Akpa Ñwed Ndidem18
Elaiya ye Obadaiya
1Akekpeene ko, ke ayọhọ isua ita, uyio Abọọñ amaasịm Elaiya: “Kaa ke wọt Ehab idem, ndin ami ñyaanọ edịm adi isọñ.”2Ndin Elaiya amaakaa akewọt Ehab idem amọ.Ndin akañ amaakpon eti-eti ke Sameria,3ndin Ehab amaakoot Obadaiya, andise ñkpọ mbaña ufọkadidem. (Obadaiya akedo awo akenịmme Abọọñ ke akpanikọ.4Ke idaha Yesibeel asʌkkọ awot mme prọfed Abọọñ, Obadaiya amaakoono mme prọfed ikie adịp ammọ ke abaitiad iba, aba mme duob ke ammọ keedekeed, anyʌñ anọ ammọ ndidia ye mmọọñ.)5Ndin Ehab amaabo Obadaiya, “Kaa ke afịd isọñ ke mme ube mmọọñ ye mme abedeñ. Akemeido imikeme adikịt mbid se enam mme enañmbakara ye mme ñyịn ñwaahadọñki eta edu uwem mbaak ñnyịn idiwot unam ñnyịn ndomokeed.”6Ke ntoro ammọ emaebakka isọñ a-akenaaha ammọ esaaña ese, Ehab akaa efaak keed ndin Obadaiya adʌk efaak uko.7Obadaiya akesʌk asaña aka, Elaiya amaasoobo anye. Obadaiya amaadiọọñọ anye, anyuuk iwuod ke isọñ, ndin ate, “Elaiya abọọñ mmi, me afo ke anekke akpedo?”8Anye amaabọọrọ, “Ntoro, kaa ke dọkkọ eteufọk mfo, ‘Elaiya mmọ mi.’ ”9Obadaiya amaabịp, “Nsoo ke ami nnam ndue?” “nọ afo abiiyaak afʌnadeen mfo isịn ke ubọk Ehab nọ awot?10Adaña nte Abọọñ Abasi mfo aduuho uwem, ibaaha idịd me abioubọọñ ake eteufọk mmi imiidọññọ yak ekuuyem fiin. Ndin idịd me abioubọọñ emaebo ke afo ubaaha ke udo, anye amaanam ammọ enwọñọ ñkpọ ebo ke mmimọ ikanna ukịt fiin.11Ado idahami afo ante miin ñka ñkedọkkọ eteufọk mmi mbo, ‘Elaiya mmọ mi.’12Ndiọọñọke nte Sịbidịd Abọọñ akeme aduben fiin ñkaa ami mmaadakka ukpọñ fiin. Adieke ami ñkaaha ñkedọkkọ Ehab ndin anye ukịtte fiin, anye ayañwot miin. Ado ami afʌnadeen mfo mmekpono Abọọñ tọọñọ ke uyịn mmi.13Abọọñ mmi, ado nte afo ukoppo se ami ñkenam idaha Yesibeel akesʌkkọ awot mme prọfed Abọọñ? Ami mmaadịp mme prọfed Abọọñ ikie ke abaitiad iba, aba mme duob ke keed, ñnyʌñ nnọ ammọ ndidia ye mmọọñ.14Ndin idahami afo ate ami ñka mbịne eteufọk mmi ñkebo, ‘Elaiya mmọ mi.’ Anye ayañwot miin!”15Elaiya amaabo, “Adaña nte Abọọñ Andikponñkan aduuho, ake ami nnamma ñkpọ nnọ, ami ñyaawọt Ehab idem mmi mfịn ami.”
Elaiya ke Abod Kamel
16Ndin Obadaiya amaakaa akesoobo ye Ehab anyʌñ adọkkọ anye, ndin Ehab amaakaa adisoobo ye Elaiya.17Anye amaakekịt Elaiya, Ehab amaabo anye, “Afo ke ado, afo andifịna Isrel?”18Elaiya amaabọọrọ. “Ami nnamma mfịna nnọ Isrel. Ado afo ye ufọk ete mfo enam. Afo amekpọñ item Abọọñ anyʌñ akeene mme Baal.19Idahami koot mbon awo ke afịd Isrel yak edinsoobo miin ke Abod Kamel. Ndin koono mme prọfed Baal ikie inaañ mme aba mme duob ye mme prọfed Asera ikie inaañ, ediaha ñkpọ ke akpokoro Yesibeel.”20Ndin Ehab amaanọ etob aka afịd Isrel anyʌñ abon mme prọfed ke Abod Kamel.21Elaiya amaakaa iso mbon awo ndin amaabo, “Adiikpeene die ndufo edibiere me ediika mbeñ uke? Adieke Abọọñ a-adooho Abasi, ikeene anye; ado adieke Baal adooho Abasi, ikeene anye.”Ado mbon awo ikibooho ñkpọ ndomokeed.22Ndin Elaiya amaabo ammọ, “Ami ikpọọñ ndo prọfed Abọọñ ake asʌhọke, ado Baal anie prọfed ikie inaañ mme aba mme duob (450).23Idat ñyaaraenañ iba isọk ñnyịn. Yak mme prọfed Baal eto emek keed enọ idem ammọ, ndin yak ammọ ekpok anye ntək-ntək enyʌñ edot ke eto ado ke esịn ikañ. Ami ñyaanam enañ anye ako ñnyʌñ ndot ke eto ado nsịnne ikañ ke esịd.24Ndin ndufo ekoot anyịñ abasi ndufo, ndin ami ñyaakoot anyịñ Abọọñ. Abasi anye a-abọọrọke ke ikañ, anye ado Abọọñ Abasi.”
Ndin afịd awo emaebo, “Se afo atañ afọn.”25Elaiya amaabo mme prọfed Baal, “Imek enañ keed ito idiọñ, sia ndufo emewak. Ikoot anyịñ abasi ndufo, ado ikiidomo ikañ.”26Ndin ammọ emaeben enañ ekenọọhọ ammọ enyʌñ ediọñ anye.
Ndin ammọ emaekoot anyịñ Baal tọọñọ ke ubakusen tutu uweemeayio. Ammọ emaebọñ, “Baal, bọọrọ ñnyịn!” Ado ibọọrọ ikibaaha; awo ndomokeed ikibọọrọke. Ammọ emaenyʌñ enek ekanna akpokoro uwa a-ammọ ekenamma.27Akedo ufọọd uweemeayio Elaiya amaatọọñọ adinọ ammọ ndọk. Anye amaabo, “Ibọñ ñkpo isọñ uyio! Ke akpanikọ anye ado abasi! Akemeido aba ke ekamba akikere, me anie se anam, me aka isañ. Akemeido adadaiya ndin ana etọi anye.”28Ndin ammọ emaenekke ebọñ ñkpo enyʌñ ekpok idem ammọ ke akañkañ ye eduad, naña ido ammọ akesido, tutu iyiib ammọ afiọrọ.29Ufọọd uweemeayio amaaboiyo, ammọ emaesʌk ekaa iso etañ etob tutu akem ini uwa ndubiayio. Ado ibọọrọ ndomokeed ikibaaha, awo ndomokeed ikibọọrọke, awo ndomokeed ikikpañña utọñ.30Ndin Elaiya amaabo afịd mbon awo, “Idi mi imbịne miin.” Ammọ emaedi ebịne anye, ndin anye amaadiọñ akpokoro uwa Abọọñ, ake emaekewuut.31Elaiya amaakoono itiad duob mme iba, keed ada anọ esiin keedekeed a-aketooho Yekọb, ake ikọ Abọọñ akesịmme, abo “Anyịñ mfo adiido Isrel.”32Anye amaakama mme itiad ado abọp akpokoro uwa ke anyịñ Abọọñ, ndin anye amaanyʌñ adọk ube a-anwañake akem adikpidọñọ udomo ñkpasi iba akanna anye.33Anye amaaneeñe eto abono, akpok enañ ntək-ntək ndin adoot ke eto ado. Ndin anye amaabo ammọ, “Idọñ mmọọñ ayọhọ ñkpoon atu inaañ inyʌñ inwañña iduọk ke uwa ye ke eto.”34Anye amaabo, “Imaana inam,” ndin ammọ emaemaana enam.
Anye amaanọ uyio, “Imaana inam ayọhọ akañ ita,” ndin ammọ emaemaana enam ayọhọ akañ ita.35Mmọọñ amaafiọrọ akanna akpokoro uwa anyʌñ ayọhọ ube.36Ke ini unam uwa, prọfed Elaiya amaawuọ ada ndin amaabọñ akam: “Abọọñ, Abasi Ebraham, Aisik ye Isrel, yak ediọọñọ mfịn ke afo ado Abasi ke Isrel ndin ke ami ndo afʌnadeen mfo ndin ke nnam afịd mme ñkpọ ami ke item mfo.37Mbọọrọ miin, Abọọñ, mbọọrọ miin, nọ ibon ami ediọọñọ ke afo, Abọọñ, ado Abasi, ndin ke afo amaana awọññọ ammọ esịd etịmme edi.”38Ndin ikañ Abọọñ amaaduọ anyʌñ afọp uwa, eto, mme itiad ye ntan, anyʌñ adai mmọọñ ke ube.39Afịd awo ekekịt ami, ammọ emaeduọññọ ke isọñ etua, “Abọọñ anye ado Abasi! Abọọñ anye ado Abasi!”40Ndin Elaiya amaanọ ammọ ewʌhọ, “Imʌm mme prọfed Baal. Ikiiyak awo ndomokeed afeghe!” Ammọ emaemʌm ammọ, ndin Elaiya amaanam ekoono ammọ edi Abedeñ Kisọn ndin ewoot ammọ do.41Ndin Elaiya amaabo Ehab, “Kaa, dia ñkpọ nyʌñ nwọñ, sia uyio ekamba edịm mmọdo.”42Ndin Ehab amaadakka adikidia ñkpọ ñnyʌñ ñnwọñ, ado Elaiya amaadọọk anyọñ Kamel, anʌhọ ke isọñ anyʌñ asịn iso amọ ke ufañ edọñ amọ iba.43Anye amaabo ayịnufọk amọ, “Kaa ke se inyañ.” Ndin anye amaadọọk akaa akese.
Anye amaabo, “Ñkpọ ibaaha do.”
Akañ itiaba Elaiya amaabo, “Tịmme kaa.”44Ayọhọ akañ itiaba ayịnufọk amaabo, “Ntọñanyọñ ake asịppe nte ubọk awo asʌk awuọ ato inyañ.”
Ndin Elaiya amaabo, “Kaa nyʌñ dọkkọ Ehab, ‘Beeñe sariọd mfo nyʌñ nyọñ mbaak edịm adubiọọñọ fiin.’ ”45Idaha ado, ikpaanyọñ amaakịm ye ntọñanyọñ, afịm adakka, ekamba edịm atọọñọ adidep ndin Ehab amaawat akaa Yesriil.46Adudu Abọọñ amaadoro Elaiya ndin anye amaanuuk afọñ amọ adọñ ke ñkpaha amọ, afeghe abọhọ Ehab tutu akewuọ Yesriil.
Biblica, Inc.