Akpa Ñwed Ndidem8
Eben Akebe Edioomo edi Tembịd
1Ndin Adidem Sọlọmọn amaakoot mme ñkpisọñ Isrel edi ke iso amọ ke Yeruselem, afịd mme iwuod ubon ye mme ufọk, ediben akebe edioomo Abọọñ edọọk eto Saiyọn, Abio Defid.2Afịd nditọ Isrel emaedisoobo ke esịd keed ekeene Adidem Sọlọmọn ke ini usọrọ ke afiọñ Etanim, ayọhọ afiọñ itiaba.3Ke ini afịd mme ñkpisọñ ke Isrel emaekediwuọ, mme aku emaeben akebe edioomo,4ndin ammọ emaeben akebe edioomo Abọọñ ye atayad mbono ye afịd ndisana ñkpọ mbana ufọk ke esịd amọ. Mme aku ye mme Lifai emaekoono afịd ñkpọ edọọk,5ndin Adidem Sọlọmọn ye afịd esob Isrel e-ekediighe edisoobo ye anye ekeba ke iso akebe edioomo, esʌk ewa uwak-uwak edọñ ye mme enañ ake awo imiikikanna adiwewet me adibabat.6Mme aku ndin emaeben akebe edioomo Abọọñ ekaa itie amọ ke ataa esịd ubeed tembịd, Ata Adisana Itie, ekenịm anye ke idak mme mba serubim.7Mme serubim emaetat mme mba ammọ ke anyọñ itie akebe edioomo emaenyʌñ efʌk akebe edioomo ye mme mboi edatta eben anye.8Mme mboi ami emaenyọọñ tutu eda ekịt utịd ammọ ke Adisana Itie ke iso ataa esịd ubeed, ado awo ikikịtte ito anwa Adisana Itie; ndin ammọ mmọdo esʌk eba tutu mfịn ami.9Ñkpọ ndomokeed ikisịneke ke akebe edioomo ikan itiadñwed iba ake Moses akesịnne ke Họreb, ke itie Abọọñ akenamma edioomo ye mbon Isrel ke ammọ emaekewuọñọ eto Iyib.10Ke ini mme aku emaekekpọñ Adisana Itie, ntọñanyọñ amaafʌk tembịd Abọọñ.11Ndin mme aku ikikanna adinam utom ammọ ke ntak ntọñanyọñ, sia ubọọñ Abọọñ amaayọhọ tembịd amọ.12Ndin Sọlọmọn amaabo, “Abọọñ abo ke imọ idiidʌñ ke ñkịm-ñkịm ntọñanyọñ;13Ke akpanikọ ami mmebọp ñwuọnda uyaiya tembịd unọ fiin, itie se afo adʌñ ke nsi-nsi.”14Ke ini afịd esob Isrel ekesʌkkọ eda do, adidem amaawọññọ anyʌñ adiọñ ammọ.15Ndin anye amaabo:“Itooro anie Abọọñ, Abasi Isrel, a-adooho anye adat ubọk amọ anam se anye akedat inua amọ anwọñọ anọ ete mmi Defid. Sia anye amaabo,16‘Tọọñọ ke usen a-ami ñkebenne ikọd mmi Isrel nsio ke Iyib, ami mmekke abio ke esiin Isrel ndomokeed nọ ebọp tembịd ma Anyịñ mmi aba ke ndo, ado ami mmemek Defid adikaara ikọd mmi Isrel.’17“Ete mmi Defid amaakere ke esịd amọ adibọp tembịd nnọọ Anyịñ Abọọñ, Abasi Isrel.18Ado Abọọñ amaabo ete mmi Defid, ‘Afo amaanam eti-eti adikere ke esịd mfo adibọp tembịd nnọọ Anyịñ mmi.19Kpayeado, idooho afo uduudo andibọb tembịd ado, ado ayịn mfo, abʌk ye iyiib mfo, anye adiido andidiibọp tembịd inọ Anyịñ mmi.’20“Abọọñ anịm enwọñọ ake anye akenamma: ami mmedat itie Defid ete mmi ndin idahami ami ntie ke ebekpo Isrel, kpa naña Abọọñ akenwọñọ, ndin ami mmebọp tembịd ado nnọ Anyịñ Abọọñ, Abasi Isrel.21Ami mmenam itie ke ndo nnọ akebe edioomo, a-asịneke edioomo Abọọñ a-anye akenamma ye mme eteete ñnyịn idaha anye akesioho ammọ ke Iyib.”
Akam Adidiọñ Sọlọmọn
22Ndin Sọlọmọn amaada ke iso mbid kold akpokoro ekedotto Uyo Iso Abasi; Abọọñ ke iso afịd esob Isrel, atat ubọk amọ awọt anyọñ23ndin amaabo:“Abọọñ, Abasi Isrel, ibaaha Abasi mfen a-abaaha nte afo ke hefịn ke anyọñ me ke idak isọñ; afo ake anịmme edioomo ima mfo ye mme ikọd mfo ake esʌkkọ esaña ke afịdesịd ke usʌñ mfo.24Afo amenịm enwọñọ mfo anọ awo mfo Defid ete mmi; afo amenwọñọ ke inua mfo ndin ke ubọk mfo amenam anye asu, kpa naña anye ado mfịn ami.25“Idahami Abọọñ, Abasi Isrel, nịm nọ afʌnadeen mfo Defid ete mmi mme enwọñọ a-afo akenamma anọọ anye idaha afo akebooho, ‘Afo uduutreke adinie adiaakpa se idiitie ke iso mmi ke ebekpo Isrel, akpekapado ubon mfo eyaekpeme ke afịd se ammọ enam ke edisaña ke iso mmi nnam akpanikọ kpa naña afo anam.’26Ndin idahami, Abasi Isrel, yak ikọ afo akenwọñọke anọọ afʌnadeen mfo Defid ete mmi asu ke akpanikọ.27“Ado me Abasi ayaasʌk adʌñ ke ederimbod? Mme anyọñ, kpa ataa anyọñ akoñño akan, ikanna ukem fiin. Nwaanwa dise tembịd ake ami mbọppọ!28Sʌk kpañ utọñ kop akam afʌnadeen mfo ye ñkpeubọk nyʌñ tua mbọm, Abọọñ Abasi mmi. Kop aseeme ye akam ake afʌnadeen mfo abọññọ ke iso mfo ke usen mfịn.29Yak anyen mfo atara ase tembịd ami akonayio ye uweemeayio, itie ami a-afo akebooho, ‘Anyịñ Mmi ayaaba ke ndo,’ nọ afo uduukop akam ake afʌnadeen mfo abọññọ ke itie ami.30Kop akam ñkpeubọk afʌnadeen mfo ye ake ikọd mfo Isrel ke ini ammọ ebọññọ akam ese itie ami. Kop ke anyọñ, itieidʌñ mfo, ndin umaukop, feen.31“Awo ndomokeed amaadue mbọhọidʌñ amọ ndin ado ke ana anye ata unwọñọ ndin ammọ edi mi enyʌñ enwọñọ unwọñọ ado ke iso akpokoro uwa mfo ke tembịd ami,32ndin tie ke hefịn kop nyʌñ tịppe ñkpọ nam. Biere ikpe ke ufọọd ikọd mfo, sua nọ andidue ke adisuuk se ammọ ekenam ndoot ammọ ke iwuod, ye ke adisaana mbon unana ndudue ñyaak nyʌñ nam ye ammọ nọ asaña akekem ke unana ndudue ammọ.33“Ke ini asua akanna mbon mfo Isrel sia ammọ udue fiin, ndin ke ini ammọ etịmmeke edem edi enyʌñ enọ anyịñ mfo itooro, ebọñ akam enyʌñ enam ñkpeubọk unọ fiin ke tembịd ami,34ndin kop ke anyọñ nyʌñ feen ndudue ikọd mfo Isrel ndin ben ammọ tịmme nyọñ di ke isọñ ake afo akenọọhọ mme eteete ammọ.35“Ke ini emaekʌk mme enyọñ ndin edịm ideppe sia mbon mfo udue fiin, ndin ammọ ebọñ akam ese itie ami enyʌñ enọ anyịñ mfo itooro enyʌñ etịmme edem ekpọñ ndudue ammọ sia afo amemia ammọ ufen,36ndin tie ke anyọñ kop nyʌñ feen ndudue ikọd mfo, mbon mfo Isrel. Kpeep ammọ adisaña ke nnen-nnen usʌñ, nyʌñ nam edịm adep ke isọñ ake afo akenọọhọ mbon mfo ke udeeme.37“Adieke akañ me udọñọ nsobo adʌkkọ isọñ, me ikañekpo me mfuud, me mme ñkukuñkpọyọriyọ me mme ataktak, me idaha asua akannake abio ammọ ndomokeed akʌk, se utọ nsobo me udọñọ akpededi,38ndin ke ini awo ndomokeed ke atu mbon mfo Isrel abọññọ akam me anamma ñkpeubọk, ke ekịtte ukuud esịd ammọ, enyʌñ etat ubọk enyan ke tembịd ami,39nyʌñ kop to anyọñ, itieidʌñ mfo. Feen nyʌñ nam; nam ye afịd awo akeene afịd se ammọ enam, sia afo amediọọñọ esịd ammọ (sia afo ikpọọñ adiọọñọ esịd afịd awo),40nọ ato do ammọ uteeñe fiin ke afịd ini se ammọ edʌñ ke isọn ake afo akenọọhọ mme eteete ammọ.41“Amaado asenawo ake imiitooho ubon mfo Isrel ado ato anyan idịd adi ke ntak anyịñ mfo,42sia ammọ eyaekop etob ekamba anyịñ mfo ye akpọsọñ ubọk mfo ye adibenne ubọk mfo, ammọ emaedi edibọñ akam ese tembịd ami,43nyʌñ kop to anyọñ, itieidʌñ mfo. Nam se adodo ake asenawo ado ubeeñeke fiin, nọ afịd awo ke ekondo ediọọñọ anyịñ mfo enyʌñ uteeñe fiin, kpa naña mbon mfo Isrel enam, enyʌñ ediọọñọ ke ufọk ake ami mbọppọ mi akere Anyịñ mfo.44“Ke ini mbon mfo ekaaha ekọñ ye mme asua ammọ, itie akeedodo ake afo adọññọ ammọ, ndin ammọ emaebọñ akam enọ Abọọñ ese abio ake afo amekke ye tembịd ake ami mbọppọ nnọ Anyịñ mfo,45ndin tie ke anyọñ kop akam ye ñkpeubọk ammọ, nyʌñ nọ ammọ se ido unen ammọ.46“Ammọ emaudue fiin, sia ibaaha awo ndomokeed ammiinamma idiọọkñkpọ, ndin afo ayat esịd ye ammọ anyʌñ ayaak ammọ anọ mme asua ammọ, e-ekekoonoke ammọ ekaa ke isọñ ammọ, a-anyọọñọ usʌñ me a-akpereke;47ndin adieke ammọ ekappake esịd ke isọñ e-emʌmmọ ammọ ukad, enyʌñ ekappa esịd enyʌñ ukpe fiin ubọk ke isọñ e-eketañña ammọ enyọñ enyʌñ ebo, ‘Ñnyịn iminam idiọọkñkpọ, ñnyịn iminam ndudue iminyʌñ inam se idiọọk’;48ndin adieke ammọ etịmmeke edem ubịne fiin ke afịd esịd ye ukpọñ ammọ ke isọñ mme asua ammọ e-eketañña ammọ eka, enyʌñ ebọñ akam ese isọñ a-afo akenọọhọ mme eteete ammọ, ese abio a-afo akemekke enyʌñ ese tembịd a-ami mbọppọ nnọ Anyịñ mfo;49ndin tie ke anyọñ, itieidʌñ mfo, kop akam ye ñkpeubọk ammọ, nyʌñ toppo ammọ ikpe.50Nyʌñ feen nọ mbon mfo, ake udueghe fiin; feen afịd ndudue ake ammọ udueghe fiin, nyʌñ nam mbon e-esịnne ammọ ukad etua ammọ mbọm;51sia ammọ edo mbon mfo ye udeeme mfo, a-afo akesioho ke Iyib, asio ke ufiob edemeikañ atadukwak.52“Yak anyen mfo akịt ñkpeubọk afʌnadeen mfo ye ñkpeubọk mbon mfo Isrel, nyʌñ kpañ utọñ nọ ammọ ini akeedodo ammọ etuaha ukoot fiin.53Sia afo amaamek ammọ asio ke atu mme idịd ekondo edido udeeme mfo, kpa naña afo aketañ ato afʌnadeen mfo Moses idaha afo, Abọọñ Andikara, akesioho mme ete ñnyịn ke Iyib.”54Ke ini Sọlọmọn amaakebọñ afịd mme akam ami inyʌñ inam ñkpeubọk inọ Abọọñ, anye amaadakka ada ke itie ake anye aketọọñọke edọñ atat ubọk amọ ase hefịn.55Anye amaadakka ada anyʌñ adiọñ afịd mbono Isrel ke akpọsọñ uyio, ate:56“Itooro anie, Abọọñ, ake anọọhọ mbon amọ Isrel emem kpa naña anye akenwọñọ. Ikọ amọ ndomokeed ikpuuho ke atu afịd mme nti enwọñọ ake anye akenọọhọ ato afʌnadeen amọ Moses.57Yak Abọọñ Abasi ñnyịn aba ye ñnyịn kpa naña anye akeba ye mme ete ñnyịn; yak anye akuukpọñ akuunyʌñ afre anyen ibaña ñnyịn.58Yak anye awọññọ esịd ñnyịn akeene anye, ke edisaña ke ñkobitem nnọọ anye ñnyʌñ nam mme item amọ, mme ewʌhọ ye mme mbed ake anye akenọọhọ mme ete ñnyịn.59Ndin yak mme ikọ mmi ami, a-ami mbọññọ ke iso Abọọñ, akpere Abọọñ Abasi ñnyịn uweemeayio ye akonayio, nọ anye atoppo ikpe afʌnadeen ye ake mbon amọ Isrel akeene se eyem ke usen ke usen,60nọ afịd awo ke ekondo ediọọñọ ke Abọọñ ado Abasi ndin ke mfen ndomokeed ibaaha.61Ndin yak esịd ndufo akeene Abọọñ Abasi ñnyịn ayọhọ-ayọhọ, edidu uwem ñkeene mme ewʌhọ ñnyʌñ nnam mme item amọ, ke ini ami.”
Adidiọñ Tembịd
62Akem adidem ye afịd Isrel emaediana ye anye enam uwa ke iso Abọọñ.63Sọlọmọn amaawa uwa ewuana mfọn anọ Abọọñ: enañ tọsịn edịb mme iba (22,000) ye mme edọñ ye mme ebod tọsịn ikie mme edịb (120,000). Ndin adidem ye afịd Isrel emaediọñ tembịd Abọọñ.64Kpa ke usen ado adidem amaadiọñ ufọọd akwere adaaha ke iso tembịd Abọọñ, ke ndo anye amaanam ufọfọb uwa, uwa ñkpasi ye uwa akpọñ unam, sia akpokoro uwa brọns a-akedaaha ke iso Abọọñ amaasịp abọhọ adikan ndọñọ mme ufọfọb uwa, mme uwa ñkpasi ye mme akpọñ unam a-atooho mme uwa ewuana.65Ntoro ke Sọlọmọn akenam usọrọ ke ini ado, ndin afịd Isrel ye anye, ataa ekamba esob, mme awo emaeto ke Lebo Hamad tutu asịm ke Wadi ke Iyib edi. Ammọ emaedaara ke iso Abọọñ Abasi ñnyịn ke usen itiaba dian usen itiaba mfen, afịd akedo usen duob mme inaañ.66Ke edemusen anye amaanam mme atu awo enyọñọ. Ammọ emaediọñ adidem ndin enyọñọ ufọk, ke inemesịd ye idaara ke esịd ke afịd nti ñkpọ se Abọọñ akenam anọ afʌnadeen amọ Defid ye ikọd amọ Isrel.Biblica, Inc.