Akpa Ñwed Krọnikịd14
Ufọk Defid ye Ubon Amọ
1Akema Hiram adidem Tai amaadọñ mme isʌñutom anọ Defid, adian ye mme mboi eto sida, mme akọọkufọk itiad ye mme akọñeto edikibọp ufọk abọọñ nnọ anye.2Ndin Defid amaadiọọñọ ke Abọọñ amaisio imọ anịm nte adidem andikara Isrel ndin ke edịppe abioubọọñ imọ ke anyọñ ato ke ntak ikọd amọ Isrel.3Ke Yeruselem Defid amaanie uwak ibaan anyʌñ akappa ado ete uwak nditọ ideen ye nditọ ibaan.4Mme anyịñ nditọ se ekeman enọ anye ke Yeruselem edoñño ami: Samua, Sobab, Natan, Sọlọmọn,5Ibha, Elisua, Elpeled,6Noka, Nefek, Yafia,7Elisama, Beeliada ye Elifeled.Defid Akan Mbon Filistia ke Ekọñ
8Ke ini mbon Filistia emaekekop ke emaeyet Defid adan nte adidem afịd Isrel, ammọ emaedọọk ekaa ke afịd adudu adikiyem anye, ado Defid amaakop abaña amaanyʌñ awuọ akaa akesoobo ye ammọ.9Akem mbon Filistia emaedi ediyọhọ ke abedeñ Refaim;10Ke ntoro Defid amaabịp Abasi ate: “Nte ami ñka ñkenwana ye mbon Filistia? Nte afo ayaayaak ammọ ansịn miin ke ubọk?”Abọọñ amaabọọrọ anye ate, “Kaa, ami ñyaayaak ammọ usịn fiin ke ubọk.”11Ndin Defid ye ideen amọ emaekaa ke Baal Perasịm, do ke anye akekan ammọ. Anye amaabo, “Naña mmọọñ abomo awuọñọ, kpa ntoro ke Abasi aboom mme asua mmi ato ubọk mmi.” Ntak ado anam ekedikoot itie ado Baal Perasịm.12Mbon Filistia emaefeeñe ekpọñ mme abasi ammọ do, ndin Defid amaanọ uyio ate yak efọp afịd ammọ ke ikañ.13Ini keed mfen mbon Filistia emaemaana edinwana ke abedeñ;14ke ntoro Defid amaabịp Abasi, ndin Abasi amaabọọrọ anye ate, “Kuubịne ammọ nnen-nnen, ado tọ akọ kanna ammọ nyʌñ nwana ye ammọ ke itie mme eto pọpla.15Imaisʌk ikokop uyom ntịm ñkpad isañ ke mme anyọñ eto pọpla ami, iwuọñọ ikaa ikinwana ye ammọ, sia ado adiiwọt ke Abasi ibem iso awuọ akaa adikiwoot mbon ekọñ Filistia.”16Ndin Defid amaanam naña Abasi aketemme anye, ndin ammọ emaewot afịd mbon ekọñ Filistia, tọọñọ ke Kibiọn tutu akewuọ Kesa.17Ndin etob Defid amaawuọ afịd idʌñ, ndin Abọọñ amaanam afịd mme idịd ebaak anye.
Biblica, Inc.