Akpa Ñwed Krọnikịd19
Defid Akan Mbon Amọn
1Nte ñkpọ akaaha iso, Nahas adidem mbon Amọn amaakpa, ndin ayịn amọ amaadat itie amọ nte adidem.2Defid amaakere ke esịd amọ ate, “Ami ñyaafọn ido ye Hanun ayịn Nahas, sia ete amọ amaafọn ido ye ami,” Ndin Defid amaasio mme isʌñutom adọñ abo ekedọñ Hanun esịd ke ntak ñkpa ete amọ.Ke mme isʌñutom Defid emaekedisoobo ye Hanun ke isọñ mbon Amọn adiseeme ye anye,3mme adaiso mbon ekọñ Amọn emaebo Hanun, “Afo akere abo ke Defid anam ami adikpono ete mfo ke adinọ isʌñutom edi ediseeme ye afo? Nte idooho mme isʌñutom amọ edi ubịne fiin ediduuñọ ñnyʌñ ñyep idʌñ mfo ma edooro idịd ami ke ubọọñ?”4Ndin Hanun amaamuum mme ikpọ isʌñutom Defid, akwaat ammọ ided, afat mme afọñ ammọ mbai-mbai ke efʌd, anyʌñ abịn ammọ ate enyọñọ.5Ke ini awo adidọkkọke Defid abaña se ikitịppe inọ mme isʌñutom ami, anye amaadọñ mbon utom amọ ekesoobo ammọ, sia emaenekke esuenne ammọ ataa eti-eti. Adidem amaabo ammọ ate, “Iba ke Yeriko tutu ñwaebek ndufo amaana atịppe, mbemiso ndufo etịmme enyọñ edi.”6Ke ini mbon Amọn ekekịtte ebo ke mmimọ imiyat Defid esịd, Hanun ye mbon Amọn emaenọ talen silfa tọsịn keed (1,000) adikikpe mbọọ mme sariọd ye mbon uwad sariọd e-etooho Aram Naharaim, Aram Maaka ye Soba.7Ammọ emaekpe mme sariọd ye mbon uwad sariọd tọsịn edịb mme duob mme iba (32,000), ukem ado ye adidem Maaka ye udịmekọñ amọ, ekedieghe edinam nnaaekọñ ekpere Medeba, ke ini mbon Amọn ekewuọñọke ke abio ammọ enyʌñ edibono eba ke mbeeñeidem ediwuọ ñkaa ekọñ.8Defid akekop ami, anye amaasio Yoab ye afịd udịm mbon unwana ekọñ adọñ.9Mbon Amọn emaewuọñọ edibeeñe idem eda ke udịm unwana ekọñ ke inuaatob abio ammọ, ke ini mme ndidem e-ekediighe eketieghe ke idem ammọ ke ñnwaña-ñnwaña itie.10Yoab amaakịt ke mme udịmekọñ mmọdo eba ke iso ye ke edem amọ, anye ndin amaasat ubaak mme nta anwanaekọñ ke Isrel anyʌñ asio ammọ adọñ eka ekenwana ye mbon Aram.11Anye amaasịn ubaak mbon ekọñ se ikisʌhọ ke idak ndadusʌñ Abisai ayịneka amọ awodeen, ndin emaedọñ ammọ eka ekenwana ye mbon Amọn.12Yoab amaabo ate, “Adieke mbon Aram esọññọ adudu eñkan miin, ana ndufo ediñnyaaña miin; ado mbon Amọn ekpesọñ adudu ikan ndufo, ndin ami ñyainyaaña ndufo.13Ikop uko, yak ñnyịn inyʌñ inwana uko-uko inọ ikọd ñnyịn ye mme abio ake Abasi ñnyịn. Abọọñ ayaanam se ifọn anye ke anyen.”14Ndin Yoab ye udịmekọñ ekesañake ye anye emaewuọñọ ekaa edinwana ye mbon Aram, ndin mbon Aram emaefeeñe ke iso amọ.15Ke ini mbon Amọn ekekịtte ebo ke mbon Aram ekesʌk efeeñe, ammọ ñko emaefeeñe ke iso ayịneka amọ Abisai enyʌñ ekedʌk abio. Ndin Yoab amaatịmme anyọñ akaa Yeruselem.16Ke ini mbon Aram ekekịtte ebo ke Isrel ikan mmimọ, ammọ emaedọñ mme isʌñutom enyʌñ enam eben mbon Aram edi edem inyañ Yufretis, Sopak adaiwuod mbonekọñ Hadadesa akedat ammọ usʌñ.17Ke emaekedọkkọ Defid ñkpọ ami, anye amaakoot afịd mbon Isrel anyʌñ aboiyo Yọdan; anye amaasaña abịne ammọ anyʌñ atịm udịmekọñ amọ ke mbeeñeidem ke nsakiso ammọ. Defid amaaneeñe ammọ ke udịm ke mbeeñeidem adisoobo ye mbon Aram ke ekọñ, ndin ammọ emaenyʌñ enwana ye anye.18Ado mbon Aram emaefeeñe ke iso Isrel, ndin Defid amaawot mbon ake ekewatta sariọd ammọ awo tọsịn itiaba (7,000) ye mbon ekọñ ake ekesañake ke ukod ammọ tọsịn aba (40,000). Anye amaanyʌñ awot Sopak adaiso ekọñ ammọ.19Ke ini mme akama utom ukara Hadadesa ekekịtte ke mbon Isrel emaekan ammọ, ammọ emaekekpe emem ye Defid enyʌñ ekappa esịne ke idak ukara amọ.
Ndin mbon Aram ikinyịmmeke adinwam mbon Amọn aba.
Biblica, Inc.