10Nabal amaabọọrọ nditọ Defid, “Anie ido Defid ami? Anie ido ayịn Yesi ami? Uwak nditọufọk ediañña ekpọñ mme eteufọk amọ ke mme ini ami.11Ntaha ami ñkpebenne uyo ye mmọọñ mmi, ye unam a-ami ñkewotto nnọ mbon e-efatta edọñ mmi ided ñyaak nnọ ideen e-etooho itie ami ndiidiọọñọke edi-e?”12Mme ideen Defid emaekanna iso etịmme edem enyọñọ. Ekekesịm ammọ emaetañ afịd se anye aketañ enọ Defid.13Ndin Defid amaabo mme ideen amọ, “Ndufo keedekeed ibọbọ akañkañ ndufo!” Ammọ emaenyʌñ enam ntoro, Defid ñko amaanyʌñ abọbọ ake amọ. Ñkpọ nte ideen ikie inaañ (400) emaekeene Defid ke ini ikie iba (200) ekesuuhọ eba ekpeme ñkpọ ammọ.14Keed ke atu mme nditọufọk Nabal amaadọkkọ Abikel, anwaan Nabal, “Defid akedọñ mme isʌñutom eto ke anaan edinọ eteufọk ñnyịn ekọọm amọ, ado anye akenọ ammọ usọñanyen.15Ado ibon ado emaenekke efọn ye ñnyịn. Ammọ ikidiọọhọ ido ye ñnyịn, ñko afịd ini ake ñnyịn ikibaaha do ye ammọ ñkpọ ñnyịn ndomokeed ikisoppo.16Akonayio ye uweemeayio ammọ ekedo nte ndibene inọ ñnyịn afịd ini ake ñnyịn ikiseeghe ufene ñnyịn ikpere ammọ.17Ndin kere nyʌñ se se afo akpekan anam, sia unọmọ mmọdo ana anọ eteufọk ñnyịn ye afịd ufọk amọ. Anye ado ataa awo ibak a-adooho awo ndomokeed ikanna itañ ikọ ye anye.”18Abikel amaadịppe idem ini keed. Anye amaaben uyo ikie iba (200) ye ukọd ke ikịm iba, ye edọñ ition ediọññọ ema ye udomo ufọfọb abakpa ition ye uyo resịn ikie (100) ye uyo enyịmmeke fik ikie iba (200) anyʌñ abọp ammọ ke mme dọñki.19Ndin anye amaabo nditọufọk amọ, “Itọọñọ isañ; ami ñyaikeene ndufo ke edem.” Ado anye ikidọkkọke ebe amọ Nabal.20Nte anye asʌkkọ awat dọñki amọ aka ke abod abedeñ, sese Defid asọiyọke ke mi adi ye mme ideen amọ, ñko anye amaasoobo ammọ.21Defid akesʌk abo, “Ami ado utak-utak, afịd naña ñkekpeme mme inie amọ ke anaan mbaak ñkpọ ndomokeed adisop. Anye añkpe miin usiene idiọọk ke eti ñkpọ a-ami ñkenamma.22Yak Abasi amia Defid ufen, ñko ntoro akpọsọñ-akpọsọñ, adieke adooho asịm ubakusen ami nsʌhọ ayaara ndomokeed ke atu afịd se inie anye!”23Ke ini Abikel akekịtte Defid, anye amaasọiyọ ke dọñki amọ usọp-usọp anyʌñ asuuk iwuod asịn ke isọñ ke iso Defid.24Anye amaaduọ anye ke ukod ate: “Abọọñ mmi feen nọ ayịnufọk mfo, ndin yak ami ntañ ikọ unọ fiin; kop se ayịnufọk mfo anie aditañ.25Mbọk abọọñ mmi, kuukpañ utọñ unọ ibak ete ado Nabal. Anye aba nte anyịñ amọ, anyịñ amọ awuọñọ ntʌn, ñko ndisịme akeene anye. Amaado ami, ñkekịtte ideen abọọñ mmi akedọññọ.26Ndin idahami, abọọñ mmi, adaña nte Abọọñ Abasi mfo aduuho uwem sia Abọọñ mfo amaunọ adikan ke adukpan fiin adiduọk iyiib ye adidat ubọk mfo nsio usiene nnọ idem mfo, yak mme asua mfo ye afịd mbon se ukọbọ fiin eba nte Nabal.27Ndin yak enọ ami, ake ayịnufọk mfo abenne asọk abọọñ mi, ado se enọ mme ideen u-ukeeneke fiin.28“Mbọk dakka nọ ayịnufọk mfo ke naña udue. Abọọñ Abasi mfo ayaanam itie ubọọñ abọọñ mmi akpeene ke isọñ, sia adooho afo anwana ekọñ anọ Abọọñ ñko ukwañido ndomokeed idiibaaha ke uwem mfo adaña nte afo abaaha ke uwem.29Akpekọm awo ubịne fiin adiben uwem mfo nsio, uwem abọọñ mmi ayaabọbọ asịne ke abek uwem Abọọñ Abasi mfo, ado amaado uwem mme asua mfo, anye ayaatop aduọọk nte itiad esioho ke esịd ekpad.30Ke ini Abọọñ anamma afịd nti ñkpọ ake anye akenwọñọke anọ abọọñ mmi anyʌñ anam anye ado andikara ke Isrel,31abọọñ mmi idiinieghe ke esịd amọ ñkpọ iduọesịd a-atooho ke uduọk iyiib ntịme-ntịme me ke adisio usiene nnọọ idem amọ. Ñko ke ini Abọọñ adiinọ abọọñ mmi mfọn adikan, toiyo ayịnufọk mfo.”32Defid amaabo Abikel, “Ekọọm anie Abọọñ Abasi Isrel, ake udọññọ fiin mfịn ami yak adisoobo ye ami.33Yak adidiọñ usịm fiin ke adinen ikpe mfo ye ke afo adinam yak ami ñkuuduọk iyiib.34Imiidooho, ke akpanikọ adaña nte Abọọñ Abasi Isrel aduuho uwem, anye añkpan miin adunọmọ fiin, akpedo afo ukusọppọ uduñkịt miin ibaaha ayaara ufọk Nabal se ikpikiba ke uwem ke usiere usen.”35Ndin Defid amaabọi anye se anye akekoono aben asọk anye amaanyʌñ abo, “Nyọñ ufọk ke emem. Ami mmekop ikọ mfo ñnyʌñ unọ fiin se afo abeeñe.”36Ke ini Abikel akekaaha abịne Nabal anye mmọdo akeba ke ufọk asʌk adia usọrọ nte ake adidem. Anye amaanekke akpa mmịn anyʌñ aba ke ataa ekamba inemesịd. Ke ntak ado Abikel ikidọkkọke anye ñkpọ ndomokeed tutu ayio asiere.37Ndin ke ubakusen, ke ini ukọd amaakefuño Nabal, anwaan amọ amaadọkkọ anye afịd mme ñkpọ ami, ndin esịd amaaduọ anye, anye adiba nte itiad.38Ñkpọ nte usen duob akeboiyo Abọọñ amaayʌppọ Nabal ndin anye amaakpa.39Ke ini Defid akekoppo ke Nabal akpa, anye amaabo, “Ekọọm anie Abọọñ ake atọhọke utọk iwuod mmi ye Nabal ke anye adinam ñkpọ insịn miin ke ndek. Anye atre ayịnufọk amọ adinam idiọọk anyʌñ aben idiọọk ido Nabal adot anye ke iwuod amọ.”Ndin Defid amaadọñ utom anọ Abikel abo yak anye ado anwaan imọ.40Nditọufọk amọ emaekaa Kamel enyʌñ ekebo Abikel, “Defid idọñ ñnyịn abo iduben fiin idi nte anwaan amọ.”41Anye amaasuuk iso asịn ke isọñ amaanyʌñ abo, “Ami ndo ayịnufọk mfo ndin mmenyʌñ mbeeñe idem adinam afịd se afo atañ ñnyʌñ ñyet ukod nditọufọk abọọñ mmi.”42Abikel amaasọsọp adọọk adoro ke dọñki anyʌñ asaña ye nditọufọk ibaan amọ ition ye isʌñutom Defid akaa akedo anwaan Defid.43Defid amaanyʌñ adọdọ Ahinoam awonwaan Yesriil, ndin ammọ awo iba ekedoñño ibaan amọ.44Ado Sọọl amaaben ayịn awonwaan amọ Maikal, anwaan Defid anọ Paltiel ayịn awodeen Lais, a-aketooho Kalim.
Biblica, Inc.