Akpa Ñwed Ndidem10
Abọọñanwaan Seba Adise Sọlọmọn
1Ke idaha akwa abọọñanwaan Seba akekoppo etob abaña Sọlọmọn ye ewuana amọ ye Abọọñ, anye amaadi adidomo Sọlọmọn nse ye ñkpọsọñ mbuume.2Ke anye adiwuọhọ Yeruselem ye ataa uwak udịm mbonisañ ye mme kamel ebiommo mme anemufịk mfiọññọ, uwak ibad kold, ye mme nsọñudua itiad; anye amaadi abịne Sọlọmọn amaanyʌñ adineme nsio-nsio ñkpọ se ikisịne anye ke esịd.3Sọlọmọn amaabọọrọ afịd mbuume amọ; ibaaha ñkpọ se ikisọñ ikan adidem adineeñe ñwọt anye.4Ke ini akwa abọọñanwaan Seba akekịtte afịd aniọñ Sọlọmọn ye ufọkadidem a-anye akebọppọ,5ndidia ke akpokoro amọ, naña mme adaaha amọ etie, nditọufọk ye mme nsiine ammọ, mbon ukama mmịn ye mme nsiine ammọ ye mme ufọfọb uwa a-anye akenamma ke tembịd Abọọñ, idem amaakpa anye ataa eti-eti.6Anye amaabo adidem, “Etob ake ami ñkekoppo ke idịd mmi mbaña mme utom mfo ye aniọñ mfo ado akpanikọ.7Ado ami ñkenịmme mme ñkpọ ami tutu ndi ndikịt ke anyen mmi. Ke akpanikọ, iwuọhọwuọ mbakka keed ke itie iba se eketañ ennọọ ubaña fiin; ke aniọñ ye ke inie, afo amenekke akan etob ake ami ñkekoppo.8Ana ado mbon mfo e-enekke ekop ataa inemesịd! Mme adaaha mfo, e-edaaha ke iso mfo afịd ini enyʌñ ekop aniọñ mfo, e-ekop ataa inemesịd!9Itooro anie Abọọñ Abasi mfo, a-anemme esịd ye afo anyʌñ unịm fiin ke ebekpo Isrel. Ke ntak nsi-nsi ima Abọọñ anieghe anọ Isrel, anye unam fiin adidem anọ ammọ, nọ afo anam unen ye nnekke-nnekke ido esọọñọ eda.”10Akem anye amaanọ adidem talen kold ikie mme edịb (120), akpọmiọk mfiọññọ, ye mme nsọñudua itiad. Ikibaaha aba naña ekemaana eben utọ akpọmiọk anemufịk mfiọññọ ake akwa abọọñanwaan Seba akenọọhọ Adidem Sọlọmọn edʌk edi.11(Mme ubom Hiram emaedat kold eto Ọfia edi; ammọ emaeto ke udo eben mme ikpọ mbiomo eto almuk ye mme nsọñudua itiad.12Adidem amaadat eto almuk abọp mme nnennda anọ tembịd Abọọñ ye ke ufọkadidem, anyʌñ adat anam mme ekpa ye mme ndidoudʌk anọ mbon ikwọ. Kpaanaanam awo itoboke inyʌññọ ikekịt eto almuk se iwak ntoro tọọñọ ke usen ado.)13Adidem Sọlọmọn amaanọ akwa abọọñanwaan Seba afịd udọñ amọ ye se anye akebeeñe, ke asioho se anye akenọọ anye ato ubeed ubọọñ amọ afep. Ndin anye amaatịmme anyọñ idịd amọ ye udịm mbon amọ.Mmọnyọ Sọlọmọn
14Udob kold se Sọlọmọn akebọọ kwa isua akedo talen ikie itiokeed mme ata mme itiokeed (666) ,15isịneke akʌk se anye abọ ato mme mbon mbịn ye mme anyamudua ye se ikito afịd mme ndidem mbon Arab ye mme adaukara ke mme idịd.16Adidem Sọlọmọn amaanam ikpọ atuekọñ ikie iba ekedatta umemịñ kold enam; ekekama sekel kold ikie itiokeed enam atuekọñ keed.17Anye amaanyʌñ anam ntək-ntək atuekọñ ikie ita kpa ke umemịñ kold, ekekama mina kold ita enam atuekọñ keed. Adidem amaabono ammọ ke Ufọkadidem ake Akai Lebanọn.18Ndin adidem amaadat nnʌkeniin anam ekamba ebekpo anyʌñ adat ataa eti kold afʌk anye.19Ebekpo akenie nsaña ndọọk itiokeed, ndin edem ado akenie ikara-ikara anyọñ. Mben ñkpọitie naña iba amaanie mme udodubọk, ekedaahake ekpe ke naña ñkañ iba.20Ekpe duob mme iba emaeda ke mme utọukod itiokeed ado, keed ke iwuod utọukod keedekeed. Akenaanam awo ikinamma utọ ado ke abio adidem ubọọñ ndomokeed mfen.21Afịd iko unwọññkpọ Adidem Sọlọmọn ekedoñño kold, ñko afịd mme ñkpọ ufọk ke Ufọkadidem ke Akai Lebanọn ekedoñño ataa adeghe kold. Ikibaaha ñkpọ ndomokeed se ekekama silfa enam, sia ke ayio Sọlọmọn ekedat silfa nte ñkpọ i-imiinieghe eti ekọmudua.22Adidem amaanie mme ikpọ ubom unyam udua ake Taasis ke akpainyañ ye mme ubom Hiram. Akañ keed ke isua ita ke anye akesitịmme anyọñ adi, akoono kold, silfa ye nnʌkeniin, ye mme amọnidiọk ye mme ikpọkebọk.23Adidem Sọlọmọn amaamọinyọ ke inie ye ke aniọñ akan afịd mme ndidem mfen ke ederimbod.24Afịd ekondo emaeyem ediba ke iso Sọlọmọn nọ edikop aniọñ ake Abasi akesịnne anye ke esịd.25Isua ke isua, awo ndomokeed se ikidi amaadat enọ adi, ñkpọ silfa ye kold, mme usesịne ñkpọ, mme ñkpọ ekọñ ye anemufịk ufọfiọññọ ñkpọ, mme enañmbakara ye mme ñwaahadọñki.26Sọlọmọn amaanie mme sariọd ye mme enañmbakara; anye akenie sariọd tọsịn keed mme ikie inaañ (1,400) ye enañmbakara tọsịn duob mme iba (12,000) ake anye akenyʌññọ abono ke mme abio sariọd ye adidem ke Yeruselem.27Adidem amaanam silfa awak ke Yeruselem nte ñkaña itiad, ndin eto sida emaewak nte mme eto sikamọ-fik ke mme mben abod.28Eketobo mme enañmbakara Sọlọmọn eto Iyib ye Kue; mbon unyam udua adidem ekedep ammọ eto Kue ke ekọmudua idaha ado.29Ammọ emaetobo sariọd keed eto Iyib ke ekọmudua sekel silfa ikie itiokeed (600), ye enañmbakara keed ke ikie keed mme aba mme duob (150) . Ammọ emaenyʌñ esịññe ammọ enọ esọk afịd ndidem mbon Hed ye ake mme Aram.Biblica, Inc.